Маннык тэрээһиннэр кэрэхсэниэхтэрин эрэ сөп

Бу күннэргэ биир дойдулаахпыт, Дьокуускай куорат олохтооҕо, спорт куттаах Виталий Жирков тустуук оҕолор бөлөхтөрүн мунньан, Чечня Республикатыгар Гудермес куоракка анал эрчиллиини ыыттара сылдьар. Айанын уонна сырыытын үбүн сүрүннээн бэйэтэ булунар. Итиэннэ спонсордар көмөлөспүттэр.  

В.Н. Жирков сэргэх олохтоох эдэр киһи. Биир сиргэ таба олорбот, барар-кэлэр, булар-талар киһи диэн маннык дьону ааттыыллара буолуо.

Оскуолаҕа үөрэнэ сылдьан көҥүл тустуунан дьарыктаммыт. Улахан көрдөрүүнү ситиспэтэх. Ыал буолан, кэргэннэнэн, оҕолонон баран, бэйэтэ спорка ситиспэтэҕин уолаттара ситиһэллэригэр сыал-сорук туруоруммут. Оҕолоругар бэйэтэ холобур буолан, көҥүл тустууга уонна хапсаҕайга бэтэрээннэргэ республика чемпиона уонна призера буолла. Кини алта оҕолоох. Оҕолорун кыра эрдэхтэриттэн спордунан дьарыктана улааталларыгар такайар. Ол иһин, Жирковтар бары спорт дьарыктаахтар.

Бэһис сылын уолаттары салайан Дагестаҥҥа, Чечняҕа уонна Казахстаҥҥа ыытыллыбыт эрчиллиилэргэ кытыннарар. Тус бэйэтин аптарытыатынан, билиитинэн-көрүүтүнэн сибээстэри олохтоон, маннык тэрээһиннэри көҕүлүүрэ кэрэхсэбиллээхх.

Дорообо! Чеченнэр ыҥырбыттара, сборга, күрэхтэһиигэ, – диир Виталий Николаевич . – Спорткомплекстара үчүгэйэ сүрдээх эбит. Манна икки нэдиэлэ сборданыахпыт, ол быыһыгар Дагестаҥҥа эмиэ сылдьыахпыт. Үһүс нэдиэлэбитин Хотугу Осетияҕа, Владикавказка сборданар баҕалаахпыт. Былааммыт киэҥ, сырыыбыт далааһыннаах, олус туһалаах буолуо тустуук оҕолорго. Бэйэм уолаттарбын кытта, эбии араас улуустартан тустуук оҕолору хомуйан, бу 12 буолан сылдьабыт.

Уопсайынан, спортсмен оҕо кыра эрдэҕиттэн Кавказ оскуолатын билиэхтээх. Оччоҕо улаатан баран атыҥыраабат. Уолаттар Дагестан, Чечня оҕолорун кытта билистилэр, доҕордостулар, аадырыстарын атастастылар. Ону тэҥэ маннык айаннарга кыра эрдэхтэриттэн бэйэлэрин көрүнэ улааталлар, аҕыйах сылынан бэйэлэрэ барыахтара турдаҕа.

Виталий Жирков тренер да, спорт үлэһитэ даҕаны буолбатах. Ол эрээри, бэйэтин баҕатынан сыаллаах-соруктаах. Төрөппүт кыайар буоллаҕына, оҕотун сайыннарыыга маннык үлэлэһэрэ хайҕаныан эрэ сөп. Бу да холобур, хайаан даҕаны туһааннаах исписэлиис (учуутал, тренер) – оскуола, эбэтэр улуус, куорат судаарыстыба анал үбүнэн буолбакка, ханнык баҕарар олоххо бэриниилээх киһи бэйэтэ сүүрэн-көтөн, булан-талан айанын ороскуотун тастан булунан, онно өссө эбиитин элбэх бэлэх-туһах ылынан, сатабыллаахтык кэпсэтэн, боппуруоһу быһаарар кыахтааҕын көрдөрөр.

Петр ПАВЛОВ.         

Маннык тэрээһиннэр кэрэхсэниэхтэрин эрэ сөп: 2 комментария

  1. Панаат

    Уус-Алдантан теруттээх ду. Соторутаагыта Михаил Захаров салайыылаах Мындаабадаагы спортлиуей оголоро эмиэ Дагестанна баран сборданан кэлбиттэрэ👍

    1. Петр Павлов Автор записи

      Маладьыастар! Итинник тэрээһиннэр туһалаахтар.

Добавить комментарий

Ваш адрес email не будет опубликован. Обязательные поля помечены *

1 × 4 =