Бөҕөстөрбүт Беларусь чемпионатыгар тустуохтара

Тохсунньу 10-12 күннэригэр Минскэйгэ, көҥүл тустууга дьахталларга уонна эр дьоҥҥо Беларусь Республикатын чемпионата ыытыллар. Чемпионат кылаабынай судьуйатынан – международнай категориялаах судьуйа Валентин Сюльжин үлэлиирэ быһаарылынна.

Биллэрин курдук, бу, Саха сиригэр бырааттыы республикаттан билиҥҥи кэмҥэ саха тустууга оскуолатыттан Владислав Андреев, Ньургун Скрябин, Андрей Бекренев кытталлар. Андреев уонна Скрябин – Беларусь национальнай хамаандатын састаабыгар киирэн, Европа уонна аан дойду чемпионаттарыгар ситиһиилээхтик кыттыбыттара.

Аны быйылгыттан бу республикаттан Россия үс төгүллээх боруонса призера, норуоттар икки ардыларынааҕы кылаастаах спорт маастара Арыйаан Тютрин кыттарга суоттанар. Кини өссө Саҥа дьыл инниттэн Минскэйгэ тиийэн, олохтоох бөҕөстөрү кытта бииргэ эрчиллиини барда. Санатан эттэххэ, Арыйаан былырыын тохсунньу ыйга Красноярскайга Иван Ярыгин аатынан норуоттар икки ардыларынааҕы Гран-при турнирга үһүс бириистээх миэстэни ылыаҕыттан, биирдэ даҕаны күрэхтэһиигэ кытта илик.

Былырыын Беларусь чемпионатыгар Владислав Андреев (57 кг) бастакы, Ньургун Скрябин (65 кг) иккис, Андрей Бекренев (65 кг) үһүс миэстэни ылбыттара. Быйыл дьэ хайдах буолар?

Чемпионат бырагыраамата

Тохсунньу 10 күнэ, баскыһыанньа

16:00-17:00 Чемпионат кыттыылаахтарын сэрэбиэйэ.

Тохсунньу 11 күнэ, бэнидиэнньик

08:30-09:00 Чемпионат кыттыылаахтарын ыйааһыннаныылара.

10:30-10:45 Чемпионаты үөрүүлээхтик арыйыы.

10:45-14:45 Дьахталларга уонна эр дьоҥҥо бары ыйааһыннарга барыллааһын хапсыһыылар.

Тохсунньу 12 күнэ, оптуорунньук

08:45-09:00 Чемпионат кыттыылаахтарын ыйааһыннаныылара.

10:30-14:00 Бастакы уонна үһүс миэстэ иһин финаллар.

14:00-14:30 Кыайыылаахтары уонна призердары наҕараадалааһын.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *

двадцать + 10 =