“Дьулурҕан” бэчээттэниэхтээх”! Суруктартан строкалар…

Соторутааҕыта, от ыйын 1 күнүгэр – оруобуна Национальнай бэчээт күнүгэр анаан http//dzulurgan.ru сайтка “Дьулурҕаҥҥа күүс-көмө, өйөбүл буолуохха, эбэтэр сахалыы спорт туһунан хаһыат наада дуу, суох дуу?” диэн, тоҕоостоох кэмҥэ сөп түбэһиннэрэн, үөскээбит кыһалҕаны арыйар туруорсуу матырыйаал бэчээттэммитэ. Матырыйаал дьон сэҥээриитин ылбыта. Сүрүннээн, хаһыаты кытта уруккуттан алтыһар дьон бэйэлэрин санааларын сайа эппиттэрэ, суруйбуттара. Ону ааҕааччыларга хайдах баарынан билиһиннэрэрбин көҥүллээҥ.

Саха бэчээтэ баар диир буоллахпытына, “Дьулурҕан” баар буолуохтаах!    

Россия Суруналыыстарын сойууһун чилиэнэ Петр Иннокентьевич Попов: “Ытыктыыр, сүгүрүйэр киһим, спортивнай суруналыыстыка дьиҥнээх байыаһа Петр Семенович, истиҥ эҕэрдэ! Эн оҕо сылдьан кумааҕы тустуук оонньуурдарынан үлүһүйүөххүттэн, билигин тустуу эйгэтигэр аан дойдуга биллэр суруналыыс, ырытааччы буола үүннүҥ. Ханна да суох ыйынньык-кинигэлэри оҥорбутуҥ – бу бэйэтэ улахан кылаат! Тустууга ураты бэриниилээҕиҥ, аан дойдуга суох соҕотох сахалыы тыллаах “Дьулурҕан” хаһыаты төрүттээн, 20 сыл тус бэйэҥ таһааран кэлбиккэр эмиэ көстөр. Саха бэчээтэ баар диир буоллахпытына, бу хаһыат эмиэ баар буолуохтаах! Эн бу туруорсуугун истиэхтэрэ, өйүөхтэрэ диэн тус бэйэм эрэнэбин. Кытаат, барыта этэҥҥэ буоллун!”

Бөдөҥ хаһыат кынатын анныгар быдан тирэхтээх буолуо этэ

“Үйэ” сурунаал сүрүн редактора Николай Кривошапкин: “Мин санаабар, «Дьулурҕан» бырайыак туох да коммерческэй сыала суох буоллаҕына, «Саха сиригэр» биир да балаһаҕа аччаттыннар, түөрт/аҕыс да балаһаҕа кэҥэттиннэр, онно олохсуйан сылдьыбыта ордук буолуохха дылы. Национальнай бэчээт, официальнай хаһыат, былаас бэриэччитэ баарын тухары өлбөт-симэлийбэт үөстэниэ этэ. Холобура, «Далбар Хотуну» Наталья Ивановна маҥнай утаа бэйэтэ сүүрэн-көтөн, үбүлээһинин тобулан таһааттарара. Ырыынак сыһыаннаһыылара кытааппыт сылларыгар кэмигэр судаарыстыбаҕа биэрэн, социальнай суолталанан, республика бас билиитигэр киирбитэ. Ааспыкка министерствоҕа сылдьан, «Спорт Якутии» сарсыҥҥыта эмиэ ыйааһын бэскитигэр турар курдук өйдөөбүтүм. Ол, биллэн туран, коммерческэй бырайыак буоллаҕа. Инньэ гынан, олоххо көстөрүнэн, «Дьулурҕаммыт» кэнэҕэскитэ, туох да диэбит иһин, бөдөҥ хаһыат кынатын анныгар быдан тирэхтээх буолуох эбит дуу. Тус көрүүм итигирдик”.

