Михаил Тихонов – Мэҥэ Хаҥалас улууһун Бочуоттаах гражданина

Соторутааҕыта, Мэҥэ Хаҥалас улууһа төрүттэммитэ 90 сылын үөрүүлээхтик бэлиэтээһин буолла. Бу үөрүүлээх кэрэ бэлиэ күҥҥэ Моорук Суолатыттан төрүттээх, муус устар 3 күнүгэр олоҕун орто омурҕанын туолар Алтаннааҕы орто оскуола физическэй култуураҕа учуутала, республика биир бастыҥ хапсаҕайдьыта Михаил Дмитриевич Тихоновка “Мэҥэ Хаҥалас улууһун Бочуоттаах гражданина” үрдүк аат иҥэрилиннэ.

Санатан эттэххэ, Михаил Дмитриевич хайа күн СГУ физическэй култуураҕа уонна спорка институтун үөрэнэн бүтэриэҕиттэн, Алтаннааҕы оскуолаҕа учууталынан анаммыта уонна бүгүн бүгүнүгэр диэри, харыс да сири халбарыйбакка, ситиһиилээхтик үлэлии сылдьар. Михаил Тихонов – көҥүл тустууга ССРС спордун маастара, Саха Республикатын хапсаҕайга маастара.

Спорка ситиһиилэрин туһунан билиһиннэрдэххэ, көҥүл тустууга Россия Кубогын үрүҥ көмүс призера, улуу тренер Д.П. Коркин аатынан “Саха сирин көмүс кура” норуоттар икки ардыларынааҕы турнир кыайыылааҕа, Н.Н. Тарскай кэриэһигэр Саха сирин чемпионатын үс төгүллээх чемпиона уонна призера, оттон хапсаҕайга Саха сирин абсолютнай чемпиона, Манчаары спартакиадатын икки төгүллээх кыайыылааҕа, П.Е. Алексеев кэриэһигэр республика чемпионатын түөрт төгүллээх кыайыылааҕа, үс төгүллээх призера.

М.Д. Тихонов – 2000, 2001, 2003 сылларга Мэҥэ Хаҥалас улууһун бастыҥ спортсменанынан ааттаммыта. Моорук нэһилиэгин Бочуоттаах гражданина.

Спорка үрдүк ситиһиилэрин иһин Михаил Дмитриевич Тихонов 2013 сыллаахха Мэҥэ Хаҥалас улууһун Бочуотун кинигэтигэр киллэриллибитэ. Физическэй култуура уонна спорт, итиэннэ хапсаҕай сайдыыларыгар кылаатын иһин республика анал бэлиэлэринэн наҕараадаламмыта.

Аны кини Мэҥэ Хаҥалас улууһун Бочуоттаах гражданина буолла. Эҕэрдэлиибит!

“Дьулурҕан”.   

Добавить комментарий

Ваш e-mail не будет опубликован. Обязательные поля помечены *