Куонкурус кыайыылааҕынан Айсен Молуков буолла!

Эрдэ иһитиннэрбиппит курдук, көҥүл тустууга Россия чемпионатыгар сибээстээн, үгэс быһыытынан тустууну таптааччыларга анаан Инстаграмҥа @sakhasport_news страницабытыгар куонкурус тэрийбиппит. Онно, 34 киһи бэйэтин билгэтинэн тургутуста.  

Куонкуруспут бастакы ыйытыыта “Ыйааһыннарынан чемпионнары ааттааҥ”, иккис ыйытыыта “Саха бөҕөстөрүттэн бириистээх миэстэҕэ кимнээх киириэхтэрэй?”, диэн этэ. Санатан эттэххэ, хас сөптөөх хоруй ахсын биирдии очукуо ааҕылынна. Тэҥнэһии түгэнигэр, ким бэйэтин сылыгын урут ыыппыт – ол инники тахсар диэн хаһан даҕаны халбаҥнаабат быраабылалаахпыт.

Спорт тылынан эттэххэ, куонкуруска састаап син биир, били Наро-Фоминскайдааҕы чемпионат курдук күүстээх этэ. “Дьулурҕан” куонкурустарын араас сылларга кыайыылаахтара: Валерий Гаврильев, Иван Барашков, Иван Рожин, Василий Алексеев, Андрей Александров, Айсен Молуков бары бааллара.

Түмүккэ, чемпионат кыайыылаахтарын тэҥнээн көрүүнэн, түөрт киһи тэҥ очукуону хомуйда. Ол курдук, Айсен Молуков (6 №-дээх кыттааччы), Эрхаан Константинов (13), Евгений Дьячковскай (16), Василий Алексеев (25) – алталыы очукуону хомуйдулар. Маннык түгэҥҥэ, куонкурус балаһыанньатын быһыытынан, бэйэтин хоруйун эрдэ ыыппытынан, кыайыылааҕынан Айсен Молуков буолар. Кыайыылааҕы эҕэрдэлиибит уонна тустууну дириҥник билэрин иһин сүгүрүйэбит!

Киниэхэ эрдэ эппиппит курдук, саҥа бэчээттэнэн тахсыбыт, көҥүл тустууга икки төгүллээх олимпийскай чемпион Сослан Андиев туһунан кинигэ сүрүн бириис быһыытынан туттарыллыаҕа. Санатан эттэххэ, буолан ааспыт Россия түһүлгэтигэр чемпионнарга барыларыгар маннык кинигэ туттарылынна. Онон Айсен Молуков биһиэхэ син биир чемпион!

Айсен биһиги куонкуруспутугар иккис төгүлүн субуруччу бастаата. Ол курдук, былырыын күһүн Нур-Султаҥҥа ыытыллыбыт көҥүл тустууга аан дойду чемпионатыгар 63 (!) киһиттэн кыайыылааҕынан тахсыбыта.

Ити курдук, куонкуруска Иван Барашков, Николай Оконешников, Кирилл Павлов, Куочук, Изот Неустроев, Николай Борисов, Анастасия, Егор Клепандин, Айсен Александров – биэстии очукуоламмыттарын бэлиэтиэххэ сөп.

Түмүккэ, куонкуруска кыттыбыт дьоҥҥо барыларыгар барҕа махталбытын тиэрдэбит итиэннэ инникитин даҕаны маннык, биһиги ыытар тэрээһиннэрбитигэр көхтөөхтүк кытталларыгар баҕарабыт.

Петр ПАВЛОВ.

 

 

Добавить комментарий

Ваш e-mail не будет опубликован. Обязательные поля помечены *