Сыһыарыы эрэ быһыытынан тахсара соччото суох

Көҥүл тустууга ССРС спордун маастара Гаврил Каприн: “Сахалыы тыллаах спортивнай анал хаһыат баар буоларыгар туруорсабын. Сахалыы тыллаах саха дьоно, Саха Республиката эрээри, спорт саамай сайдан турар кэмигэр, оннооҕор “Юношеские Олимпийские игры” барар кэмигэр, мин республикам спорка туһунан анал хаһыата суоҕа – соччото суох. Спорт, эйэ, култуура, доҕордоһуу баар буоларын мэктиэлиир көрүҥ уонна мин дойдубар анал хаһыат суоҕа табыллыбат. Араас хаһыаттар бааллар, тахсаллар, ааҕыллаллар, оттон спортивнай хаһыат суох. Сыһыарыы эрэ быһыытынан тахсара соччото суох, спортивнай республика эрээри… Туох баар республикалар бары анал спортивнай хаһыаттаахтар. Как гражданин Республики Саха (Якутия) настаиваю. Как уполномоченный по правам человека, считаю, что это неправильно, это и есть ущемления прав человека в ХХI веке. Спорт это – Мир! Спорт это – Дружба народов!”

Тапталлаах “Дьулурҕаммыт” – хаһыат буолан тахсарын кэтэһэбит!

Саха Республикатын үтүөлээх тренерэ Иннокентий Семенович Кочкин: “Саха сирин бэчээтин күнүнэн ис сүрэхтэн эҕэрдэ!!! Тапталлаах тустуубутун үрдүктүк сыаналаан, киэргэтэн, бэйэҥ рейтиннэргин оҥорон сырдатаргыттан олус астынабын, махтанабын! Тапталлаах хаһыаппыт “Дьулурҕан” – хаһыат буолан тахсарын кэтэһэбит, тутан олорон астына ааҕарбытын күүтэбит! Доруобай сылдьан Ай-тут!!!”

“Дьулурҕан” бэчээттэниэхтээх!

Тустууну сэҥээрээччи Максим Афанасьев: “Мин санаам биир уонна бигэ – “Дьулурҕан” бэчээттэниэхтээх! Хаһыат нөҥүө тустуу сиһилии ырытыллар, санаа атастаһыыта элбиир. Мин “Дьулурҕан” тахсыбыт нүөмэрин 98-99% аахпыт буолуохтаахпын”.

“Дьулурҕаны” аахтахпына кутум-сүрүм бөҕөргүүр, санаам күүһүрэр

Алгысчыт, олоҥхоһут Петр Максимович Тихонов: “Тоҕо эрэ мин тустууну таптыырым курдук, “Дьулурҕаны” эмиэ истиҥник саныыбын, аахтахпына, көрдөхпүнэ кутум-сүрүм бөҕөргүүр, санаам күүһүрэр. Дьиҥинэн хаһыат, сурук-бичик, төрөөбүт тыл, иитии, чөл олох, доруобуйа өттүнэн спортивнай хаһыаты государство өттүттэн ыччат, оҕо, үөрэх,  культура, дьиэ кэргэн о.д.а. министерстволар хайаан да өйүөхтэрин сөп этэ. Тоҕо барыта баҕа санаа өттүнэн эрэ барыахтааҕый? Спорду, физкультураны сырдаппат, онно көх-нэм буолбат буоллахтарына тугу үлэлииллэр?”

”Дьулурҕан” салгыы тахсарын өйүүбүн

Спорду таптааччы, сырдатааччы Виталий Власьевич Слепцов: “Республика олохтоохторо спорду уруккуттан сөбүлүүллэрэ, сэргииллэрэ. Спордунан билигин элбэх киһи дьарыктанар, ордук ыччаттар. Дьон доруобай, чэгиэн олоххо тардыһыылара күүһүрдэ. Кинилэри сахалыы бэчээт сырдатыахтаах, өйүөхтээх, күүс-көмө буолуохтаах. Бастатан туран, сахалыы тыллаах уруккуттан республика олохтоохторугар үчүгэйдик биллибит, элбэх сыллар устата доруобай, чэгиэн олоҕу пропагандалаан кэлбит ,”Дьулурҕаны”. Аны , ”Дьулурҕаны” бэйэтин эмиэ өйүөххэ, киниэхэ күүс-көмө буолуохха. ”Дьулурҕан” салгыы тахсарын өйүүбүн”.

