«Азия оҕолоро»: VII оонньуу эһиил Владивостокка ыытыллыаҕа

«Азия оҕолоро» Норуоттар икки ардыларынааҕы оонньуу комитетын президенэ Владимир Максимов уонна Приморскай кыраай губернатора Олег Кожемяко эһиил – 2022 сылга «Азия оҕолоро» норуоттар икки ардыларынааҕы спортивнай оонньууну тэрийэн ыытарга сөбүлэһии оҥордулар.

Онон, «Азия оҕолоро» ыытыллан кэлбит историятыгар аан бастаан республика тас өртүгэр буолар буолла. Оонньуу эһиил от ыйын 27 – атырдьах ыйын 8 күннэригэр ыытыллара былааннанар.

Көрсүһүүгэ, Владивосток куорат «Азия оҕолоро» норуоттар икки ардыларынааҕы VII спортивнай оонньууну бэлэмнээн, тэрийэн ыытарга бэлэмэ биллэрилиннэ.

“Азия оҕолоро” оонньуу Пресс-киинэ иһитиннэрбитинэн, оонньуу бырагырааматыгар спорт 17 көрүҥэ киирэр. Онуоха Приморскай кыраай «Азия оҕолорун» тэрийэн ыытарынан, өссө эбии икки көрүҥү: бадминтону уонна брейк-дансы итиэннэ оонньууга эрдэттэн киллэриллибит харбааһын көрүҥэр – аһаҕас халлаан аннынан харбааһыны уонна спортивнай тустуу көрүҥэр – гректии-римнии тустууну киллэрэргэ этии киллэрдэ. Онон VII оонньууга Владивостокка барыта спорт 19 көрүҥэр мэтээллэр оонньонуохтара.

Россия Президенэ Владимир Путин «Азия оҕолоро» оонньууну Уһук Илин регион киин куоратыгар бэлэмнээн уонна тэрийэн ыытыыны хааччыйарга сорудахтаата. Онон бу дьыл ахсынньы 10 күнүгэр бэлэмнэнии хаамыытын президеҥҥэ отчуоттуохтаахтар.

Санатан эттэххэ, «Азия оҕолоро» VII оонньуу 2020 сыллаахха ыытыллыахтаах этэ, ону ковид дьаҥынан сибээстээн 2022 сылга көһөрүллүбүтэ.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *