Нарофоминскай-2020: Чемпионат Дагестан кыайыытынан түмүктэннэ

Нарофоминскайга ыытыллан түмүктэммит көҥүл тустууга Россия чемпионата Дагестан Республикатын хамаандатын аһара баһыйыытынан түмүктэннэ. Ол курдук, бүтэһик күҥҥэ кинилэр түөрт финалтан – үһүгэр кыайдылар. Онон барыта аҕыс кыһыл көмүс мэтээллэннилэр. Ону тэҥэ түөрт үрүҥ көмүс, аҕыс боруонса мэтээли ылары ситистилэр.

Бүтэһик күн биһигиттэн 92 кг ыйааһыҥҥа Ньургун Сергин туһунна. Санааҕа, баҕар бастакы утарсааччытын кыайыа диэн эрэллээх этибит эрээри, уолбут тулуспата. Дагестанец Рамазан Шабановка очукуонан ыраастык хоттордо (0:10). Тустуутун көрдөххө, урукку бастыҥ таһымыгар киирбэтэх, атахха киллэрииттэн сатаан көмүскэммэтэ. Итинэн, биир тылынан, тустууктарбыт пандемия кэмигэр сөптөөх дьарыгы барбатахтар диэн санааҕа кэлэҕин. Чэ, ити туһунан аныгыскы суруйууга сырдатыам.

Суруйуу барыта саас-сааһынан баран иһэр. Бастаан наар иһитиннэрии, онтон салгыы дьүүллэһии, ырытыһыы, санаа атастаһыыта… Барыта бэрээдэк быһыытынан.

Ол быһыытынан эттэххэ, бөөлүүн түүн абытай финаллар буоллулар. Били, бэҕэһээҥҥи суруйуубар, Найфоновтаах Куруглиевтан хайалара кыайыай? Абдулрашид Садулаевы ким эмэ тохтотуо дуо? Мурадин Кушхов ханнык таһымҥа сылдьара буолла, диэн ыйытыыларбар хоруйу ыллым. Итини мин, хапсыһыылары Ютуб-ханаалга быһа биэриини көрбүппүттэн этэбин.

86 кг ыйааһыҥҥа эрдэттэн сэрэйиллибитин да курдук, финалга осетин Артур Найфонов уонна дагестананец Даурен Куруглиев таҕыстылар. Бу бөҕөстөр күөн көрсөн илин былдьаспыттара хас да сыл буолла. Хардарыта-таары кыайсаллар. Манна даҕатан эттэххэ, бу ыйааһыҥҥа биир күүстээх тустуук Владислав Валиев кыттыбата.

Наһаа тыҥааһыннаахтык барбыт хапсыһыыга, бу иннинэ иккиэн биирдии сэрэтиилээх сырыттахтарына, биир түгэҥҥэ көбүөр кытыытыгар эрэ анньан таһаабытын быһыытынан, кыайыылааҕынан Даурен Куруглиев буолла. Ахсаан 2:1.

Бу хапсыһыыга Найфонов икки төгүл утарсааччытын атаҕыттан ылбытыгар, “сыыһа тутуу” диэн судьуйа араарын кэбиспитэ төһө оруннааҕын ыйытыахпын баҕарабын. Манна судьуйалааһыҥҥа туох эрэ куомуннаһыы баар дуу диэн саарбахтыы санаатым. Эһиги, ааҕааччылар туох дии саныыгыт?

“Нуучча таанката” диэн ааттаммыт олимпийскай чемпион Абдулрашид Садулаев (97 кг) үчүгэй таһымыгар киирбэккэ да сылдьан, кыайыыны ситистэ диэххэ сөп. Финалга киниэхэ эдэрдэргэ аан дойду күрэхтэһиитин кыайыылааҕа, осетин Асланбек Сотиев маҥнай утаа, атахтаан умса көтөн, дьоһун утарсыыны оҥоруох курдук буолбута эрээри, Садулаев тустар таһыма улахана бэрт буолан, салгыы тустууга эмтэр эмэн, кыайыыны эрэллээхтик ситистэ. Сотиев да үчүгэй өйдөбүлү хаалларда.

Оттон биир сыл тустууну таптааччылар харахтарын далыттан сүтэ сылдьыбыт Россия экс-чемпиона Мурадин Кушхов табыллан тустубата. Биир эрэ эргиир тустан хаалла. Халыҥаан, бытааран хаалбыт. Сэрэйдэххэ, ноҕуруускатын аччаппыт.

Түмүктээн эттэххэ, Дагестан бу чемпионакка барыта 20 мэтээллээх (8 кыһыл көмүс, 4 үрүҥ көмүс, 8 боруонса), Хотугу Осетия 12 мэтээллээх (2 кыһыл көмүс, 5 үрүҥ көмүс, 5 боруонса). Ити курдук, Кабардино Балкария, Красноярскай 2-лии, Чечня, Бурятия, Санкт-Петербург, Брянск 1-дии мэтээллээхтэр.

Чемпионат үһүс күнүн финалларын түмүгэ:                                            

86 кг: 1. Даурен Куруглиев (Дагестан), 2. Артур Найфонов (Хотугу Осетия), 3. Магомед Рамазанов, 3. Арсенали Мусалалиев (иккиэн – Дагестан), 5. Магомедшариф Биякаев, Абдулмуслим Темирбулатов (иккиэн – Дагестан).

92 кг: 1. Алихан Жабраилов, 2. Магомед Курбанов (иккиэн – Дагестан), 3. Батырбек Цакулов (Хотугу Осетия), 3. Анзор Уришев (Кабардино-Балкария), 5. Гаджимагомед Нажмудинов, Рамазан Шабанов (иккиэн – Дагестан).

97 кг: 1. Абдулрашид Садулаев (Дагестан), 2. Асланбек Сотиев, 3. Асланбек Газзаев (иккиэн – Хотугу Осетия), 3. Эрик Джиоев (Красноярскай), 5. Расул Магомедов, Шамиль Мусаев (иккиэн – Дагестан).

125 кг: 1. Алан Хугаев (Хотугу Осетия), 2. Шамиль Шарипов (Дагестан), 3. Анзор Хизриев (Санкт-Петербург), 3. Виталий Голоев (Хотугу Осетия), 5. Ацамаз Теблоев (Хотугу Осетия), Сайпудин Магомедов (Дагестан).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *