Арыйаан Тютрин уонна Ньургун Скрябин финалга таҕыстылар

Көҥүл тустууга Беларусь Республикатын чемпионатын бастакы күнүн түмүгүнэн финалистар билиннилэр. Биһиги  бөҕөстөрбүт күрэхтэһиини үчүгэйдик саҕалаатылар.

Ол курдук, Арыйаан Тютрин (57 кг) – Константин Куликовы, Илья Лихомановы уонна финалга тахсар иһин киирсиигэ Кирилл Прокоповы улаханнык илистибэккэ очукуонан ыраастык (10:0) кыайталаата. Онон сарсын финалга 20 саастаах спорт маастара Дмитрий Шамелоны (Гомель) кытта тустар буолла.

Европа былырыыҥҥы чемпионатын үрүҥ көмүс призера Ньургун Скрябин (65 кг) – Егор Удовиковы 12:1 кыайда, онтон Андрей Бекреневы бу сырыыга 4:0 ахсаанынан хотон иһэн устунан бэйэтин сөбүлээн туттар албаһыгар киллэрэн ыраастык уурда. Онон Скрябин финалга 18 саастаах спорт маастара Анатолий Громыконы (Гомель) кытта тустуоҕа.

Онтон Андрей Бекренев бастаан Ильяс Эзиевы 10:0 ахсаанынан хоппута. Онон сарсын, үһүс миэстэ иһин киирсэр буолла.

61 киилэҕэ опыттаах Асадулла Лачинов финалга тахсар иһин киирсиигэ Димчик Ринчиновы 1:1 ахсааҥҥа баһыйда. Онон бу ыйааһыҥҥа финал: Асадулла Лачинов – Евгений Ребиков.

Атын ыйааһыннарга финаллар:

70 кг Александр Куришта – Абдулла Ахмедов.

74 кг Азамат Нуриков – Магомедхабиб Кадимагомедов.

79 кг Андрей Карпач – Сурхо Рашитханов

86 кг Артём Руденок – Роман Читадзе.

92 кг Гаджи Раджабов – Аркадий Погосян.

97 кг Александр Гуштын – Василий Павлюченко

125 кг Денис Хроменков – Ибрагим Саидов.

Финаллар сарсын, тохсунньу 12 күнүгэр Саха сирин бириэмэтинэн 16 чаас 30 мүн. саҕаланаллар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

восемнадцать − пять =