От ыйын 31 күнүн – Саха тустуутун өрөгөйүн күнүнэн билинэргэ!

// Суруллубукка сэҥээрии

Спорт бэтэрээнэ Роман Егоров “Туймаада” хаһыакка “Ааттаахтарбыт ахтыллыахтаахтар” уонна “Өйдөбүнньүк наада” диэн суруйууларыгар кылгастык бэйэм санаабын этиэхпин баҕардым. Бастатан туран, Роман Романович маннык, саха спордугар бэлиэ суолу-ииһи хаалларбыт дьон ааттарын үйэтитиигэ анаан суруйууларын биһириибин. Сөптөөх уонна сиэрдээх дии саныыбын. Маны тустаах салайааччылар болҕомтоҕо ылан, олоххо киллэрэллэрэ буоллар…

Кырдьык, эһиилги 2021 сыл – Саха сирин спорка олоҕор ураты сыл. Олортон биирдэстэрэ, Монреаллааҕы Олимпийскай оонньууларга саха тустуутун өрөгөйүн 45 сыла. Манан сибээстээн, ааптар – ити сыл 70 сааһын туолар Александр Николаевич Ивановка уонна Монреаллааҕы Олимпиада чемпиона Павел Павлович Пинигиҥҥэ – Саха Республикатын бочуоттаах гражданиннара диэн үрдүк ааттары иҥэрэр хайаан да наада диирин кытта толору сөбүлэһэбин. Бу кэрэ бэлиэ түгэн – ССРС, РСФСР, Саха АССР үтүөлээх тренерэ Дмитрий Петрович Коркин улууканнаах кыайыыта! Манна сыһыары тутан эттэххэ, улуу тренербит олоҕун аргыһа Александра Семеновна Коркинаны ханнык да түгэҥҥэ умнарбыт табыллыбат. Ытыктабыллаах кырдьаҕаһы куруук көрө-истэ, көмөлөһө сылдьыахха наада.

Кимтэн да, ханнык даҕаны киһититтэн тутулуга суох, төрөөбүт республикаларыгар, дойдуларыгар сүҥкэннээхэй үтүөнү оҥорбут дьоммутун умнуо суохтаахпыт. Кинилэри кэриэстиир, чиэстиир, бэлиэтиир, ааттарын үйэтитэр ытык иэстээхпит. Онон ити Роман Егоров этиитин мин өйүүбүн. 1976 сыллааҕы, Монреаллааҕы Олимпиадаҕа бөҕөстөрбүт кыайыыларын сыл аайы от ыйын 31 күнүгэр чиэстиир, бэлиэтиир өйдөбүнньүк күн оҥорор сөптөөх дии саныыбын.

Дьэ, ол хайдах буолуохтааҕын сүбэлэһиэххэ сөп. Өйдөбүнньүк миитин дуу, ахтыы киэһэтэ дуу, биитэр атын ханнык эмэ тэрээһин. Хаһыаттарга ахтыылар, санаалар, оттон радиоҕа, телевизорга онно сыһыаннаах биэриилэр баар буолуохтарын сөп.

Биирдэ ылан көрдөххө, олимпиецтарбыт туһунан элбэхтик суруллар-кэпсэнэр, кинилэр тустарынан кинигэлэр тахсаллар даҕаны, эдэр ыччаттарбыт Роман Дмитриеви үчүгэй аҕайдык билбэттэриттэн киһи хомойор. Итини мин үөһэттэн мээнэ ойутан ылан эппэппин. Олимпиец Александр Иванов, СР Спорка киинин дириэктэрэ Леонид Спиридонов уо.д.а. ити туһунан хаста да этэн тураллар. Ол курдук, хас оскуола, хас спортивнай саала ахсын саха омугу аан бастаан аан дойдуга дорҕоонноохтук биллэрбит биһиги аатырбыт тустууктарбыт уонна улуу тренербит Д.П. Коркин хаартыскалара, мэтириэтэрэ баар буолалларын ситиһиэхтээхпит. Оҕолорго, ыччаттарга кинилэр тустарынан өссө күүскэ сырдатыахтаахпыт, көрдөрүөхтээхпит.

Аны билигин саха киинэтин таһыма үрдээн иһэр. Манан сибээстээн, бастакы олимпийскай чемпиоммут Роман Михайлович Дмитриев аатынан уус-уран киинэ оҥоһуллан тахсара буоллар дии саныыбын. Маны биир эмэ режиссер ылсан үлэлиэ этэ. Уопсайынан, маннык кэскиллээх, инникилээх этиини Саха Республикатын салалтата, Спорка уонна Үөрэххэ министиэристибэлэрэ, Тустууга федерацията өйүөхтэрин, көҕүлүөхтэрин баҕарабын.

Итиэннэ ааптар, үбүлүөйү көрсө олимпиецтарга аналлаах музей-ураһаны тутарга ыҥырыыта – саамай сөптөөх.

Петр ПАВЛОВ.

 

От ыйын 31 күнүн – Саха тустуутун өрөгөйүн күнүнэн билинэргэ!: 2 комментария

  1. Тихонов Петр Максимович

    Бэрт солун,бэлиэр үйэ анара буолан эрэр,история.
    Олох салгыы барар,үйэ, көлүөнэ уларыйар.
    Ол барыта,ордук ситиһии хайдах баарынан,хайдах ситиһиллибитинэн холобур буолар гына үйэтиллиэхтээх,суолта бэриллиэхтээх

Добавить комментарий

Ваш адрес email не будет опубликован. Обязательные поля помечены *

14 − 2 =