Нарофоминскай-2020: Хобдох хотторуулар

Көҥүл тустууга Россия чемпионатын иккис күнүгэр көбүөргэ үс уолбут таҕыста. Чемпионат көрөөччүтэ суох буолар диэн баран, быһа биэриини көрдөххө, трибунаҕа бүгүн бэҕэһээҥҥитээҕэр быдан элбэх киһи мустубут. Хапсыһыылар үс көбүөрүнэн ыытылыннылар.    

70 киилэҕэ, норуоттар икки ардыларынааҕы кылаастаах спорт маастара Виктор Рассадин сэрэбиэй быһыытынан бастаан Анзор Ионовы (Карачаево-Черкесия) кытта тустуохтаах этэ. Ионов көбүөргэ таҕыста эрээри, судьуйалар быһаарыыларынан, трикота быраабылаҕа сөп түбэспэтинэн, кыайыы Виктор Рассадиҥҥа тустуута суох быһа бэрилиннэ.

Иккис эргииргэ Виктор Рассадин чечен Имам Аджиевы кытта туһунна уонна 7:9 ахсаанынан хотторон кэбистэ. Манна биһиги бөҕөспүт бастакы түһүмэххэ 4:0 ахсаанынан сабырыйтарда, онтон иккискэ киирэн үлэлии сатаата да, сиппэтэ. Биир түгэҥҥэ Аджиев киһибитин сиһиттэн ылан тиэрэ быраҕан түөрт баалы биирдэ олордон ылбыта быһаарыылаах буолла. Хапсыһыы түгэнигэр кини атаҕар эчэйии ылан, быраастана сырытта.

Санатан эттэххэ, Имам икки сыллааҕыта массыына саахалыгар түбэһэн, эчэйии ылан баран, көбүөргэ бу иккистээн эргилиннэ. Урукку кэмҥэ Иван Ярыгин турнирын уонна Россия чемпионатын призера буола сылдьыбыта.

Салгыы күрэхтэһиигэ Имам Аджиев тувин Арбак Сатка ыраастык хоттордо. Онон Рассадин туһугар суолбут бүөлэннэ. Туораттан көрдөххө, Виктор урукку тустар таһымыгар киирэ илик эбит.

74 кг ыйааһыҥҥа кыттыбыт уолаттарбыт, Константин Власов – Сайпулла Алиболатовка (Дагестан) ыраастык, оттон Тимур Николаев – Магомед Курбаналиевка (Дагестан) 0:5 ахсаанынан хоттортоон кэбистилэр. Итинэн, биирдии эргиир эрэ тустан хааллылар.

Онон бүгүн тустубут бөҕөстөрбүт үһүөн туораатылар. Аны сарсын 92 киилэҕэ Ньургун Сергин көбүөргэ тахсыаҕа.

Чемпионат иккис күнүн финалыгар көрсүөхтэрэ:

70 кг Давид Баев – Чермен Валиев (иккиэн Хотугу Осетия)

74 кг Хетаг Цаболов (Хотугу Осетия) – Разамбек Жамалов (Дагестан)

79 кг Ахмед Усманов (Дагестан) – Гаджимурад Алихмаев (Брянскай).

Финаллар уонна үһүс миэстэлэри ылар иһин хапсыһыылар бырагыраама быһыытынан биһиги бириэмэбитинэн түүн 24:00 чаастан саҕаланаллар. Ол иннинэ чемпионаты үөрүүлээхтик аһыы ыытыллыаҕа.  

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *