Айсен Копырин Бүтүн Россиятааҕы турнирга призердаата

Забайкальскай кыраай Агинскай-Бурятскай уокуругар Советскай Союз Геройа Базар Ринчино сырдык кэриэһигэр көҥүл тустууга эр дьоҥҥо Бүтүн Россиятааҕы 58-с турнир ыытыллан түмүктэннэ. Бу турнирга биһиги республикабытыттан эмиэ кытыннылар.

Турнирга 25 хамаандаттан 184 бөҕөс күөн көрүстэ. Тустуу тэрээһинигэр В.П. Керемясов аатынан Дьокуускай куорат 3 нүөмэрдээх спортивнай оскуолатын тренерэ, 1-кы категориялаах спортивнай судьуйа Станислав Афанасьев көбүөр салайааччытын быһыытынан үлэлэстэ.

Түһүлгэҕэ, сүрүннээн, соторутааҕыта аҕай ыытыллан түмүктэммит Дальнай Восток федеральнай уокуругун Россия чемпионатыгар сүүмэрдиир күрэхтэһиитин кыттыылаахтара көһөн тиийэн туһуннулар. Ол курдук, норуоттар икки ардыларынааҕы кылаастаах спорт маастардара Жаргал Дамдинов (61 кг), Балдан Цыжипов (125 кг), спорт маастардара Булат Батоев (70 кг), Барас Базаров (86 кг) – бастаатылар.

Атын ыйааһыннарга кыайыылаахтарынан Ананда Дашиев (Бурятия, 57 кг), Зандан Будаев (Забайкальскай кыраай, 65 кг), Ариг Жапов (Забайкальскай кыраай, 74 кг), Алексей Пинтаев (Бурятия, 92 кг), Цэдаши Дугаров (Бурятия, 97 кг) буоллулар.

Биһигиттэн икки бөҕөс туһунна. Владимир Юмшанов итиэннэ Москаттан Алекандр Неустроев 70 киилэҕэ биирдии эргиир тустан хааллылар. Онтон спорт маастара Айсен Копырин (86 кг) бастакы эргииргэ опыттаах Барас Базаровка хотторон баран, киһитэ финалга тахсыбытынан, салгыы «уоскутар» бөлөххө киирэн туһунна. Итиэннэ утуу-субуу Борогшонов уонна Сультимов диэн олохтоох тустууктары иккиэннэрин 10:0 ахсаанынан хотон, турнир үһүс призёрунан буолла.

Петр ПАВЛОВ.    

 

 

Добавить комментарий

Ваш адрес email не будет опубликован. Обязательные поля помечены *

пять − 5 =