Владимир Гаврильевич, үбүлүөйгүнэн!

Бүгүн, бэс ыйын 26 күнүгэр Саха сирин биир биллиилээх бөҕөһө – көҥүл тустууга РФ спордун норуоттар икки ардыларынааҕы кылаастаах маастара, хапсаҕайга СР спордун маастара, ХХ үйэҕэ Саха сирин спорка лауреата, СР физическэй култуураҕа уонна спорка туйгуна, Мэҥэ Хаҥалас улууһун Бочуоттаах гражданина, М.К. Аммосов аатынан ХИФУ физическэй култуура уонна спорт институтун преподавателэ, педагогическай наука кандидата, норуоттар икки ардыларынааҕы категориялаах судьуйа – Владимир Гаврильевич ТОРГОВКИН лоп курдук үбүлүөйдээх 55 сааһын туолла! Эҕэрдэлиибит!

Тустуук Владимир Торговкин Россия чемпионатын үс төгүллээх үрүҥ көмүс призера (1989-Махачкала, 1990-Владикавказ, 1993-Москва) уонна боруонса призера (1992-Санкт-Петербург). Атлантатааҕы XXVI сайыҥҥы Олимпийскай оонньуу кыттыылааҕа. Аан дойду Кубогын биирдиилээн түмүккэ боруонса призера (Эдмонтон, Канада-1994), аан дойду чемпионатыгар бочуоттаах бэһис миэстэлээх (Атланта, АХШ-1995), Киин Азия оонньууларын кыайыылааҕа (Ташкент, Узбекистан-1995), Азия чемпионатын боруонса призера (Кытай-1996), ССРС Кубогын боруонса призера (Баку-1989), Иван Ярыгин аатынан норуоттар икки ардыларынааҕы турнир икки төгүллээх иккис призера (Красноярскай-1990, 1994), Румынияҕа, Монголияҕа, Францияҕа ыытыллыбыт түһүлгэлэргэ миэстэлэспитэ. Оттон хапсаҕайга Манчаары спартакиадатын, Петр Алексеев аатынан республика чемпионатын хас да төгүллээх кыайыылааҕа уонна призера.

Тренердэрэ – Саха АССР үтүөлээх тренерэ В.П. Уваров, ССРС спордун маастара В.В. Отделкин.

Владимир Гаврильевиһы бу кэрэ бэлиэ күнүнэн итиитик-истиҥник эҕэрдэлиибит! Баҕарабыт тус олоххор үрдүк ситиһиилэри, үлэҕэр-хамнаскар табыллыыны, чэгиэн-чэбдик буолууну. Өссө да өр сылларга үлэлээ-хамсаа, иннигэр туруоруммут бары былааннарын туоллуннар!

“Дьулурҕан”.

Добавить комментарий

Ваш e-mail не будет опубликован. Обязательные поля помечены *