Нарофоминскай-2020: Абдулрашид Садулаевы ким эмэ тохтотуо дуо?

Көҥүл тустууга Россия чемпионата түмүктүүр түһүмэххэ таҕыста. Билиҥҥитэ алта ыйааһынтан – биэһигэр Дагестан хамаандата чемпионнаата, биири Хотугу Осетия тутан хаалла. Аны бүгүн түөрт үрдүкү ыйааһыҥҥа (86, 92, 97, 125) чемпионнар ааттара биллиэҕэ.  

Хомойуох иһин, биһиги хамаандабыт бөҕөстөрө мөлтөхтүк туһуннулар. Бара сатаан икки киһибит: Петр Константинов (57 кг) уонна Дмитрий Аксенов (61 кг) бэһис миэстэҕэ таҕыстылар эрэ диир кыахтаахпыт. Ол даҕаны, тустууну таптааччылары астыннарбат. Ханныгын да иһин, тустуубутугар улахан болҕомто ууруллан, балаһыанньаны уларытар миэрэлэр ылыллалларын кэтэһэбит. Тустууктарбыт кыттыыларын суруналыыс хараҕынан ырытыыны биһиги http://dzulurgan.ru сайтпытыгар бу күннэргэ кэтэһиҥ.

Бүгүн биһигиттэн 92 кг ыйааһыҥҥа Ньургун Сергин тустуоҕа. Кини утарсааччыта – 20 саастаах спорт маастара Рамазан Шабанов (Дагестан). Ханнык да түгэҥҥэ, уолбутугар ыалдьабыт!

Бу ыйааһыҥҥа барыта уон биэс бөҕөс суруттарбыт. Кинилэр ортолоругар Алихан Жабраилов, Анзор Уришев, Батырбек Цакулов, Магомед Курбанов курдук күүстээхтэр бааллар. Сэрэйдэххэ, мэтээл иһин сүрүннээн кинилэр киирсэллэрэ буолуо.

Атын да ыйааһыннарга тыҥааһыннаах хапсыһыылар ыытыллыахтара. Найфоновтаах Куруглиевтан хайалара кыайыай? Абдулрашид Садулаевы ким эмэ тохтотуо дуо? Мурадин Кушхов ханнык таһымҥа сылдьара буолла?

Чемпионат иккис күнүн финалларын түмүгэ:

70 кг: 1. Чермен Валиев, 2. Давид Баев (иккиэн – Хотугу Осетия), 3. Руслан Жендаев (Красноярскай), 3. Курбан Шираев (Дагестан).

74 кг: 1. Разамбек Жамалов (Дагестан), 2. Хетик Цаболов, 3. Заурбек Сидаков (иккиэн – Хотугу Осетия), 3. Тимур Бижоев (Кабардино-Балкария).

79 кг: 1. Ахмед Усманов (Дагестан), 2. Гаджимурад Алихмаев (Брянскай), 3. Гаджи Набиев, 3. Аманула Гаджимагомедов (иккиэн – Дагестан).

Санатан эттэххэ, чемпионат бүгүн биһиги бириэмэбитинэн эмиэ 17:00 чаастан саҕаланар. Оттон финаллар түүн үөһэ буолуохтара. Тустууну Ютуб-ханаалга көрүөххэ сөп.        

Петр ПАВЛОВ.

 

Добавить комментарий

Ваш e-mail не будет опубликован. Обязательные поля помечены *