Нарофоминскай-2020: Саатар боруонса мэтээл баҕалаах буолла

Нарофоминскайга саҕаламмыт көҥүл тустууга Россия чемпионатыгар саамай эрэнэ кэтэспит ыйааһыннарбытыгар – 57, 61 кг уолаттарбыт үөтэлээбэтилэр. Арай, боруонса мэтээлгэ чарапчыланар хапсыһыыларга икки уолбут киирсэриттэн, бэйэбитин уоскутуна сатыырбытыгар тиийдибит. Мантан салгыы бөҕөстөрбүт хайдах киирсибиттэрин иһитиннэрэбит.  

57 киилэҕэ Петр Константинов – Завур Угуевка (Дагестан) 0:10, Михаил Иванов – Гасангусейн Бадрудиновка (Дагестан) 6:6 ахсааҥҥа (манна саастаах, уопуттаах бөҕөс төһө да хотторбутун үрдүнэн, бүтэһиккэ диэри харса суох киирсибитин бэлиэтиир оруннаах, хомойуох иһин атыттары инньэ дииргэ киһи тыла өҕүллүбэт), Георгий Окороков – Артур Чебодаевка (Красноярскай) 2:5 ахсаанынан хоттортоон кэбистилэр.

Бу ыйааһыҥҥа кыттар бөҕөстөрбүтүттэн бастакы эргииргэ Алексей Копылов эрэ утарсааччытын кыайда. Кини дагестанец Башир Магомедовы 6:4 ахсаанынан хотто. Ол эрээри, салгыы күрэхтэһиигэ Угуевка тулуспата, очукуонан ыраастык хоттордо.

Аны кэтиирбит диэн арай, Петр КонстантиновАлексей Копыловы кыайан, чечен Муслим Садулаевтыын үһүс миэстэни былдьаһыаҕа.

Иккис ыйааһыҥҥа кыттааччыларбыт эмиэ үөрдүбэтилэр. Петр Павлов – Федор Балтуевка (Иркутскай) күппүлүү барда. Ньургун АлександровтаахСемен Владимиров бэйэ-бэйэлэрин кытта киирсиилэригэр, кыайыылааҕынан Александров буолла (3:2). Салгыы күрэхтэһиигэ Александров иэмэ-дьаама суох хапсыһыыга бурят Жаргал Дамдиновка 4:8 ахсаанынан хоттордо.

Дьиҥэ уолбут итиннэ кыайыан да сөптөөҕө, бүтэһиккэ диэри бэйэтин өйүн-санаатын хомуммакка, эһэ хаанын киллэрбэккэ, дэбигис баҕайытык хотторон кэбиһэн, “ыалдьааччылары” хомотто.

Дмитрий Аксенов – Абасгаджи Магомедовка (Дагестан) ыраастык баран хаалла. Онон балаһыанньа быһыытынан, утарсааччыта финалга тахсыбытынан, Аксенов “уоскутар” бөлөххө киирдэ. Онно кини дагестанец Тамерлан Караевы (Ставропольскай кыраай) 3:1 хотон, үһүс миэстэ иһин Ибрагим Абдурахмановы (Дагестан) кытта киирсэр буолла.

Мэтээллэр иһин тустуохтара:     

57 кг финал: Заур Угуев (Дагестан) – Азамат Тускаев (Хотугу Осетия-Алания)

Боруонса мэтээл иһин: Петр Константинов (Саха сирэ) – Муслим Садулаев (Чечня).

Боруонса мэтээл иһин: Ахмед Идрисов (Дагестан) – Рамиз Гамзатов (Дагестан).

61 кг финал: Рамазан Ферзалиев (Дагестан) – Абасгаджи Магомедов (Дагестан)

Боруонса мэтээл иһин: Ибрагим Ильясов (Калининград) – Жаргал Дамдинов (Бурятия).

Боруонса мэтээл иһин: Дмитрий Аксенов (Саха сирэ) – Ибрагим Абдурахманов (Дагестан).

65 кг финал: Гаджимурад Рашидов (Дагестан) – Ахмед Чакаев (Чечня)

Боруонса мэтээл иһин: Алан Гогаев (Хотугу Осетия-Алания) – Муслим Сайдулаев (Чечня).

Боруонса мэтээл иһин: Артур Бадтиев (Хотугу Осетия-Алания) – Загир Шахиев (Дагестан).

Финаллар уонна үһүс миэстэлэри ылар иһин хапсыһыылар биһиги бириэмэбитинэн түүн 24:00 чаастан саҕаланаллар.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *