“Бу сүүрүүбүн Сардаана Трофимоваҕа аныыбын”

Бүгүн, балаҕан ыйын 20 күнүгэр билиҥҥи кэмҥэ чэпчэки атлетикаҕа тумус туттар кыттааччыбыт – марафоҥҥа Россия үс төгүллээх чемпиона, норуоттар икки ардыларынааҕы кылаастаах спорт маастара, дойду сүүмэрдэммит хамаандатын чилиэнэ Сардаана Трофимова Москватааҕы үгэскэ кубулуйбут марафоҥҥа сүүрүөҕэ.

Кини сүрүн соруга – олимпийскай нормативы (2:29.30) толоруу. Бу марафоҥҥа бэлэмнэнэн Сардаана тренерэ, спорт үтүөлээх маастара Татьяна Жиркованы кытта Кисловодскай куоракка анал эрчиллиини барда уонна сүүрэргэ бэлэм.

Бу күнү саха спорду таптааччылара бары кэтэспиппит. Итиэннэ Сардаанаҕа ситиһиини баҕарабыт. Холобур, Уус Алдан улууһун Бороҕон сэлиэнньэтин олохтооҕо Виктор Егорович Атласов Сардаана Трофимоваҕа өйөбүл буолар санааттан өссө нэдиэлэ инниттэн бэйэтин иннигэр оруобуна марафон дистанциятын – 42 км сири сүүрэргэ санаммыт.

Олунньу 23 күнүгэр – Аҕа дойдуну көмүскээччилэр күннэригэр кэргэним Татьяна Павловна дьиэтээҕи сүүрэр тренажер бэлэхтээбитэ, – диир Виктор. – Онтон ыла кыралаан хаамыыттан саҕалаан, дьарыктанан киирэн барбытым. Билигин бу нэдиэлэ устата күн аайы 5-6 км сүүрэн, балаҕан ыйын 20-гэр буолар Москватааҕы марафоҥҥа анаан, 42 км сүүрэргэ санаммытым. Бүгүн 5 км сүүрдэхпинэ, оруобуна 42 км кыра тахса буолар. Бу сүүрүүбүн Москва ахсыс марафонугар анаан уонна Сардаана Трофимованы өйүүр сыалтан сүүрэр санааламмытым. Бэйэбит кыыспыт кыайарыгар баҕарабын.

Бу курдук бары түмсүүлээхтик, Сардаана кыайарын, олимпийскай нормативы толорорун туһугар “ыалдьыахха”, бэйэбит үтүө баҕарыыларбытын аныахха диэн ыҥырар Виктор Атласов.

Виктор оскуолаҕа үөрэнэ сылдьыаҕыттан спорка сыстаҕас. Өнөргө аҕыс кылаастаах оскуолатыгар үөрэнэр кэмигэр Борис Захарович Ильин диэн физкультура учууталын такайыытынан 800-1500 м дистанцияларга сүүрүүнэн дьарыктаммыт. Онтон 9-10 кылаастарга Бороҕоҥҥо оҕо спортивнай оскуолатыгар киирэн, биллиилээх спортсмен Черноградскай Семен Ильич дьарыктыыр хайыһар секциятыгар эрчиллибит. Ол быыһыгар туризмҥа, учуутал Анатолий Андреевич Никифоровка дьарыктанан, 5-10 км күн аайы сүүрэргэ үөрэммит.

Дьэ, онон биһиги бары Сардаана туруоруммут сыалын ситиһэригэр баҕарабыт уонна киниэхэ эрэнэбит! Сүүрүү биһиги бириэмэбитинэн күнүс 15:00 чаастан саҕаланар. Сүүрүүнү moscowmarathon.org сайтка көрүөххэ сөп.

Петр ПАВЛОВ.

“Бу сүүрүүбүн Сардаана Трофимоваҕа аныыбын”: 6 комментариев

  1. Петр Сивцев

    Витя маладьыас,Бороҕоннооҕу однокласснигын Сивцев Петр

  2. Петр Сивцев

    Витя маладьыас,Бороҕоннооҕу однокласснигыҥ Петр Сивцев

    1. Петр Павлов Автор записи

      Оннук, санаатын кууьэ улахан. Маладьыас!

Добавить комментарий для Петр Сивцев Отменить ответ

Ваш e-mail не будет опубликован. Обязательные поля помечены *