Тарскай түһүлгэтэ Сунтаар бөҕөстөрүн кыайыытынан түмүктэннэ

Эрдэ иһитиннэрбиппит курдук, республика киин куоратын «Дохсун» спортивнай комплексыгар икки күн устата 2004-2005 сс. төрөөбүт уолаттар Николай Николаевич Тарскай кэриэһигэр Саха сирин үрдүнэн бастыыр иһин күрэхтэһиилэрэ ыытыллан түмүктэннэ.

Бастакы күн сэттэ мэтээллэнэн чурапчылар күннээбит эбит буоллахтарына, иккис күн сунтаардар аатырдылар. Биэс ыйааһынтан – үһүгэр бастаатылар. Бүлүүлэр даҕаны куһаҕана суох көрдөрүүлэннилэр.

Санатан эттэххэ, чемпионат кылаабынай судьуйатынан Станислав Афанасьев, кылаабынай секретарынан Вячеслав Кривошапкин үлэлээтилэр.

Саха сирин көҥүл тустууга уолаттарга хамаандатын сүрүн тренерэ, спорт маастара Владислав Петров:

Күрэхтэһии этэҥҥэ үчүчгэйдик ааста. Сунтаар хамаандата биэс чемпионнанан, үчүгэй көрдөрүүлэннэ. Сүрүн сорукпут диэн, кулун тутар 25-29 күннэригэр Хотугу Осетияҕа – Владикавказ куоракка буолуохтаах 18-гар диэри саастаах уолаттарга Россия түһүлгэтигэр ситиһиилээхтик кыттыы буолар. Онно бэлэмнэнэн бу күрэхтэһии ыыттыбыт. Чемпионнарга «Айрон» компания футболкаларын бэлэхтээтибит. Спорт маастара Ян Емельянов саамай элбэх кыттааччылаах – 55 киилэҕэ кыайыылааҕынан тахсыбыт Артем Слепцовка (Чурапчы) бэйэтин харчынан бирииһин анаата. Итиэннэ «Династия» (Петр Севастьянов) диэн стоматологическай клиника бэйэтин бэлэх-сертификатын күрэхтэһии бастыҥ судьуйатыгар – Александр Львовка (Сунтаар) туттардыбыт.

Оттон Бүлүү улууһун спорка комитетын председателэ Гаврил Евсеев санаатын маннык үллэстэр:

Бүлүүтээҕи Василий Гаврильевич Румянцев аатын сүгэр спортивнай оскуола көҥүл тустууга отделениетыгар эрчиллэр уолаттар – В.Г. Румянцев төрөөбүтэ 90 сылын көрсө уопсайа алта мэтээли ылан, дьоһун ситиһиилэннилэр. Бу, тренердэр Роман Окоемов уонна Эдуард Никифоров сыралаах үлэлэрин түмүгэ. Бу көрдөрүү Василий Гаврильевич сырдык аатыгар ананар уонна инникитин даҕаны спорт араас көрүҥнэригэр ситиһиилэр кэлэ турдуннар диэн баҕа санаалаахпыт.    

Чемпионат иккис күнүн түмүгэ:

45 кг (15): 1. Кэскил Семенов – Сунтаар, 2. Дьулус Петров – Дьокуускай, 3. Ренат Спиридонов – Бүлүү, Герман Гурьев – Сунтаар.

51 кг (23): 1. Лев Павлов – Сунтаар, 2. Арсен Кононов – Хаҥалас/Чурапчы, 3. Афанасий Брызгалов – Мэҥэ Хаҥалас, Николай Захаров – Нам/ОЭУ.

60 кг 1. Аслан Трофимов – Сунтаар, 2. Кирилл Дорожкин – ОЭУ, 3. Василий Григорьев – Бүлүү/ОЭУ, Юлиан Григорьев – Сунтаар.

71 кг (12): 1. Роман Николаев – Бүлүү/ОЭУ, 2. Руслан Ишахаев – Томпо, 3. Дьулуур Петров, Кирилл Мордовской – иккиэн чурапчылар.

92 кг (4): Василий Уйгуров, 2. Иван Андреев, 3. Ярослав Горохов – үһүөн дьокуускайдар, 3. Иван Назаров – Бүлүү.

«Дьулурҕан».

Тарскай түһүлгэтэ Сунтаар бөҕөстөрүн кыайыытынан түмүктэннэ: 1 комментарий

  1. Панаат

    Василий Румянцев дьинэ Уус-Алдан улууьун Дыгдалга тереебут улааппыт киьи. Ол эрэн хаарыан чулуу киьибитин Булуулэргэ былдьаппыппыт хомолтолоох. Кутует буолан олохсуйбут сиригэр зал, республиканскай турнир ыытыллар. Дьинэ Халдеев курдук, даже ордук ситиьиилэрдээх улуу тустуукпут утуе аатын уус-алданнар сатаан уйэтиппэтибит…

Добавить комментарий

Ваш адрес email не будет опубликован. Обязательные поля помечены *

16 − 5 =