Барыта этэҥҥэ буоларыгар, “Дыгыммыт оонньуута” ыытылларыгар баҕарыаҕыҥ!

Бу күннэргэ Дьокуускай куорат физическэй култуураҕа уонна спорка управлениетын салалтатыгар түбүктээх күннэр үүннүлэр. Төһө даҕаны хаһыс да ыйын коронавирус дьаҥыттан бүтүн республика үрдүнэн карантин биллэриллибитин үрдүнэн, куорат спорка олоҕо уҕараабат. Ол курдук, саахымакка Дьокуускай куорат кубога, “Туймаада Ыһыаҕын” чэрчитинэн тутум эргииригэр уонна хабылыкка онлайн… күрэхтэһиилэр ыытылыннылар.

Аны чугастааҕы кэмҥэ, табылыннаҕына, үгэскэ кубулуйбут Дьокуускай куорат марафоҥҥа күрэхтэһиитэ ыытыллара былааннанар. Биир саамай улахан тэрээһининэн, дьон-сэргэ улахан биһирэбилин, кэрэхсибилин ылбыт “Дыгын оонньуулара” буолар. Управление салалтата бу күрэхтэһиини быйыл хайаан да ыытарга суоттанар. Ол курдук, атырдьах ыйын 8-9 күннэригэр Бүтүн Россиятааҕы физкультурниктар күннэригэр анаан, “Дыгын оонньууларыгар” сүүмэрдиир күрэхтэһиини тэрийэн ыытарга былаанныыр.

Биллэрин курдук, онно тоҕус путевка оонньонуоҕа. Оттон былырыыҥҥы кыайыылаах Егор Филиппов (Хаҥалас) уонна национальнай многоборье быйылгы кыайыылаахтара Владимир Федоров (Ньурба), Алексей Уваровскай (Кэбээйи) – финалга кыттар быраабы ылбыттара. Онон барыта этэҥҥэ буоллаҕына, “Дыгын оонньууларын” быһаарыылаах түһүлгэтэ балаҕан ыйыгар, Дьокуускай куорат күннэрин чэрчитинэн ыытыллыаҕа.

Өссө төгүл санатан эттэххэ, “Дыгын оонньуутун” тэрийэн уонна бэлэмнээн ыытыы коронавирус дьаҥа республикаҕа төһө хаптайарыттан, миэстэҕэ балаһыанньа хайдаҕыттан тутулуктаах. Бу улахан тэрээһини көрсө управление начаалынньыга Константин Семенович Бурцев бу күннэргэ туһааннаах салайааччылары, специалистары кытта кэпсэтиилэри ыыта сылдьар. Күрэхтэһии ыытыллар сирин быһаарыы-кэпсэтии, бириистэри олохтооһун, спонсордары кытта үлэ, судьуйалары анааһын…

Аны туран бу күннэргэ биир дьоһуннаах түгэнинэн, Дьокуускай куорат спортивнай оскуолаларын дириэктэрдэрин анааһын буолла. Ол курдук, 1-кы нүөмэрдээх оҕо спортивнай оскуолатын дириэктэринэн Николай Гаврильевич Цыпандин, 2-с нүөмэрдээх ДЮСШ дириэктэринэн – Владислав Гаврильевич Черов, В.П. Керемясов аатынан 3 нүөмэрдээх спортивнай оскуола дириэктэринэн – Василий Васильевич Уйгуров, оттон 8-сыс нүөмэрдээх Тулагытааҕы ДЮСШ дириэктэринэн – Константин Сергеевич Овчинников ананнылар.

Дьэ, бу тэрээһиннэр, быһаарыылар, анааһыннар барыта Дьокуускай куорат физическэй култуураҕа уонна спорка управлениетын быһаччы кыттыытынан, салайыытынан ыытылыннылар уонна ыытыллаллар. Управление инники туруоруммут сыала-соруга олоххо киирэригэр, былааннаммыт болдьоххо бары сөбүлүүр “Дыгыммыт оонньуута” ыытылларыгар баҕарыаҕыҥ!

Петр ПАВЛОВ.   

Ааптар хаартыскаҕа түһэриитэ.

Добавить комментарий

Ваш e-mail не будет опубликован. Обязательные поля помечены *