Ил Дархан бирииһигэр ат сүүрдүүтэ от ыйын 4 күнүгэр ыытыллар буолла!

Аҕыйах хонуктааҕыта СР ат спордугар федерациятын Пресс-сулууспата, коронавирус дьаҥыттан сибээстээн сайыҥҥы ат сүүрдүүлэрэ тохтотулларын туһунан иһитиннэрбитэ. Ол эрээри, элбэх ахсааннаах спорду таптааччылар туруорсууларын ылынан, Саха Республикатын бэрэсидьиэнэ Айсен Сергеевич Николаев, Ил Дархан бирииһигэр ат сүүрдүүтүн бу субуотаҕа – от ыйын 4 күнүгэр ыытарга быһаарда:

Быйыл биһиги олохпут барыта тосту уларыйда, коронавирус пандемията аан дойду үрдүнэн тэнийэн, биһиэхэ кэлэн, олохпут үгүс эйгэтэ хааччахтанан турар. Ол курдук, спорт эйгэтигэр эмиэ сүрдээх улахан хааччахтааһыннар бара тураллар, биир даҕаны куоталаһыы ыытыллыбат диэххэ сөп. Кэнники кэмҥэ коронавирус балаһыанньата республикаҕа аччаан, «ат сүүрдүүтүн ыыттыыга чэпчэтиилэри оҥоруохха сөп эбитэ буолуо дуу»диэн биһиги ырытан көрдүбүт. Ону Суһал штаб да, эпидемия балаһыанньатын кэтиир органнар даҕаны, урукку курдук элбэх киһи мустуулаах ат сүүрдүүтүн ыытар сатаммат диэн бобуу кытаанаҕа. Ол иһин, Быраабыытылыстыба өттүттэн этии киирэн, бу күннэргэ “Ил Дархан бирииһигэр ат сүүрдүүтүн быйыл тохтотуохха” диэн информация барбыт. Миэхэ тус бэйэбэр ат сүүрдүүтүн ыытар туһунан этиилээх балайда да элбэх киһи суруйда — сылгыһыттар, ат сүүрдээччилэр, бу спорт көрүҥүн сэҥээрэр дьон. Мин бэйэм Ат спордун федерациятын үгүс сылларга салайбытым, ол иһин ат сүүрдүүтүн, сахалар биир саамай таптыыр көрүҥмүтүн хайаан даҕаны өйүөх тустаахпыт диэн санаалаахпын. Бу күннэргэ элбэх кэпсэтии түмүгүнэн, быһаарыыбыт бу курдук буолла — Ил Дархан бирииһигэр ат сүүрдүүтэ от ыйын 4 күнүгэр Дьокуускайга баар Тыа хаһаайыстыбатын агротехнологическай университетын ипподромугар ыытыллыаҕа. Ол гынан баран, бу тэрээһин көрөөччүтэ суох ааһыахтаах. «Саха» НКИХ канаалыгар уонна интэрниэтинэн быһа холбонуулар баар буолуохтара, ол туһунан сөптөөх дьаһаллар бардылар. Ити курдук, ат сүүрдүүтүн таптааччылар ипподром трибунатыттан олорон да буолбакка, телевизор, интэрниэт нөҥүө куоталаһыыны көрөн, хааммыт оонньоон, үөрэн-көтөн үчүгэй куоталаһыыны көрүөхпүт диэн эрэллээхпит. Республикабыт уон бастыҥ соноҕоһо куоталаһыыга бэлэмнэр. Куоталаһыы саҕаланара аҕыйах хонук хаалла. Элбэх киһи бириис кээмэйин туһунан ыйытар. Былырыын ити туһунан сорудах биэрэн турабын. Төһө даҕаны ыарахан буоллар, сылгыһыттарбытын өйүөх тустаахпыт, онон быйыл Ил Дархан бирииһигэр ыытыллар ат сүүрдүүтүн фондата улаатан, уопсайа 5 мөлүйүөн солкуобай буолла. Дьоммор-сэргэбэр баҕа санаабын тиэрдиэхпин баҕарабын, от ыйын 4 күнүгэр үчүгэйдик, настарыанньалаах олороҥҥут ат сүүрдүүтүн дуоһуйа көрүҥ! Бастыҥнартан бастыҥнара кыайдын!

Дьэ, онон күүтүүлээх аппыт сүүрдүүтэ буолар буолбута үөрүүлээх. Кырдьык, биһиэхэ, сахаларга Дьөһөгөй оҕотун сүүрдүү – омукпут биир уратыта буолан, этэргэ дылы, өйбүтүгэр-санаабытыгар, сүрэхпитигэр-быарбытыгар, эппитигэр-хааммытыгар быдан чугас. Саха дьоно окко киириэх иннинэ дуоһуйа сынньанан, ат сүүрдүүтүн тэрийэн, аны күһүҥҥэ диэри ханнык ат хайдах курдук кэрэтик сүүрэн, кылбардык кыайбытын кэрэ кэпсэл, уос номоҕо оҥостор үгэстээх. Син ол кэриэтэ, буолаары турар сүүрдүүттэн элбэҕи кэтэһэбит.

Бу түгэҥҥэ биири өйдүөх тустаахпыт. Билиҥҥи, ыарыы тэнийэн турар ыарахан кэмигэр хайдах курдук улахан кэпсэтиинэн, туруорсуунан ат сүүрдүүтэ тэриллэр буолбутун. Маныаха, бастатан туран, сылгыһыттар, сүүрүк аттары баайааччылар, сүүрдээччилэр уонна бу күрэхтэһиини тэрийээччилэр сыралаах үлэлэрин сыаналаан, тэрээһин туох баар ирдэбилин бары биир киһи курдук толоруохтаахпыт. Кинилэри түһэн биэриэ суохтаахпыт. Ол аата, ипподромҥа биир да киһи кэлиэ суохтаах, бары телевизорынан, интэрниэтинэн көрүөхтээхпит. Туһааннаах тэрилтэлэр син биир хонтуруоллаан, бу тэрээһин түмүгэр бэйэлэрэ сыана оҥоруохтара. Онуоха барыта этэҥҥэ буоларыгар баҕарыаҕыҥ.

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *