Сыл бастыҥ спортсменнарын быһаарыы туһунан

2019 сылтан Саха Республикатын Спорка уонна физическэй култуураҕа министиэристибэтин көҕүлээһининэн сыл бастыҥ спортсменнарын быһаарыы “Гранд-финал” диэн аатынан Саха” НКИХ нөҥүө тэриллэр буолбута. Бастаан, мин өйдөөбүппүнэн, федерациялар, улуустар уонна спортивнай тэрилтэлэр министиэристибэҕэ киллэрбит сайаапкаларын түмүгүнэн, номинацияларынан үстүү бастыҥ көрдөрүүлээх спортсменнар ким буолаллара быһаарыллар. Онтон “Спорт Якутии” хаһыат сайтыгар ол спортсменнарга куоластааһын саҕаланар. Куоластааһыҥҥа ким баҕалаах барыта кыттара көҥүллэнэр, “норуот бүттүүнүн куоластааһына” диэн ааттанар. Барыта өйдөнөр, сөп курдук.

Ол гынан баран, маннык куоластааһыҥҥа мин санаабар, сороҕор, спортсмен спортивнай ситиһиилэрин таһыма буолбакка, кини ханнык улуустан сылдьара, спорт ханнык көрүҥэр ситиһиилэммитэ, төһө халыҥ аймахтааҕа, төһө үгүс доҕордооҕо, билэр дьоннооҕо быһаарар оруолу ылаллар курдук. Холобура, былырыын спорт национальнай көрүҥнэрин номинациятыгар мас-рестлиҥҥэ өрөспүүбүлүкэ чемпионатыттан саҕалаан, Аан дойду чемпионатыгар тиийэ бары күрэхтэһиилэри кыайан чемпион үрдүк аатын сүкпүт Сергей Константиновы (Дьокуускай), хапсаҕай маастара Николай Иванов (Таатта) куотан тахсыбытын, биир бэйэм, ылымматаҕым.

Быйыл, Олимпиадаҕа киллэриллибэтэх көрүҥнэр номинацияларыгар дуобат – рапид уонна блиц көрүҥнэригэр ситиһиилэммит аан дойду гроссмейстера Матрена Ноговицына, иккис сылын субуруччу классическай программаҕа аан дойдуга бастаабыт Андрей Федотовы куотан таҕыста. Дьиҥэр, Дуобат Аан дойдутааҕы Федерациятын справочниктарыгар, официальнай суруйууларга дуобаччыт классическай көрүҥҥэ хаста бастаабыта бэлиэтэнэр, онно сүрүн болҕомто ууруллар. Онтон блицкэ, рапидка бастаабыта эбии быһаарыы эрэ курдук суруллар. Холобур, биһиги улуу дуобаччыппыт Гавриил Колесов туһунан Википедияҕа “Аан дойду 7 төгүллээх чемпиона” диэн суруйаллар, онтон Гавриил Гаврильевич блицкэ, рапидка аан дойдуга бастаабытын эптэххэ, уопсайа 12-тэ бастаабыта ээ!

Мин бу суруйуум Матрена Ноговицына ситиһиилэрин намтата сатааһын буолбатах. Матрена Степановнаны талан ылбыт спордун көрүҥэр – дуобакка, олус бэриниилээх, дьиҥнээх профессионал-спортсмен быһыытынан сыаналыыбын, убаастыыбын уонна кини үгүс сыллаах сыралаах үлэтэ үтүө түмүктээх буолуо, 100 харахтаах дуобат классическай көрүҥэр чемпионнаан ыалдьааччыларын үөрдүө диэн эрэнэбин. Аны, 4 номинацияҕа төрдүөннэригэр кэрэ аҥаардар бастаабыттара, куоластааһын бу балаһыанньата салгыы хааллаҕына, күүстээх аҥаардар чулуу аатыраллара ыарахаттардаах буолара буолуо курдук көрөбүн.

Куоластааһыҥҥа сүүмэрдэммит спортсменнар бары чулууттан чулуулар буолаллара саарбахтаммат, кинилэр куоластааһын хайдах түмүктэммитигэр туох да сыһыаннара, буруйдара суох. Сыл бастыҥ спортсменнарын быһаарыы “норуот куоластааһынынан” буолбакка, спорт специалистарынан дьиҥ спортивнай бириинсипкэ олоҕуран ыытыллыахтаах дии саныыбын. 5-6 сыллааҕыта спортивнай суруналыыс Петр Павлов “Бастыҥнары суруналыыстар быһаарыахтаахтар” диэн ыстатыйата тахсыбыта, кинини өйөөн, ол кэмҥэ спорт тиэмэтигэр элбэх сонун, киһини толкуйдатар ис хоһоонноох ыстатыйалары суруйбут суруналыыс Иннокентий Птицын “Бастыҥнары быһаарыыны суруналыыстарга итэҕэйиэххэ” диэн суруйуута “Саха сирэ” хаһыакка (17.12.15 с.) бэчээттэммитэ.

Кинилэр Аан дойдуга, Россияҕа бастыҥнары спортивнай суруналыыстар быһааралларын бэлиэтээн туран, чулуулары быһаарааччылар, бастатан туран, Аан дойду спордун историятын үчүгэйдик билэр, спорт хас биирдии көрүҥүн ымпыгын-чымпыгын өйдүүр буолуохтаахтарын тоһоҕолоон ыйбыттар этэ. Быйыл, Cаҥа дьыл иннинэ 24 спортивнай суруналыыс сыл 10 чулуу спортсменын талбыттара бэчээттэммитэ. Онно суруналыыстар бастакы миэстэҕэ боксер Василий Егоровы туруорбуттара. Кинилэр талбыт 10 чулууларын икки илиибинэн өйүүбүн.

Спорду көхтөөхтүк өйүүр, элбэх үрдүк ситиһиилэрдээх спортсменнардаах улуустар: Амма, Ньурба, Мэҥэ-Хаҥалас уонна Дьокуускай куорат 10 чулуу спортсменнарын, хаҥаластар бастыҥ спортсмен оҕолорун быһааран чиэстээбиттэрэ-бочуоттаабыттара хайҕаллаах дьыала! Атын улуустар кинилэртэн холобур ылыахтар этэ.

Саха Республикатын Спорка уонна физическэй култуураҕа министиэристибэтэ сыл бастыҥ спортсменнарын быһаарыы балаһыанньатын хос көрөн уларытыылары киллэрэрэ сиэрдээх буолуо этэ дии саныыбын. Итиэннэ, спортсменнары уонна спорду сэҥээрээччилэри бу боппуруоска бэйэҕит санааҕытын үллэстэргитигэр ыҥырабын.

Константин СТРУЧКОВ.

Дьокуускай.

 

Сыл бастыҥ спортсменнарын быһаарыы туһунан: 2 комментария

  1. Людмила

    Ханнык да номинацияга « норуот куоластааьынын « тохтотуохха наада! Ыстатыйага сепке этиллибит : Ким элбэх аймахтаах, билэр дьонноох – ол кыайар! Ватсап ситимигэр учугэй учууталы, ого иитээччитин, бырааьы …. талы буолла да тууннэри – кунустэри куоластаан диэн кердеьуу беге кэлэр. Аны сорох куоластааьын бокуойдаах буоллаххына куну да быьа баттыы олоруоххун сеп, ол аайы куолас аагылла турар. Ити олох себе суох!

Добавить комментарий

Ваш адрес email не будет опубликован. Обязательные поля помечены *

11 + четыре =