Сайыҥҥы сүүрдүү үтүө номох, кэрэ кэпсэл буолан ахтылла туруо

Дьэ, от ыйын 4 күнүгэр буолан ааспыт сайыҥҥы сүүрдүүлэри төһө даҕаны карантинынан сибээстээн телевизорынан быһа көрдөрбүт, улахан дуоһуйууну ыллыбыт. Быйылгы сайыҥҥы ат сүүрдүүтүгэр 45 ат сүүмэрдээһини ааһан кытынна. Ол иһигэр Мэҥэттэн – 9, Амматтан – 7, Чурапчыттан – 6, Үөһээ Бүлүүттэн, Намтан, Уус Алдантан – 5-тии, Сунтаартан, Хаҥаластан, Тааттаттан – 2-лии, Ньурбаттан уонна Агропромышленнай университеттан 1-дии ат сүүрдэ.

Сайыҥҥы сүүрдүүгэ Мэҥэ Хаҥалас улууһун сүүрүк сылгылара үчүгэй көрдөрүүнү ситистилэр. Ол курдук, алта сүүрдүү ыытыллыбытыгар, мэҥэлэр – үһүгэр бастаатылар, үһүгэр иккистээтилэр уонна биир аттара үһүстээтэ. Ол аата, сэттэ ат бириискэ тигистэ. Оттон Нам хамаандата икки кыайыылаах уонна Есауллара – Ил Дархан бирииһигэр төрдүс миэстэҕэ тахсан, балаһыанньа быһыытынан эмиэ харчынан наҕараадаланна. Амма хамаандата биир бастакылаах уонна икки – иккистээх. Үөһээ Бүлүү уонна Чурапчы – иккилии үһүс миэстэлээхтэр, оттон Агропромышленнай университет – биир иккистээх, Хаҥалас – биир үһүс миэстэлээх. Арай Уус Алдан, Таатта, Сунтаар, Ньурба аттара бириискэ тиксибэтилэр.

Туох барыта тэҥнээһининэн сыаналанар дииллэр. Онон буолан ааспыт сүүрдүү бириэмэтин – былырыыҥҥы маннык күрэхтэһии уонна быйыл бэс ыйын 15 күнүгэр ыытыллыбыт сүүмэрдиир сүүрдүү бириэмэлэрин кытта тэҥнээн көрүөххэ. Чэ, холобур, былырыыҥҥы сайыҥҥы сүүрдүү Үс Хатыҥ ипподромугар ыытыллыбыта. Онно Ил Дархан бирииһигэр Чурапчыттан Мэйн Кениг бастаабыта. Бириэмэтэ – 2.42.0. Оттон Дьокуускайдааҕы ипподромҥа ыытыллыбыт быйылгы сүүмэрдиир сүүрдүүгэ 2400 м дистанцияҕа бастыҥ бириэмэни Мэйзи Кинг (Амма) көрдөрбүтэ. Бириэмэтэ – 2.41.1. Ол курдук, бу дистанцияҕа үһүс сүүрдүү түмүгэ маннык буолбута: 1. Мэйзи Кинг (2.41.1), 2. Есаул (2.41.7), 3. Брокер Барс (2.44.9)…

Дьэ, уонна быйылгы Ил Дархан бирииһигэр Мэҥэ Хаҥаластан Брокер Барс бастаата. Бириэмэтэ – 2.38.3. Бу уһулуччу көрдөрүү. Сүүрдүүнү сыныйан көрдөххө, Брокер Барс олус кыахтаахтык кыайда. Манна баайааччы уонна сүүрдээччи сүүрэр суолу хас биирдии миэтэрэтин, туорааһынын-көнөтүн барытын ааҕан-суоттаан, мындырдык ырытан, күүстэрин сөптөөхтүк аттаран кыттыбыттарын бэлиэтиэххэ сөп. Бастаан-утаа, Брокер Барс күлүккэ сылдьан баран, быһаарыылаах көнөҕө уһулу ойон тахсан кыахтаахтык бастаата. Көрдөххө, өссө даҕаны төһө баҕарар сүүрэр кыахтаах этэ. Бу аата, баайыы, бэлэмнээһин табыллыбыт.

Манна арай, ити бириэмэни тэҥнээһин сыыһа соҕус буолуо дии саныыбын. Тоҕо диэтэргит, Үс Хатыҥ сүүрэр суола атын, оттон бэс ыйын 15 күнүгэр буолбут сүүрдүү ардах аннынан ыытыллыбыта. Ити, бириэмэҕэ эмиэ охсубут буолуон сөп.

Сайыҥҥы сүүрдүү түмүгүнэн, бастыҥ баайааччынан – сүрүн бириис кыайыылааҕынан тахсыбыт Василий Игнатьевы (Мэҥэ Хаҥалас) ааттыахха сөп. Оттон бастыҥ сүүрдээччинэн – эмиэ Мэҥэ Хаҥаластан Виталий Петрову. Кинилэр алта сүүрдүүттэн – үһүгэр кыайыыны ситистилэр!

