Нарофоминскай-2020: Чемпионат иккис күнүгэр үс уолбут тустуоҕа

Көҥүл тустууга эр дьоҥҥо Россия чемпионатын иккис күнүгэр 70, 74, 79 кг ыйааһыннаахтар күөн көрсүөхтэрэ. Бу ыйааһыннарга биһиги республикабытыттан кимнээх баалларый, кинилэр кимнээҕи кытта тусталларый?  

Ол курдук, 70 киилэҕэ – 26 бөҕөс сэрэбиэйи ааспыт. Манна биһигиттэн норуоттар икки ардыларынааҕы кылаастаах спорт маастара, Россия чемпионатын үс төгүллээх призера Виктор Рассадин баар. Кини иккис бөлөххө бастаан Карачаево-Черкесия маастара Анзор Ионовы кытта тустар буолбут. Манна хайалара кыайбыта, салгыы күрэхтэһиигэ Мурат Джакупов (КЧР) – Имам Аджиев (Чечня) кыайыылааҕын кытта тустуоҕа.

Бу ыйааһыҥҥа үөһээ бөлөххө Чермен Валиев (Хотугу Осетия), Сайын Казырык (Тыва), Руслан Жендаев, Мурад Нухкадиев (иккиэн Красноярскайтан), Анзор Закуев (Крым) курдук күүстээхтэр бааллар. Оттон аллараа бөлөххө аан дойду чемпиона Давид Баев (Хотугу Осетия), Европа чемпиона Курбан Шираев (Дагестан), биһиги Виктор Рассадиммыт киирбиттэр.

Оттон 74 киилэҕэ бүтэһик түгэҥҥэ Саха сирин хамаандатын састаабыгар киирбит Тимур Николаев сэрэбиэй быһыытынан бастаан спорт үтүөлээх маастара Магомед Курбаналиевы (Дагестан), Константин Власов – Сайпулла Алиболатовы (Дагестан) кытта тустар буолбуттар.

Бу ыйааһыҥҥа 24 кыттааччы баар.

Манна чулуулартан аан дойду араас сылларга чемпионнара Заурбек Сидаков, Хетаг Цаболов (иккиэн Хотугу Осетияттан), Магомед Курбаналиев, Магомедрасул Газимагомедов (иккиэн Дагестантан) итиэннэ Тимур Бижоев (Краснодар), Никита Сучков (Красноярскай), Разамбек Жамалов (Дагестан) курдук күүстээхтэр бааллар. Сэрэйдэххэ, мэтээл иһин сүрүннээн кинилэр киирсэллэрэ буолуо. Чэ, ону көбүөр быһаарыа.

Манна биири бэлиэтиэххэ сөп. Бу медицинскэй хонтуруолу, ыйааһыннаныыны ааһан баран, сэрэбиэй тардыытын түмүгүнэн оҥоһуллубут сетка. Оттон сарсын (алтынньы 17 күнүгэр) күрэхтэһии иннинэ иккис ыйааһыннаныы буолар. Дьэ, онно дьиҥнээх састаап бүтэһиктээхтик чопчуланыа.

Санатан эттэххэ, чемпионат бүгүн биһиги бириэмэбитинэн эмиэ 17:00 чаастан саҕаланар. Оттон финаллар түүн үөһэ буолуохтара. Тустууну Ютуб-ханаалга көрүөххэ сөп.         

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *