Нарофоминскай-2020: Былырыын хайдах этэй?

Былырыын сайын Аммаҕа, оруобуна Саха сирин норуоттарын VII спортивнай оонньууларын кэмигэр – Сочи куоракка көҥүл тустууга Арассыыйа чөмпүйэнээтэ ыытыллыбыта. Ити улахан таһымнаах түһүлгэҕэ биһиги 21 бөҕөспүт кыттыыны ылбыта. Ийэ дойдубут тэбэр сүрэҕэр – Москва куоракка олорон, тириэньэр Александр Софронов салалтатынан дьарыктанар Бүлүүттэн төрүттээх норуоттар икки ардыларынааҕы кылаастаах спорт маастара Михаил Иванов 57 киилэҕэ үһүс бириистээх миэстэҕэ тахсан, боруонса мэтээлинэн наҕараадаламмыта.

Саамай эрэммит киһибит Арыйаан Тютрин (57 кг) финал чиэппэригэр дагестанец Гасангусейн Батрутдиновтыын тустуутугар судьуйалар сыыһа сууттаан, уолбут хотторуулааҕынан ааҕыллыбыта. Кылаабынай судьуйа элбэх ахсааннаах дагестанецтар модьуйууларынан, онуоха диэри кыайан испит биһиги уолбутугар сэрэтии биэрэн, утарсааччытыгар биир, кыайыылаах очукуону аахпыта.

Маннык бөрүкүтэ суох түгэни утаран, биһиги хамаандабыт салайааччылара уонна тириэньэрдэр сиэрдээх быһаарыыны эрэйэн туруорса сатаабыттара да, судьуйалар бэйэлэрин сыыһаларын көннөрбөтөхтөрө.

Виктор Лебедев туруорсуутунан…

Виктор Лебедев Арассыыйа көҥүл тустууга сүүмэрдэммит хамаандатын кылаабынай тириэньэрэ Дзамболат Тедееви кытта көрсөн, чөмпүйэнээт кылаабынай тириэньэрин устарга уонна сиэрэ суохтук туоратыллыбыт Арыйаан Тютрин, сүүмэрдэммит хамаанда састаабыгар киирэригэр эбии кыахтары биэрэргэ дьүүллэспитэ.

Ол кэнниттэн ити сыыһа судьуйалааһын түмүгүнэн, Саха Өрөспүүбүлүкэтин Аҕа баһылыга Айсен Николаев Дзамболат Тедеевтиин төлөпүөнүнэн кэпсэтэ сылдьыбыта. Ол түмүгэр, 57 киилэҕэ – аан дойду чөмпүйүөнэ Заур Угуевы, Арассыыйа саҥа чөмпүйүөнэ Рамиз Гамзатовы (иккиэн дагестанецтар) уонна аан дойду Кубогын кыайыылааҕа Арыйаан Тютрины Польшаҕа ыытыллар Циолковскай аатынан норуоттар икки ардыларынааҕы турнирга ыытарга быһаарбыттара. Бу үс бөҕөстөртөн хайалара ити турнирга үрдүкү миэстэни ылар да – ол балаҕан ыйыгар Казахстаҥҥа буолар Олимпиадаҕа сүүмэрдиир аан дойду чөмпүйэнээтигэр барар быраабы ылыаҕа диэн буолбута.

Билэргит курдук, биһиги бөҕөспүт Польшаҕа Россия саҥа чемпионун чаҕылхайдык кыайан бастаабыта, онтон аан дойдуга ким барарын быһаарар хонтуруоллуур хапсыһыыга Угуевка хотторон кэбиспитэ.

Атын бөҕөстөрбүт хайдах тустубуттарай?

Өссө бу иннинээҕи Арассыыйа чөмпүйэнээтин түмүгүнэн, дойду сүүмэрдэммит хамаандатын састаабыгар сылдьар Виктор Рассадинтан, Эдуард Григорьевтан, Петр Павловтан, Дьулустан Булатовтан, Тимур Николаевтан үчүгэй тустууну күүппүппүт да, уолаттарбыт ити сырыыга үөрдүбэтэхтэрэ.

