Нарофоминскай-2020: Уолаттарбыт кимнээҕи кытта тустар буоллулар?

Дьэ, өр күүппүт күммүт үүннэ. Бүгүҥҥүттэн Нарофоминскай куоракка көҥүл тустууга эр дьоҥҥо Россия чемпионата саҕаланар. Бастакы күн тустуу үс ыйааһыҥҥа буолуоҕа. Кыайыылаахтар уонна призердар, аныгы быраабыла быһыытынан нөҥүө күнүгэр буолбакка, тута биллиэхтэрэ. Ол аата, ыйааһыннар биир күнүнэн быһаарыллыахтара. Оттон бөөлүүн 57, 61, 65 кг ыйааһыннарга сэрэбиэй ыытылынна. Кылгастык бэйэбит уолаттарбыт тустар ыйааһыннарын билиһиннэриэхпин баҕардым.

Бастакы ыйааһыҥҥа  

57 киилэҕэ 16 кыттааччы киирбит. Манна сыһыары тутан эттэххэ, буряттартан бу ыйааһыҥҥа соҕотох кыттааччылара Андрей Гатаулин син эмиэ атын биир дойдулаахтара Александр Богомоев, Алдар Балжинимаев, Тамир Гармаев, Булат Батоев курдук ковидка аналиһа мөлтөх буолан, чемпионакка киллэриллибэтэ.

Бу ыйааһыҥҥа сэрэйдэххэ аан дойду икки төгүллээх чемпиона, дагестанец Завур Угуевы уонна Европа чемпиона, осетин Азамат Тускаевы араарбыттар, ол аата, биирэ – үөһээ, иккиһэ – аллараа бөлөххө киирбит.

Манна биһиги түөрт уолбут кыттар. Сэрэбиэй быһыытынан үөһээ бөлөххө Петр Константинов – Завур Угуевы, Алексей Копылов – соторутааҕыта эдэрдэргэ Россия күрэхтэһиитигэр үһүс буолбут Башир Магомедовы (Дагестан), Михаил Иванов – Россия былырыыҥҥы чемпионатын боруонса призера Гасангусейн Бадрутдиновы (Дагестан), аллараа бөлөххө Георгий Окороков – Сибиир быйылгы чемпиона Артур Чебодаевы (Красноярскай) кытта тустар буолбуттар.

Мантан сылыктаатахха, үөһээ бөлөххө уолаттарбытыттан мин тус санаабар, биирдэрэ эмэ боруонса мэтээл иһин киирсиэх курдук. Бу бөлөххө өссө, Россия былырыыҥҥы чемпионатын үрүҥ көмүс призера чечен Муслим Садулаевы ахсаантан быраҕар табыллыбат.

Оттон иккис бөлөххө эмиэ састаап биир тэҥ күүстээх диэххэ сөп: А.Тускаев, А.Идрисов, Россия былырыыҥҥы чемпиона Р.Гамзатов. Уолаттарга Европа күрэхтэһиитин кыайыылааҕа буола сылдьыбыт Амма ыччата Георгий Окороков хонноҕо аһылыннаҕына, табыллан тустуон сөп.

Иккис ыйааһыҥҥа

61 кг ыйааһыҥҥа 18 бөҕөс суруттарбыт. Манна даҕатан эттэххэ, чемпионаты тэрийээччилэр бастаан эппит бэйэлэрин балаһыанньаларын уларыттылар. Ыйааһын ахсын хайаан даҕаны 16-лыы кыттааччы буолуохтаах диэннэрин тутуспатылар. Эбии, олохтоох федерациялар туруорсууларынан, 30-туу тыһ. солк. төлөөбүт бөҕөстөрү киллэртээтилэр.

Бу ыйааһыҥҥа, Петр Павлов – соторутааҕыта чуолаан Нарофоминскайга буолбут Россия эдэрдэргэ күрэхтэһиитигэр 65 киилэҕэ бастаабыт бурят Федор Балтуевтыын (Иркутскай), Семен Владимиров – Ньургун Александровтуун, Дмитрий Аксенов – Абасгаджи Магомедовтыын (Дагестан) тустуохтара. Манна Павлов, Владимиов, Александров – үөһээ, оттон Аксенов – аллараа бөлөххө түбэспиттэрин санатар тоҕоостоох.

Бу да ыйааһыҥҥа, саатар үһүс миэстэҕэ чарапчыланар кыах баар диэн этиэххэ сөп. Барыта тустууктартан бэйэлэриттэн тутулуктаах.

Чэ, ити курдук, сэрэбиэйи кылгастык билиһиннэрдэххэ. Хайдах да буолбутун иһин, сэрэбиэйи “табыллыбыт-табыллыбатах” диэбэккэ, уолаттарбыт туста тиийэн баран тустуохтаахтар, этэргэ дылы, кыайыы туһугар өлөллөрүнэн мөхсүөхтээхтэр.

Санатан эттэххэ, чемпионат бүгүн биһиги бириэмэбитинэн 17:00 чаастан саҕаланар. Оттон финаллар түүн үөһэ буолуохтара. Тустууну Ютуб-ханаалга көрүөхпүт. Онон эмиэ утуйар уубутун умнар күннэрбит үүннүлэр.         

Петр ПАВЛОВ.

 

Добавить комментарий

Ваш e-mail не будет опубликован. Обязательные поля помечены *