Александр Поветкин буораҕа билигин даҕаны кураанах эбит

Профессиональнай боксер Александр Поветкин ыарахан ыйааһыҥҥа киирсэр. Нууччаларга бу ыйааһыҥҥа үчүгэйдик киирсэн үрдүк чыпчаалга тиийбит боксердартан биирдэстэрэ. Олимпийскай чемпион. Өр кэмҥэ хотторуута суох баран иһэн, Владимир Кличкоҕа очконан, онтон Энтони Джошуаҕа техническэй нокаутунан хотторбута.

Александр эмиэ Майк Тайсон курдук умса нөрүйэн киирэр. Тайсон курдук мээнэ маятник оҥорон, эмискэ утарылаһааччытын аттыгар биирдэ баар буолбатар да, бэйэтин ыйааһыныгар син түргэнник хамсанар, охсуолуур. Кини улахан уҥуохтаах курдук даҕаны, Кличкоҕа холоотоххо намыһаан хаалар. Умса нөрүйэн атаакалыыр, онуоха Кличко джебынан көрсөр. Уһун буолан, тиэрэ кэдэрийэн аһыттаран, сиирэ-халты оҕустарар.

Александр Германияҕа буолбут боксаҕа күрэхтэһиигэ Марко Кух диэн ньиэмэс боксерын кытта киирсэригэр, туоҕунан эрэ сүһүрдүбүттэрэ. Киирсэ сылдьан илиитэ-атаҕа бааллан, утарылаһааччыта туман быыһынан көстөр курдук буолбута. Тренерэ Зимин элбэҕи этэрэ да, Саша тугу даҕаны өйдөөбөт курдук мээнэнэн көрбүтэ.

Ол да буоллар, эрдэ хомуйбут очкота, сабырыйан хоппута. Саша кэнники Магомед Абдусаламовы кыайбыт Майк Переһи дөйүтэн кыайбыта. Оҕуһу туруору туппут курдук Куба боксерун төрдө эмэҕирбит баҕананы түөрэ аспыттыы түһэрбитэ. Майк Перес күөгэйэр күнүгэр сылдьан Магомед Абдусаламовы очконан хоппута. Дагестан боксера Магомед төбөҕө элбэхтик табыллан, хараҕа ирим-дьирим буолан барбыта. Саатар тохсус раунд кэннэ тренердэрэ тохтотуо эбиттэр. Итии хааннаах, илбис тыыннаах хапкаас уола нэһиилэ да рингэ муннугар олордор, син биир киирсэр санаалааҕа. Ону рингэ муннугар баар тренерэ, сүбэһиттэрэ син биир киллэрбиттэрэ. Майк Перес мөлтөппүт киһини, эбии сэтэрээн кулаабыта. Магомед сирэйигэр ат туйаҕынан тэбэринии ыар сутуруктар “ыаллаабыттара”. Ол да буоллар, дөйөн “күр!” гына сууллан түспэтэҕэ. Кыайыыны Майк Перес ылбыта.

Магомед Абдусаламов сыгынньахтанар хоско тиийэн олорбута. Төбөтө ыалдьарын эппитэ. Рингэҕэ көрөр быраастар мээнэ аахайбатахтара. Кэнники өйдөөбүттэрэ тута, суһал көмөнү оҥоро охсуохтаахтар эбит. Америка быраастара онно кыһаммакка, кэнники эбии киирсэр боксердары көрө барбыттар эбит.

Магомеды кэмниэ-кэнэҕэс инсуллаабытын кэннэ илдьэн эппэрэссийэ оҥорбуттар.

Билигин Магомед кириэсилэҕэ олорор инбэлиит буолбут. Онтон ыла хас да сыл ааста. Кини кэргэнэ Баканай таптыыра бэрт буолан, оҕо курдук бүөбэйдээн, билигин кэминэн олороллор, икки кыыс оҕолоохтор.

Магомед аан дойду ааттаах боксердарын сылбах курдук сытыартыыра, от курдук охтортуура. Билигин киһи билбэт киһитэ буолан, инбэлиит кэлээскэтигэр иччитэ суоҕунан көрө олорорун көрөн, киһи хараастар. Кэргэнэ Баканай сууйар, тарыыр, бытыгын хоруйар, аһатар-сиэтэр.