Арыйаан Тютрин, Петр Константинов, Яков Павлов, Айсен Потапов бэйэлэрин ыйааһыннарыгар уон күүстээхтэр ахсааннарыгар киирэн сэмэй көрдөрүүлэммиттэрэ.

Боруонса мэтээл хайдах ситиһиллибитэй?

Боротокуолтан көрдөххө, Сочи көбүөрүгэр Москва уобалаһын уонна Саха Өрөспүүбүлүкэтин аатыттан кыттар 30 саастаах Михаил Иванов бастаан дагестанец Магомед Газигандовы 9:2, онтон тувинец Белек-Оол Кужугеты 2:1, салгыы дагестанец Исмаил Гаджиевы 11:0 итиэннэ осетин Азамат Тускаевы 5:4 ахсаанынан кыайталаан баран, финалга тахсар иһин хапсыһыыга Рамиз Гамзатовка 4:6 хотторон кэбиспит.

Онтон боруонса мэтээл иһин киирсиигэ дагестанец Саид Газимагомедовы 4:2 ахсаанынан хоппут.

Манна сыһыары тутан эттэххэ, Михаил Иванов – Арассыыйа чөмпүйэнээтигэр ити иккис миэстэлэһиитэ. 2007 сыллаахха Москваҕа ыытыллыбыт чөмпүйэнээккэ 50 киилэҕэ иккис миэстэ буолан турар.

Бу сырыыга Нарофоминскайга дьэ хайдах буолар?

Петр ПАВЛОВ.

Арассыыйа чөмпүйэнээтин түмүк көрдөрүүтэ
Сочи, от ыйын 5-7 күннэрэ, 2019 сыл.

57 кг: 1. Рамис Гамзатов (Дагестан), 2. Муслим Садулаев (Чечня), 3. Гасангусейн Бадрутдинов (Дагестан), 3. Михаил Иванов (Москва-Саха сирэ).

61 кг: 1. Магомедрасул Идрисов (Дагестан), 2. Рамазан Ферзалиев (Дагестан), 3. Зелимхан Абакаров (Москва-Чечня), 3. Динислам Тахтаров (Дагестан).

65 кг: 1. Гаджимурад Рашидов (Дагестан), 2. Начын Куулар (Тыва-Красноярскай), 3. Юлиан Гергенов (Иркутскай), 3. Муршид Муталимов (Дагестан).

70 кг: 1. Давид Баев (Хотугу Осетия-Алания), 2. Разамбек Жамалов (Дагестан), 3. Евгений Жербаев (Бурятия), 3. Чермен Валиев (Хотугу Осетия-Алания).

74 кг: 1. Магомед Курбаналиев (Дагестан), 2. Хетаг Цаболов (Хотугу Осетия-Алания),  3. Тимур Бижоев (КБР), 3. Магомедрасул Газимагомедов (Дагестан).

79 кг: 1. Гаджи Набиев (Дагестан), 2. Ацамаз Санакоев, 3. Кахабер Хубежты (иккиэн – Хотугу Осетия-Алания), 3. Халид Яхиев (Чечня).

86 кг: 1. Артур Найфонов, 2. Владислав Валиев (иккиэн – Хотугу Осетия-Алания), 3. Арсенали Мусалалиев, 3. Магомед Рамазанов (иккиэн – Дагестан).

92 кг: 1. Алихан Жабраилов, 2. Магомед Курбанов (иккиэн – Дагестан), 3. Батырбек Цакулов (Хотугу Осетия-Алания), 3. АнзорУришев (Красноярскай-КБР).

97 кг: 1. Владислав Байцаев (Хотугу Осетия-Алания), 2. Игорь Овсянников (Красноярскай), 3. Георгий Гогаев (Хотугу Осетия-Алания), 3. Шамиль Мусаев (Дагестан).

125 кг: 1. Алан Хугаев (Хотугу Осетия-Алания), 2. Саид Гамидов (Дагестан), 3. Зелимхан Хизриев (СПб-Чечня), 3. Павел Кривцов (Кемерово).

 

Добавить комментарий

Ваш e-mail не будет опубликован. Обязательные поля помечены *