Нарофоминскай-2020: Мэтээлтэн маттыбыт

Россия көҥүл тустууга чемпионатын бастакы финаллара буоллулар. Хомойуох иһин, биһиги бөҕөстөрбүт мэтээлгэ тиксибэтилэр.

Финалга тахсыбыт аан дойду икки төгүллээх чемпиона Завур Угуевка хотторбут Петр Константиновпыт (57 кг) уоскутар бөлөххө киирэн бэйэтин киһитэ Алексей Копыловы кыайда. Оттон боруонса мэтээл иһин киирсиигэ Ярыгин турнирын кыайыылааҕа буола сылдьыбыт, Европа уонна Россия чемпионаттарын призера чечен Муслим Садулаевка ахсаанынан хотторон кэбистэ. Онон бэһис буолла.

Оттон Россия чемпионатын боруонса призера буола сылдьыбыт Дмитрий Аксенов (61 кг) уоскутар бөлөххө Ставропольеттан кыттар дагестанец Тамерлан Караевы (уруккута аатырбыт тустуук Руслан Караев төрөппүт уола) хоппута. Үһүс миэстэ иһин киирсиигэ бэрт тыҥааһыннаах тэҥ хапсыһыыга Дмитрий дагестанец Ибрагим Абдурахмановка ахсаанынан сабырыйтаран кэбистэ. Онон эмиэ бэһис буолла.

Манна даҕатан эттэххэ, Абдурахманов аҕыйах сыллааҕыта манна Дьокуускайга кэлэн олимпийскай чемпион Роман Дмитриев кэриэһигэр эдэрдэргэ норуоттар икки ардыларынааҕы турнир финалыгар биһиги Константин Капрыновпытын кыайан турардаах.

Бу күн үс финал буолбутугар – үһүөннэригэр дагестаннар күннээтилэр. Ити сэрэйиллэр да этэ. Оттон биһиги бөҕөстөрбүт муҥ саатар боруонса мэтээли кытаахтаан ылалларыгар баҕарбыппыт – туолбата. Чемпионат салҕанан бара турар. Аны түөрт уолбут тустуохтаах. Бу суруйуулар – спорду, тустууну таптааччыларга анаммыт иһитиннэриилэр. Түмүк санаа, ырытыы чемпионат кэнниттэн хайаан да баар буолуо. Биһиги сайтпытын кэтээн көрө сылдьыҥ.

Чемпионат бастакы финалларын түмүгэ:

57 кг: 1. Заур Угуев (Дагестан), 2. Азамат Тускаев (Хотугу Осетия), 3. Ахмед Идрисов (Дагестан), 3. Муслим Садулаев (Чечня), 5. Петр Константинов (Саха сирэ), 5. Рамиз Гамзатов (Дагестан).

61 кг: 1. Абасгаджи Магомедов, 2. Рамазан Ферзалиев, 3. Ибрагим Абдурахманов (үһүөн – Дагестан), 3. Жаргал Дамдинов (Бурятия), 5. Дмитрий Аксенов (Саха сирэ), 5. Ибрагим Ильясов (Калининград).

65 кг: 1. Гаджимурад Рашидов, 2. Ахмед Чакаев (иккиэн – Дагестан), 3. Алан Гогаев (Хотугу Осетия), 3. Загир Шахиев (Дагестан), 5. Муслим Сайдулаев (Чечня), Артур Бадтиев (Хотугу Осетия).

Санатан эттэххэ, чемпионат бүгүн биһиги бириэмэбитинэн эмиэ 17:00 чаастан саҕаланар. Биһигиттэн Виктор Рассадин (70 кг), Константин Власов (74 кг), Тимур Николаев (74 кг) көбүөргэ тахсыахтара. Оттон финаллар түүн үөһэ буолуохтара. Тустууну Ютуб-ханаалга көрүөххэ сөп.        

Петр ПАВЛОВ.

 

Добавить комментарий

Ваш e-mail не будет опубликован. Обязательные поля помечены *