Бөҕөстөрбүт – аҕам саастаахтар чемпионаттарыгар

Греция Лутраки куоратыгар спортивнай тустууга аҕам саастаах бөҕөстөр аан дойдуга бастыыр иһин чемпионаттара саҕаланна. Программа быһыытынан алтынньы 19-21 күннэригэр бастаан көҥүл тустуу маастардара тусталлар, оттон хаалбыт үс күҥҥэ гректии-римнии тустааччылар киирсэллэр.

Манна Саха сириттэн икки киһи: Герасим Дьяконов уонна Вадим Данилов кытталлар.

Ол курдук, Герасим Дьяконов кыттар 62 кг ыйааһыныгар барыта уон кыттааччы баар. Герасим бастаан узбек А.Абдурахмановы кытта тустуоҕа. Онно хайалара кыайбыта Казахстан уонна АХШ пааратын кыайыылаҕын кытта көрсүөҕэ. Өссө бу бөлөххө Жорик Оганесян (Армения) уонна Борис Савва (Молдова) диэн, аҕам саастаахтар чемпионаттарыгар балачча ситиһиилээх, биллэр бөҕөстөр бааллар.

Оттон Вадим Данилов 70 кг тустар. Кини ыйааһыныгар 11 киһи баар. Вадим бастаан, финал чиэппэригэр француз С.Мехаданы кытта тустар. Бу бөлөххө иккис паараҕа Саров (Болгария) – Магомедов (Россия) көрсүөхтэрэ. Онон бөҕөспүт француһу аастаҕына, финал аҥарыгар тахсар кыахтаах.

Бөҕөстөрбүтүгэр ситиһиилээх кыттыыны баҕарабыт!

Чемпионат программатын биһиги сайтпытыгар http://dzulurgan.ru, иннинээҕи таһаарыыга билсиэххитин сөп. Оттон хапсыһыылары Тустуу аан дойдутааҕы түмсүүтүн (UWW) сайтыгар быһа көрүөххүтүн сөп.

«Дьулурҕан».

Добавить комментарий

Ваш адрес email не будет опубликован. Обязательные поля помечены *