Бөҕөстөрбүт сыалларын-соруктарын ситистилэр

Солигорск куоракка Беларусь Республикатын көҥүл тустууга чемпионата ыытыллан түмүктэннэ. Чемпионакка саха тустуутун үс иитиллээччитэ кытынна.

Бастакы күн норуоттар икки ардыларынааҕы кылаастаах спорт маастара, Европа чемпионатын үрүҥ көмүс призера, 31 саастаах Ньургун Скрябин туһунна. Кини кыттыбыт 65 кг ыйааһыныгар барыта 12 бөҕөс баарыгар, биһиги киһибит сааһынан да, тустубут үөрүйэҕинэн, аатынан-суолунан даҕаны чорбойор этэ.

Ньургун утуу-субуу спорт маастардара Илья Рогозовы, Данила Широковы 10:0, Анатолий Громыконы 11:1 уонна финалга маастар Владислав Койканы 13:3 ахсаанынан холкутук кыайталаата. Итинэн кини Беларусь 3 төгүллээх чемпионунан буолла.

Иккис күн 61 кг ыйааһыннаахтар чемпионаты саҕалаатылар. Аан дойду чемпионатын боруонса призёра Арыйаан Тютрин бу сырыыга биир ыйааһыны өрө тахсан туһунна. Кини маастар Максад Гасановы 10:0 хотон баран, финалга тахсар иһин киирсиигэ опыттаах бөҕөс, норуоттар икки ардыларынааҕы кылаастаах спорт маастар Димчик Ринчиновы кытта киирсиитигэр ыксата сырытта, 1:2 ахсаанынан сабырыттаран иһэн, хапсыһыы бүтүүтэ киһитин охторон, кыл мүччү (3:2) кыайан таҕыста.

Оттон Орто Халыма ыччата, норуоттар икки ардыларынааҕы кылаастаах спорт маастара Андрей Бекренев – Дмитрий Кушнеровы, Дмитрий Чаркины, Евгений Ребиковы улаханнык тириппэкэ-хоруппакка кыайталаата.

Финалга Андрей Бекренев уонна Арыйаан Тютрин тустуулара, 5:3 ахсаанынан Бекренев туһатыгар буолла. Хапсыһыылар хайдах быһыылаахтык барбыттарын манна көрүөххүтүн сөп: (https://www.youtube.com/channel/UCdQWiPUliiKpPOVV3JKN..).

Манна даҕатан эттэххэ, Беларусь Республикатын 9 төгүллээх чемпиона, Европа чемпионатын 4 төгүллээх призера, аан дойду чемпионатын боруонса мэтээллээҕэ, аан дойду Кубогын биирдиилээн түмүккэ кыайыылааҕа Владислав Андреев кыттыбата. Кини тустарын тохтотон, быйыл күһүҥҥүттэн Беларусь эдэрдэргэ хамаандатын тренеринэн ананан үлэтин саҕалаата.

Бу чемпионакка уолаттарбыт бэйэлэрин иннилэригэр туруоруллубут сыалларын-соруктарын ситистилэр диэххэ сөп. Утарсааччыларын аһара баһыйалларын көрдөрдүлэр. Итиэннэ бу ситиһиилэринэн, кулун тутар бүтүүтэ Венгрияҕа ыытыллар Европа чемпионатыгар кыттар хамаанда састаабыгар үһүөн бигэтик киирдилэр. Салгыы күрэхтэһиилэргэ уолаттарбытыгар ситиһиилээх кыттыыны баҕарабыт.

Петр ПАВЛОВ.    

Добавить комментарий

Ваш адрес email не будет опубликован.