Айар дьоҕурдаахтар оонньуулар тэрээһиннэригэр кыттыстылар

Эһиил ыытыллыахтаах Саха сирин норуоттарын VIII Спортивнай оонньууларыгар бэлэмнэнии улам далааһыннананан иһэр. Бүгүн, ахсынньы 9 күнүгэр улууспут талба дьоҕурдах дьонун түмсүүлэрэ аны сайын кэлиэхтээх ыалдьыттарга туттарарга анаан бэйэлэрин бэлэхтэрин бэлэмнээбиттэрин туттарар бэлиэ түгэнэ “Талба талаан дьоһун бэлэҕэ” ааттанан буолан ааста.

Ол курдук, “Удьуор утум” кылтан-сиэлтэн тигээччилэр, “Кырадаһын” таҥас кырадаһыныттан тигээччилэр, Бээрийэтээҕи туосчуттар “Арчы”, тимир уустарын, мас уустарын түмсүүлэрэ, “Үһүс саас оскуолатын” чилиэннэрэ кыттыыны ыллылар.

“Удьуор утум” кылдьыттар түмсүүлэрэ (салайааччы М.Петрова) 100 устуука оҕо үҥкүүгэ тутар дэйбиирин, 100 миэтэрэ салама баайар ситиини оҥорон туттардылар. Онтон кырадаһынтан тигээччилэр (сал. М.Атласова) 100 устуука олбоҕу, “Арчы” туосчуттара 30 толору ситэриллибит саламаны, “Үһүс саас оскуолата” (сал. Д.Бурнашева) 100 устуука харысхалы оҥорон биэрдилэр. Маны тэҥэ мас уустара (сал. В.Егоров) 100 устуука чороону оҥорорго сорук ылынан үлэлэһэ сылдьалларын туһунан иһитиннэрдилэр. Онтон Бэрт Ууһун нэһилиэгинээҕи тимир уустарын түмсүүтэ үһүйээҥҥэ кэпсэнэр Майаҕатта Бэрт Хара батыйатын, оҕун, атын да сэбин-сэбиргэлин оҥорорго сорунан эрэллэрин туһунан салайааччылара Илларион Попов кэпсээтэ.

Норуот маастара Прасковья Крылова улууспут гербэтин оҕуруонан тикпит сиэдэрэй оҥоһугун улуус баһылыгар Алексей Федотовка туттарда. Бу ураты оҥоһуулаах гербэни ханнык баҕарар ыалдьыт сэргии көрөр кэрэ көстүүтэ буолуоҕар саарбахтааһын суох.

Онон Уус Алдан улууһа ураты дьоҕурдаах дьоммутунан сураҕырарбытын бу да бэлэхтэр кэрэһилиэхтэрэ. Уйгу-быйаҥ, талба дьоҕур чахчы баар сирэ – Уус Алдан эбит дэтиэхпит.

Бу ааһан эрэр сыл улууспутугар Сомоҕолоһуу уонна Айымньылаах үлэ сыла буолар. Ол бу тэрээһиҥҥэ дьэҥкэтик көһүннэ. Дьоҕурдаах дьоммут өйдөрүнэн-санааларынан сомоҕолостулар, талба талааннарынан оҥорон таһаарбыттарын бэлэх ууннулар.

Афанасий КОПЫРИН.

Уус Алдан.

Добавить комментарий

Ваш адрес email не будет опубликован.