Дьэ, онон, эһиилги Ил Дархан бирииһигэр диэри ат спордун сэҥээрээччилэр уостарыттан Брокер Барс кылбар кыайыыта үтүө номох, кэрэ кэпсэл буолан ахтылла туруо дии саныыбын. Манна даҕатан эттэххэ, Брокер Барс – биэс саастаах. Аҕата Пауэр Брокер, ийэтэ Леди Ви, “Арктика Строй” тэрилтэ бас билэр ата, билигин Мэҥэ Хаҥалас улууһугар арендаҕа сылдьар. Сүүрдээччитэ – Виталий Петров, баайааччыта – Василий Игнатьев.

Аны, барыта этэҥҥэ буоллаҕына, күһүҥҥү сүүрдүүлэр тэриллиэхтэрэ диэн эрэнэ хаалыахха.

Сайыҥҥы сүүрдүү түмүк көрдөрүүтэ:

800 м «Сайыҥҥы» бириис

1 м – Арктика, Мэҥэ Хаҥалас (сүүрдээччи В.Петров, баайааччы В.Игнатьев), 0.53.5

2 м – Афина, ФГБОУ ВО «Арктического ГАТУ», 0.53.9

3 м – Нумизматик, Үөһээ Бүлүү, 0.54.4

4 м – Леди Левинсон, «Бөтүҥ», Амма, 0.54.6

5 м – Төлөн, “Чурапчы”, Чурапчы, 0.54.9

6 м – Ассамблея, ИП Неустроев А.А., Үөһээ Бүлүү.

1000 м Критериум” бириис

1 м – Суфражистка, Нам (сүүрдээччи И.Иванов, баайааччы С.Ядреев) 1.03.4

2 м – Варадеро, “Строд”, Амма, 1.04.1

3 м – Кул Джет, Үөһээ Бүлүү, 1.06.6

4 м – Стар Трек, ЧВ Шамаев, Бүлүү, 1.08.0

5 м – Кыыдаана, Уус Алдан, 1.13.1

1600 м ОКС” бирииһэ

1 м – Николь, Мэҥэ Хаҥалас (сүүрдээччи О.Игнатьева, баайааччы В.Игнатьев)  1.50.8

2 м – Армада, Мэҥэ Хаҥалас, 1.52.5

3 м – Атланта, Мэҥэ Хаҥалас, 1.54.3

4 м – Полар Стар, Уус  Алдан, 2.12.7

5 м – Хотун Мэнэс, Уус Алдан.

2000 м “Югория” бирииһэ

1 м – Арктик Бой, “Строд” СХПК, Амма (сүүрдээччи С.Тимофеев, баайааччы Н.Громов), 2.18.4

2 м – Норд Стар, Мэҥэ Хаҥалас, 2.19.6

3 м – Түмэн, Хаҥалас, 2.20

4 м – Арылхан, Нам, 2.20.4

5 м – Блэк Грек, “Давидофф” ООО, Амма, 2.22.0

6 м – Гоин Ап, Сунтаар, 2.26.2

7 м – Губернатор, ЧВ Макаров, Чурапчы, 2.28.2

8 м – Сириус, ЧВ Гоголев П.М., Уус Алдан, 2.34.4

9 м – Голден Асс, ИП Неустроев А.А., Үөһээ Бүлүү.

2400 м СР Ил Дарханын бирииһэ

1 м – Брокер Барс, «Арктика Строй», Мэҥэ Хаҥалас (сүүрдээччи В.Петров, баайааччы В.Игнатьев), 2.38.3

2 м – Мэйзи Кинг, СХПК «Строд», Амма, 2.38.7

3 м – Майн Кениг, СХПК «Чурапчы», Чурапчы, 2.39.2

4 м – Есаул, ЧВ Павлов С.М., Нам, 2.39.5

5 м – Корибиан Бой, Үөһээ Бүлүү, 2.42.0

6 м – Блэк Джет, Мэҥэ Хаҥалас, 2.42.4

7 м – Джафар, Хаҥалас, 2.42.9

8 м – Альтер, ЧВ Бечекянов П.П., Уус Алдан, 2.43.4

9 м – Свидетель Барс, ООО «Давидофф», Амма, 2.44.5

10 м – Анкэнди, СХПК «Чурапчы», Чурапчы, 2.46.4

3200 м СР Правительствотын бирииһэ

1 м – Сандал, ЧВ Протопопов К.Н., Нам (сүүрдээччи И.Иванов, баайааччы С.Ядреев), 3.42.4

2 м – Сайбер  Шот, ЧВ Егоров В.М., Мэҥэ Хаҥалас, 3.43.7

3 м – Жирков, ЧВ Макаров В.Д,  Чурапчы, 3.50.3

4 м – Айнцер Гут, Мэҥэ Хаҥалас, 3.50.5

5 м – Стимул, ЧВ Иванов Н.Е., Таатта, 4.03.5

6 м – Арабика, Таатта, 4.06.7

7 м – Марокко, ЧВ Михайлов М.С., Ньурба, 4.08.4

8 м – Литл Лайт, СХПК «Строд», Амма, 4.33.5

9 м – Тускул, СХПК “Чурапчы”, Чурапчы.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *