Бадьаай туһунан кинигэ таҕыста

Бүгүн соһуччу бэлэх туттум. Улуу тренер Дмитрий Петрович Коркин иитиллээччитэ, Чурапчытааҕы спортивнай интернат-оскуола выпускниһа, көҥүл тустууга ССРС спордун маастарыгар кандидат, Госсулууспа уонна спорт бэтэрээнэ Валерий Васильевич Лыткин бииргэ үөрэммит, аармыйаҕа бииргэ сулууспалаабыт доҕоро, саха биир талааннаах тустууга, дьоҥҥо-сэргэҕэ “Бадьаай” диэн аатынан биллибит – ССРС Кубогын кыайыылааҕа, спорт маастара Василий Константинов туһунан сабыс-саҥа ахтыы кинигэтин дьиэбэр биир бастакынан аҕалан биэрэн, үөртэ. Валерий Васильевичка улахан махтал!

“ССРС спордун маастара Василий Константинов” диэн кинигэни эдьиийэ, СР муниципальнай, архыып сулууспаларын туйгуна, “Гражданскай килбиэн” бэлиэ хаһаайына, Амма нэһилиэгин бочуоттаах гражданина Екатерина Васильевна Аманатова, Госсулууспа уонна спорт бэтэрээнэ Валерий Васильевич Лыткин, интернат-оскуолаҕа бииргэ үөрэммит үлэ бэтэрээнэ Саргылаана Константиновна Постникова хомуйан, бэчээккэ бэлэмнээн “Сайдам” кинигэ кыһатыгар таһааттарбыттар. Бу ахтыы кинигэ Василий Васильевич Константинов төрөөбүтэ 65 сылыгар анаммыт.

Кинигэҕэ Р.М. Дмитриев аатынан Олимпийскай эрэл училищетын дириэктэрэ Алексей Филиппов, ССРС спордун маастардара: Никон Брызгаев, Прокопий Иванов, Ефрем Ефремов, Михаил Друзьянов, Гаврил Каприн, Санкт-Петербург куораттан Петр Петров, Гаврил Троев, РСФСР, Саха АССР үтүөлээх тренерэ Николай Волков, биллиилээх суруналыыс Иван Ушницкай, эдьиийдэрин, балтын, уо.д.а. аймах-билэ дьонун ахтыылара киллэриллэн, дьоһуннаах кинигэ буоларын туоһулаан, силигин ситэрэн биэрбит.

Саҥа тахсыбыт кинигэ туһунан кылгастык билиһиннэрдэххэ итинник. Хайдах буолан тахсыбытын ааҕааччылар бэйэҕит сыаналыаххыт турдаҕа.

Түмүккэ кылгастык бэйэм тус санааларбын быктарыахпын баҕарабын. Бастатан туран, орто дойдуга киһи барыта үөһэттэн ыйдаран кэлэр, бу олоххо бэйэтин суолун-ииһин хаалларар. Ол, төһө да ааспытын иһин, сырдатыллыахтаах, үйэтитиллиэхтээх дии саныыбын. Онон, кинигэни оҥорон бэлэмнээн таһаарбыт уонна ахтыыларын биэрбит дьоҥҥо барыларыгар махтаныах тустаахпыт. Этэргэ дылы, киһи олорон ааспыт олоҕун суола хаалыахтаах.

Иккиһинэн, кинигэ бэчээттэнэн тахсыбыт ахсаана наһаа кыра эбит. Спорду сэҥээрээччилэргэ, тустууну таптааччыларга барыларыгар сатаан тиксибэт дии саныыбын. Онон эбии үп булан, ахсаанын элбэтиннэрэн таһаарыахха баара. Тахсыбытын истэн, номнуо, хантан булабыт диэн ыйыталаһар, сураһар киһи элбэх.

Үсүһүнэн, спорт, тустуу устуоруйатын чинчийэр-үөрэтэр киһи быһыытынан эттэхпинэ, тустуук Василий Константинов – Бадьаай республика иһигэр тустууларын син билэбит, оттон ЦСКА-ҕа сулууспалыы сылдьан Социалистическай дойдулар Сэбилэниилээх Күүстэрин спартакиадатыгар, ССРС Кубогар, Венгрияҕа, Польшаҕа, Кореяҕа, Монголияҕа норуоттар икки ардыларынааҕы турнирдарга тустууларын туһунан сиһилии билбэппит. Ол аата, ити түһүлгэлэргэ кимнээҕи кытта хайдах тустубутун, хаһыс миэстэлэри ылбытын, чопчу хаһан-ханна буолбуттарын этэбин. Маны үчүгэйдик хасыһан, ыйыталаһан, үөрэтэн билиэххэ диэн ыҥырабын.

Итиэннэ төрдүһүнэн, өрүү этэбин, кинигэ оҥорон таһаарар наһаа үлэлээх. Сыралаах. Итинэн сибээстээн, сиэрин-туомун быһыытынан, хайаан даҕаны, саҥа үлэ күн сирин көрбүтүнэн – ааҕааччыларга билиһиннэрэр, санаа атастаһар – сүрэхтиир тэрээһин ыытылларыгар баҕарабын. Кинигэ бэчээттэнэн таҕыста, ааҕааччыга тиийдэ да, онон бүтэр диэн буолбатах.

Петр ПАВЛОВ.          

Добавить комментарий

Ваш e-mail не будет опубликован. Обязательные поля помечены *