Бүгүҥҥүттэн көҥүл тустууга Беларусь чемпионата саҕаланар

Эрдэ иһитиннэрбиппит курдук бүгүн биһиги бириэмэбитинэн 16 чаас 45 мүн. Минскэйгэ Беларусь Республикатын улахан дьоҥҥо көҥүл тустууга чемпионата саҕаланар.

Кэлин биллибитинэн, Беларусь 9 төгүллээх чемпиона, Европа уонна аан дойду чемпионаттарын призёра Владислав Андреев бу чемпионакка кыттыбат буолла. Кини, хамаанда тренерскэй састааба эрдэ быһаарбытын быһыытынан, Европа Олимпиадаҕа сүүмэрдиир турнирыгар кыттарга бэлэмнэнэр. Санаттахха, ол күрэхтэьии кулун тутар 18-21 күннэригэр Венгрия киин куоратыгар Будапештка буолуоҕа.

Маннык түгэҥҥэ Беларусь чемпионатыгар Ньургун Скрябины, Андрей Бекреневы тэҥэ, билиҥҥи кэмҥэ биир тумус туттар тустуукпут Арыйаан Тютрин кыттыахтара.

Бэҕэһээ киэһэ сэрэбиэй ыытылынна. Ол быһыытынан, 57 киилэҕэ барыта 13 бөҕөс күөн көрсүө. Сүрүннээн эдэрдэр, 2000-2003 сыллаах төрүөхтэр. Саамай аҕа саастаахтара 26-лаах биһиги Арыйаан Тютриммыт. Кини саҥа государствоҕа тиийбит буолан, боротокуолга маастарга кандидат диэн суруллубут. Гродно куорат «Динамо» обществотыттан тустар.

Арыйаан бастакы утарсааччыта – 20 саастаах маастарга кандидат Константин Куликов (Гомель). Манна сыһыары тутан эттэххэ, урукку өртүгэр 57 кг ыйааһыҥҥа тустар Асадулла Лачинов уонна Димчик Ринчинов бу сырыыга 61 киилэҕэ кытталлар эбит.

Оттон норуоттар икки ардыларынааҕы кылаастаах маастардар Скрябиннаах Бекренев син былырыыҥҥытын курдук, иккиэн 65 киилэҕэ тусталлар. Бу ыйааһыҥҥа барыта уон бөҕөс баар. Уолаттарбыт иккиэн сетка үөһээҥҥи өртүгэр түбэспиттэр. Онон иккис эргииргэ бэйэ-бэйэлэрин кытта көрсүөхтэрин сөп. Манна даҕатан эттэххэ, бу ыйааһыҥҥа былырыыҥҥы чемпион Георгий Колиев көҥүллэммэт препараты туһанан, хас да сылга тустара бобуллубута. Онон кини быйыл суох.

Ханныгын да иһин, састаабы көрөн баран, биһиги бөҕөстөрбүт үрдүкү эрэ миэстэ иһин киирсиэхтээхтэр дии саныыбын. Чэ, биһиги билгэлиибит, оттон атынын көбүөр бэйэтэ көрөн сиэрдээхтик быһаарыа. Уолаттарбытыгар ситиһиини баҕарыахха.

Беларусь чемпионатын интернеккэ киирэн https://sport-tv.by/ сайтка көрүөххэ сөп.

Петр ПАВЛОВ.     

Добавить комментарий

Ваш адрес email не будет опубликован. Обязательные поля помечены *

3 × три =