Анаабыртан сыдьааннаах эдэр тустуук

Аҕыйах хонуктааҕыта Николай Щеглов көҥүл тустууга «Москва күһүнэ» диэн уолаттарга күрэхтэһиигэ 60 киилэҕэ бастакы миэстэни ылла. Ити туһунан биһиэхэ, билигин дойду тэбэр сүрэҕэр олорор, улэлиир биир дойдулаахпыт Илларион Иванов иһитиннэрэр.

Николай Щеглов сааһа 15-һэ. Бастакы тренерэ – Ашот Баласанян. Николай билигин Москва куорат Олимпийскай эрэллэргэ училищетын 1-кы курсун студена. Кини бэйэтин саастыылаахтарын ортотугар элбэх күрэхтэһии кыайыылааҕа уонна призера. Санатан эттэххэ, Николай эһэтэ Сергей Спиридонов Саха сириттэн, Анаабыртан төрүттээх, Чурапчытааҕы спортивнай интернат-оскуола выпускинига. Ис дьыала ветерана, билигин бочуоттаах сынньалаҥҥа олорор. Аҕата Николай Егорович Андросов «Анаабыр алмааһа» тэрилтэни тэрийээччилэртэн биирдэстэрэ этэ.

Уол Саха сирин кытта сибээһин быспат. Биирдэ эмэ Дьокуускайга кэлэн, эрчиллэн барар.

Николай – эдэр талааннаах, инникитин элбэҕи эрэннэрэр спортсмен. Бу күннэргэ кини Россия хамаандатын кытта анал үөрэтэр-эрчиллэр түмсүүгэ сылдьар. Тустуук Николай Щеглов сайдыытыгар педагогическай наука кандидата Петр Иванович Кривошапкин, көҥүл тустууга ССРС спордун маастардара Василий Жирков, Илларион Иванов күүс-көмө, сүбэ-ама буолаллар.

Николайга ситиһиини баҕарыахха уонна хаһан даҕаны төрүттэрин дойдутун умнубатыгар сүбэлиэххэ!

«Дьулурҕан».

Хаартыскаҕа: Николай Щеглов пьедестал үрдүкү үктэлигэр.

Добавить комментарий

Ваш адрес email не будет опубликован.