Англия, Россия футболга чемпионнара билиннилэр

Оҕо сылдьан “Артекка” аан бастаан, 15000 кэриҥэ көрөөччүлээх улахан, оргуйа-кыынньа турар стадиоҥҥа, иккитэ футбол көрбүтүм. Бастакытыгар “Артек” финалыгар оҕолор, онтон иккискэ оҕолорго ССРС хамаандата Болгариялары кытта оонньообуттара. Ол стадион энергията бэриллэн, футболу кыралаан кэтиир буолбутум.

1977 сылтан, “Битлз” музыкатыгар ылларан, “Ливерпульга” ыалдьабын. Ол кэмҥэ Ливерпуль куорат Англия футболун чыпчаалыгар этэ – “Мерсисайдское дерби” – “Ливерпуль” уонна “Эвертон” чемпион буолаллара. 1979 сылтан “Зенит” ыалдьааччытабын – абитураҕа сылдьан Сергей Дмитриев, Яковлев диэн “Зеникка” оонньуур уолаттары кытта биир хоско түбэһэн олорбутум. Дмитриев аҕыйахта көстүбүтэ, сүрүн састаапка баар быһыылаах этэ, элбэхтэ оонньуура, оттон Яковлевтыын син бодоруспуппут, оннооҕор “Зенит” – “Нефтчи” оонньууга босхо киллэрбитэ, 4-0 ахсаанынан кыайыыттан астынан кэлбиппит, куорат барыта кэриэтэ ырыа-тойук буолбутун сөхпүтүм. Стадионтан баран иһэр дьон түннүгүнэн быган турар дьоҥҥо оонньуу хайдаҕын кэпсээн үллэстэ хаамаллар эбит этэ…

1984 сылга иккиэн ССРС чемпиона буолбуттара, Дмитриев олох чулуу оонньооччу буолбут этэ, Тбилисигэ 2-0 хотторо сылдьан, 2-4 кыайыыга икки голу киллэрбитин телевизорга көрөн табаарыстарга киэн туттубутум билиҥҥэ диэри өйбөр сибиэһэй, Яковлев эмиэ син оонньообута, үксүн солбукка тахсар этэ.

Быйылгы киһини сүгүн үөрдүбэт сылга, икки бүк үөрүүлэнним – “Ливерпуль” Англия, “Зенит” Россия чемпионнара буоллулар. Иккиэн бэйэлэрин чемпионаттарыгар кэккэ рекорд олохтоотулар: “Ливерпуль” чемпионат бүтүө 7 туур иннинэ, “Зенит” – 4 туур иннинэ чемпион буоллулар, иккиэн рекорд буоллаллар. “Ливерпуль” 30 сыл буолан баран, Англия чемпионатын үрдүкү чыпчаалыгар 19-с төгүлүн таҕыста, “Зенит” икки сыл субуруччу кыайан, Россия чемпионун аатын алтаҕа тиэртэ.

Футбол араас бобуулар кэннилэриттэн салҕанан сотору спорт барыта, олохпут даҕаны чөлүгэр киириэхтэрэ диэн эрэниэххэйиҥ!

Андрей ФИЛИППОВ-Хомпоруун.

Добавить комментарий

Ваш e-mail не будет опубликован. Обязательные поля помечены *