Кыһалҕаны баарынан норуот дьүүлүгэр таһаарар сөптөөх

Спорду таптааччы Николай Местников: “Кыһалҕаны баарынан норуот дьүүлүгэр таһаарар, сырдатар ордук буоллаҕа дии. Мин “Саха омук” уонна “Саха Конгреһа” бөлөххө баарбын. Ыыттым бүгүн быыбар күнэ, онон соччо көрбөттөрө буолуо, кэлин өссө ыытыам. Санааларын билиэххэ сөп уонна тугу гыныахха сөбүн сүбэлиэхтэрин сөп, өйүөхтэрэ, Кэнгириэс аатыттан баҕар сурук да бэлэмнээн ыытыахтарын сөп, сөбүлээтэхтэринэ. “Саха омук” түмсүү саҥа тэриллэн эрэр, онтон Кэнгириэс салайааччыта Иван Иванович Шамаевы бэйэҥ да булан кэпсэтиэххин сөп”.

Спорт туһунан сахалыы бэчээт хайаан да өйөнүөхтээх!

Спорт бэтэрээнэ Роман Егоров: “Спорт иитэр, үөрэтэр күүһэ сүрдээх буоллаҕа. Спорт туһунан сахалыы бэчээт хайаан да өйөнүөхтээх! Миэнэ итинник, “Спорт посол мира и дружбы”.

Элбэх ааҕааччы кэтэһэрэ чахчы

Педагогическай үлэ бэтэрээнэ Татьяна Ильинична Алексеева: “Петя, баҕа санааҥ  туоллун, туспа хаһыат таҕыстар ханнык! Элбэх ааҕааччы кэтэһэрэ чахчы”.

Хаһыат дьылҕатын үчүгэй өттүгэр быһаарыы ылыналлара буоллар

“Первый борцовский” сурунаал редактора Иван Барашков: “Чөл олоҕу уонна спорду республикабыт иһигэр пропагандалыыр биир көдьүүстээх көрүҥэ “Дьулурҕан” хаһыат этэ. Бу сыллар устата төһөлөөх элбэх эһээ, эбээ, аҕа уонна ийэ “Дьулурҕаны” ааҕан спорка оҕолору сыһыарбыттара буолуой? Ол оҕо улахан спортсмен да буолбатах буоллаҕына, бэйэтин чөл олоҕу кытта ситимнээн, чөл дьиэ кэргэн тэринэн, доруобай оҕо төрөтөн кэллэҕэ, бу сыллар усталарыгар. “Дьулурҕан” чуолаан тыаҕа олорор спорт ыалдьааччыларыгар кэтэһиилээх күндү ыалдьыт буолара. Онон хаһыат дьылҕатын үчүгэй өттүгэр быһаарыы ылыналлара буоллар. Холобур, быыбарга эҥин туһата суох материал бөҕө бэчээттэнэр, улахан сууммаҕа, аҕыйах хонукка ыйанан тураары, онтон бөх буолаары. Онон бу күөрэ-лаҥкы буккуллубут олохпутугар, ыччаты оҕону сөпкө иитэрбитигэр туһалаах боппуруос сөпкө өйдөнөн, сыаналанан, этэҥҥэ быһаарыллара буоллар”.

Хотелось бы, чтобы «Дьулурҕан» продолжал радовать любителей спорта Якутии

Журналист, общественный деятель Владислав Петрович Коротов: “В связи с надвигающимся кризисом в сложном положении находится спортивная пресса. Вот уже 20 лет сахаязычных любителей спорта радует спортивное приложение «Дьулурҕан». И все это время она существует и еще выходит в свет благодаря стараниям одного-единственного человека – настоящего фаната спорта и признанного в мире спорта специалиста вольной борьбы Петра Павлова. «Дьулурҕан» в разные годы выходил под эгидой республиканских изданий «Республика бүттүүнэ», «Саха сирэ», «Киин куорат», сегодня его вроде бы передали в ведение «Сахапечать». Все-таки хотелось бы, чтобы «Дьулурҕан» продолжал радовать любителей спорта Якутии. Прошу Министерство по физкультуре и спорту РС (Я) и Министерство цифрового развития и инфокоммуникационных технологий Якутии обратить внимание на это издание. Ведь наша республика всегда позиционирует себя как один из самых спортивно-физкультурных регионов страны и территория ЗОЖ, откуда исходят многие самые передовые инициативы в этой сфере”.

“Дьулурҕан”.

Добавить комментарий

Ваш e-mail не будет опубликован. Обязательные поля помечены *