Магомед эрэйдээх инньэ гынан, бастакы уонна бүтэһик хотторуутугар, бүттүүн олоҕо түҥнэстибитэ. Билигин илини да, арҕааны даҕаны быһаарбат буолбут боксеру хата үчүгэй дьахтар түбэһэн бэрийэ сылдьар.

Александр Поветкин Мануэль Чарр диэн, оннооҕор Виталий Кличко кыайан дөйүппэтэх, очконан кыайбыт боксерун рингэ таһыгар төбөтүнэн түһүөр диэри охсубута.

Мануэль Чарр киһиргэһинэн биллэр, публикаҕа оонньоон араастаан “артыыстыырын ” сөбүлүүр. Виталий Кличкону кытта киирсиэн иннинэ пресс-конференцияларыгар аатыран-өҥнөнөн биэрбитэ. Хайдах кинини рингэҕэ сирэйинэн умса хорутарын, аатын-суолун алдьатан бэйэтэ суон сураҕа аан дойдуга соҕотохтуу аатырыан Виталийга  сирэйигэр эппитэ. Кличко онуоха хата, холку.

“Киирсиэхтэрин иннинэ бары итинник диэбиттэрэ уонна бэйэлэрэ дөйбүттэрэ”, – диэн күлэн кэбиспитэ. Ол кэннэ киирсиилэрэ Москваҕа буолбута, Кличко тэйэ сылдьан, кыйаханан күүрэн, хара күүһүнэн киирэр, атаакалыыр Чарры чаанын тардыбыта. Хаҥас  илиитинэн сирэйин эттээн кыаҕын ылбыта. Иннинээҕи, ол эбэтэр, стойкаҕа иннигэр тутар, хаҥас илиитин олус аллара илдьэ сылдьар курдук, ол эрээри, утарылаһааччытын таппыта эрэ баар буолар. Уопуттаах боксер итинник гынан сэрэхтэрин сүтэрбиттэрин кэннэ, уҥатынан охсон түһэртиир идэлээх.

Дьэ, ол кэннэ Мануэль Чарр аны Поветкины рингэҕэ киирсэ сылдьан кыйахыы сатыыр. Сирэйин, сиэртибэтигэр түһээри гыммыт хахай курдук, ырдьыгынаан эрэрдии мырдыччы туттар.

“Оҕус, мэ!”, – диэн сирэйин үҥүлүтэр.

Онтон сэттис рауҥҥа Поветкин биир үтүө түгэҥҥэ апперкотка табар. Онтон хараҕа дьиримнээн туймаарбыт киһини уҥа-хаҥас охсон түһэрбитэ. Мануэль Чарр рингэ тас өттүгэр кэтэҕэ титирии түспүтэ.

…Билигин Александр Поветкин арыычча сааһырда. Ол да буоллар, былырыын ыарахан ыйааһыҥҥа, аан дойдуга муҥутуур кыайыылаах чемпион Диллиан Уайты кытта киирсибитэ. Александр төрдүс рауҥҥа икитэ туймааран охто сылдьыбыта. Дьэ “мөлтөппүт, хотторууһу” дии санаабыппыт. Онтубут киһибит кыайарын билэн, сэрэҕин сүтэрбит Диллиан Уайты өмүтүннэрэн, аллараттан өрө баһан апперкотка охсубутугар, киһитэ дириҥ далайга умсан дөйбүтэ.

Кэнники Диллиан Уайт сирэ-халлаана, ол эбэтэр, киэҥ уораҕай саалата эргийэн уота-күөһэ умулла сылдьыбыта ааһан, илэ бэйэтинэн буолаат, аны реванш көрдүүр эбит. Кыайан-хотон иһэн, алҕас биир “мэник буулдьаҕа” табыллыбыт курдук санаатахтара. Уайт промоутера, Эдди Хирн Поветкины кытта Диллиан Уайты өссө киирсиһиннэрээри кэпсэтэ сылдьар.

Александр Поветкин буораҕа билигин даҕаны кураанах эбит: “Кимниин баҕарар киирсэр кыахтаахпын!”, – диэн биллэрдэ.

Ородьумаан.

12.01.2021.

Добавить комментарий

Ваш адрес email не будет опубликован. Обязательные поля помечены *

пять × один =