Белоглазов Андиевы кыайбыттаах

Бу сэдэх хаартыскалары көҥүл тустууга бэтэрээннэргэ аан дойду икки төгүллээх чемпиона, Дьокуускай куорат 3 №-дээх спортивнай оскуолатыгар үлэлиир Саха сирин үтүөлээх тренерэ Иннокентий Семенович Кочкин дьиэтээҕи архыыбыттан ылан, тустууну таптааччыларга билиһиннэрэбин.

…1977 сыллаахха сайын Дьокуускайга ССРС көҥүл тустууга сүүмэрдэммит хамаандата кэлэн табаарыстыы көрсүһүүлэргэ кыттыбыта. Хамаанда састаабыгар Анатолий, Сергей Белоглазовтар, Александр Иванов, Виктор Алексеев, Ихаку Гайдарбеков, Павел Пинигин, Петр Марта, Асланбек Бисултанов, Леван Тедиашвили, Сослан Андиев бааллара.

Табаарыстыы көрсүһүү кэнниттэн Анатолий Белоглазов уонна Сослан Андиев көрдөрүүлээх, атыннык эттэххэ, көрдөөх хапсыһыылара тэриллибитэ. Онуоха ити сыл 48 кг ыйааһыҥҥа аан дойду чемпиона буолбут Анатолий Белоглазов саамай ыарахан ыйааһыҥҥа (100-тэн тахса киилэлээхтэргэ) кыттар олимпийскай чемпион Сослан Андиевы “вертушкалаан” түһэрэн, ыраас кыайыыны ситиспитэ. Көбүөргэ, сахалартан көҥүл тустууга бастакы ССРС спордун норуоттар икки ардыларынааҕы кылаастаах маастара Алексей Ермолаев судьуйалаабыта.

Омос көрдөххө, ыйааһынынан икки бүк ыарахан Андиев кыайыахтаах этэ да, “көрдөөх киирсии” буоларынан, бөҕөстөр көрөөччүлэри сэргэхсиппиттэрэ. Хаартыскаҕа, көрөөччүлэр ортолоругар саха биллиилээх бөҕөстөрө: Николай Антонович Гоголев, Николай Кириллович Алексеев, Семен Федорович Алексеев, Николай Николаевич Рожин, Василий Петрович Уваров, Гавриил Михайлович Дмитриев уо.да. көстөллөр.

Петр ПАВЛОВ. 2014.

Федор СКРЯБИН хаартыскаҕа түһэриитэ. 

Добавить комментарий

Ваш e-mail не будет опубликован. Обязательные поля помечены *