Артур Иннокентьевич Пахомов сырдык аата үйэтитиллэр

Бэҕэһээ, ахсынньы 1 күнүгэр Саха Республикатын Ил Дархана Айсен Николаев бэйэтин 2174 №-дээх ыйааҕынан, Артур Иннокентьевич Пахомов аатын Саха сирин боксаҕа олимпийскай эрэллэри бэлэмниир спортивнай оскуолатыгар иҥэрдэ.  

Бу ыйаах – Российскай федерация физическэй культураҕа үтүөлээх үлэһитэ, СР уонна РФ үтүөлээх тренерэ, Д.П. Коркин аатынан Саха Республикатын физическэй культураҕа уонна спорка эйгэтигэр Государственнай бириэмийэтин лауреата, Ньурба оройуонун бочуоттаах гражданина Артур Иннокентьевич Пахомов сырдык аатын үйэтитиинэн уонна кэриэстээһининэн таһаарылынна.

Былырыын биһиги кэккэбититтэн ыарахан ыарыы кэнниттэн өлөн туораабыт биллиилээх тренер А.И. Пахомов аатын кытта Саха сирин боксаҕа историята ыкса сибээстээх. Элбэх сыллар усталарыгар кини дьаныардаах үлэтинэн үгүс талааннаах спортсменнар, спорт маастардара иитиллэн-үөрэтиллэн, такайыллан тахсыбыттара. Артур Иннокентьевич саамай улахан ааттаах-суоллаах иитиллээччилэринэн буолаллар: Пекиннээҕи-2008 Олимпиада боруонса призера, Европа үс төгүллээх чемпиона, спорт үтүөлээх маастара Георгий Балакшин, Европа икки төгүллээх чемпиона, аан дойду чемпионатын боруонса призера, Риотааҕы-2016 Олимпиада кыттыылааҕа, спорт үтүөлээх маастара Василий Егоров.

Ити курдук, А.И. Пахомов аатын үйэтитии салҕанар. Санатан эттэххэ, быйыл күһүн кини дойдутугар Ньурбаҕа өйдөбүнньүк пааматынньык туруоруллубута. Аны Артур Иннокентьевич туһунан кинигэ уонна киинэ оҥоһуллара былааннанар.

«Дьулурҕан».

Добавить комментарий

Ваш адрес email не будет опубликован.