Бу субуотаҕа – ат сүүрдүүтэ!

Коронавирус дьаҥа тыҥаан турар кэмигэр элбэх киһи түмсүүлээх улахан тэрээһиннэр тохтотуллан тураллар. Ол эрээри, туох баар санитарнай ирдэбиллэри толорон, бу субуотаҕа, ыам ыйын 30 күнүгэр Дьокуускайга, Саха Республикатын ат спордугар федерациятын, Арктическай государственнай агротехнологическай университет уонна “Саха” көрдөрөр-иһитиннэрэр хампаанньа тэрийиилэринэн – көрөөччүтэ суох ат сүүрдүүтэ ыытыллар.

Күрэхтэһии  Кыайыы 75 сыллаах үбүлүөйүгэр ананыаҕа. Сүүрдүүнү “Саха” көрдөрөр-иһитиннэрэр хампаанньа “күөх экранынан” быһа көрдөрүөҕэ. Ол курдук, балаһыанньаҕа олоҕуран, күрэхтэһиигэ ат баайааччылар эрэ мааскалаах, бэрчээккэлээх, дистанцияны тутуһан, испииһэк быһыытынан киллэриллиэхтэрэ. Онтон атын, ипподромҥа кэлбит дьон – ыстырааптаныахтара.

Сүүрдүүгэ, билиҥҥи кэмҥэ республикаҕа баар күүстээх сылгылар: Корибиан Бой, Майн Кениг, Борисоглебск, Скай Файтер, Литл Лайт… бары кыттыахтара. Барыта аҕыс сүүрдүү ыытыллыаҕа. Тэрийээччилэр биллэрбиттэринэн, күрэхтэһии бириискэ пуондата 590 тыһ. солкуобайга тэҥнэһиэҕэ.

Саха дьоно бары даҕаны үһүс ыйбытын карантиҥҥа олорон сылайдыбыт, урукку курдук күүрээннээх күрэхтэһиилэрбитин суохтаатыбыт. Хата ол кэмҥэ, телевизорынан да буоллар, ат сүүрдүүтүн быһа көрөр буоллубут. Эмиэ санаабытыгар, “аттар түстүлээр!” диэн тылы истээт, били күрэстэһэр санаабыт уһуктан – сэргэхсийэн ылыахпыт. Кимнээх эрэ кыайыа диэбит аттарын ылан уксуохтара даҕаны, ол омнуоламмат. Онон бу субуотаҕа ат сүүрдүүтүн көтүтүмэҥ!

Дьиэҕитигэр олоруҥ! Бэйэҕитин уонна тулалыыр чугастааҕы дьоҥҥутун харыстаан! Чэгиэн-чэбдик буолуҥ!  

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *