Быдан дьылларга быраһаай, Андрей!

Дьылҕа хаан ыйааҕа кытаанах. Бу күннэргэ өлөр өлүү биһиги кэккэбититтэн биир биллэр бөҕөспүтүн – көҥүл тустууга ССРС спордун маастара Андрей Христофоровы ылан барда.

Андрей 1966 сыл муус 16 күнүгэр оччотооҕу Орджоникидзевскай оройуонугар төрөөбүтэ. Андрейдаах тулаайах буолан, бииргэ төрөөбүт убайа Германы кытта ааспыт үйэ 70-c сылларыгар Уус Алдан оройуонун Курбуһах интернат-оскуолатыгар кэлбиттэрэ. Манна кинилэр көҥүл тустуунан дьарыктарын саҕалаабыттара. Оччолортон интернат-оскуолаҕа тустуу тренердэринэн ССРС спордун маастардара Наум Егорович Ермолаев, Николай Николаевич Рожин, Николай Романович Крылов, онтон салгыы Алексей Николаевич Окоемов үлэлээбиттэрэ. Герман, Андрей Христофоровтар кинилэр салалталарынан тустуунан дьарыктаммыттара.

Андрей оскуоланы 1983 сыллаахха бүтэрэр. Бу сыл Сэбиэскэй Сойуус көҥүл тустууга спордун маастарын нуорматын толорор. Онтон 1984-1986 cc. Сэбиэскэй аармыйа кэккэтигэр спорт ротатыгар сулууспалыыр. Салгыы, Ийэ дойдутугар ытык иэһин толорон кэлэн баран, М.К. Аммосов аатынан Саха государственнай университетыгар физкультурнай факультекка үөрэнэр.

Онтон Уус Алдан улууһугар Бороҕон, Танда оҕо спортивнай оскуолаларыгар, Томпо оройуонугар Хаандыгаҕа – көҥүл тустууга тренеринэн үлэлээбитэ.

А.Н. Христофоров бу дьыл олунньу 8 күнүгэр биһиги олохпутуттан хомолтолоохтук өлөн туораата. Кини спортсмен, тустуук быһыытынан олоҕо биһиги өйбүтүттэн-санаабытыттан хаһан даҕаны умнуллуо, сотуллуо суоҕа. Билэрбит курдук, Андрей тулаайах, улахан өйөбүлэ, көмөлтөтө суох үөскээн – ыарахан, кыһалҕалаах олоҕу олорон ааста.

Манан, барыгытын кимҥэ баҕарар кини кимиттэн, тугуттан тутулуга суох эйэҕэс, кыһамньылаах, бэйэ-бэйэҕэ болҕомтолоох буоларгытыгар баҕарабын.

 

Тустуук Андрей Христофоров ситиһиилэрэ:

-1983 сыллаахха Украина Днепропетровскай куоратыгар Сэбиэскэй Сойуус уолаттарга бастыыр иһин күрэхтэһиитигэр 45 киилэҕэ иккис миэстэни ылбыта. Манна дагестанец Багаутдин Мамаев бастаабыта.

-1985 сыллаахха Бурятия киин куоратыгар Улан-Удэҕэ 48 киилэҕэ монгол Ч.Бадбадрал кэнниттэн иккис миэстэҕэ тахсар. Ити күрэхтэһиигэ сахалартан өссө Анатолий Петров 52 кг ыйааһыҥҥа эмиэ иккис миэстэни ылар.

-1988 сыллаахха олунньу ыйга Белоруссия киин куората Минскэйгэ, үс төгүллээх олимпийскай чемпион, албан аатырбыт тустуук Александр Медведь бирииһигэр улахан таһымнаах норуоттар икки ардыларынааҕы турнирга 48 киилэҕэ үһүс бириистээх миэстэҕэ тахсыбыта.

Онтон муус устар ыйга Белоруссия Гомель куоратыгар Сэбиэскэй Сойуус эдэрдэргэ күрэхтэһиитигэр 48 киилэҕэ дагестанец Султан Даудов кэнниттэн иккис миэстэни ылан, үрүҥ көмүс мэтээлинэн наҕараадаланар.Бу, Андрей Христофоров– ССРС күрэхтэһиитигэр иккис мэтээлэ этэ.

Эмиэ ити сыл күһүн, Красноярскайга – Үрдүкү спортивнай маастарыстыба оскуолаларын Дальнай Восток, Сибиир уонна Урал зонатын чемпионатыгар 52 киилэҕэ бэйэтин хамаандатын киһитэ Сергей Ноговицын кэнниттэн пьедестал иккис үктэлигэр тахсыбыта.

-1989 сыллаахха Дьокуускайга, Музыкальнай театрга тэриллибит Сэбиэскэй Сойуус уонна Америка Холбоһуктаах штаттарын көҥүл тустууга сүүмэрдэммит хамаандаларын табаарыстыы көрсүһүүлэригэр,48 кг АХШ чемпиона Роб Эйтары 9:3 ахсаанынан кыайан, биир дойдулаахтарын сүрдээҕин үөрдүбүтэ. Талааннаах тустуук тахсан эрэрин көрдөрбүтэ.

Ити сыл РСФСР хамаандатын састаабыгар киирэн Монголияҕа “Интернационал” норуоттар икки ардыларынааҕы турнирга 48 киилэҕэ, бу иннинэ хотторууну билэ илик аан дойду икки (1986, 1987 cc.) төгүллээх чемпиона Ли Зе Сигы (Хотугу Корея) хотон баран, быһаарыылаах хапсыһыыга олохтоохтор эрэллэрэ Хоцбаярга сабырыттаран, иккис миэстэҕэ тахсыбыта.

Итинэн ССРС сүүмэрдэммит хамаандатын тренердэрин харахтарын далыгар киирэн, аны Андрейы Арҕаа Германия Бонн куоратыгар үгэс быһыытынан ыытыллар улахан таһымнаах норуоттар икки ардыларынааҕы турнирга кытыннараллар. Итиннэ кини ыйааһыныгар алтыс буолар.

-1990 сыллаахха Дьокуускайга, “Спартак” стадиоҥҥа буолбут улуу тренер Дмитрий Петрович Коркин аатынан “Саха сирин көмүс кура” норуоттар икки ардыларынааҕы турнирга 52 киилэҕэ бэйэтин хамаандатын киһитэ Аркадий Уларов кэнниттэн иккис миэстэни ылар.

-Эһиилигэр, 1991 сыллаахха Дьокуускайга, Россия чемпионатыгар 52 кг ыйааһыҥҥа бириистээх миэстэни барытын Саха сирин хамаандатын бөҕөстөрө ылаллар. Ол курдук, Петр Малардыров бастакы, Герман Контоев иккис, Андрей Христофоров үһүс миэстэлэри үллэстэллэр.

-Онтон 1992 сыллаахха Д.П. Коркин кэриэһигэр “Саха сирин көмүс кура” норуоттар икки ардыларынааҕы турнирга, бу сырыыга 48 киилэҕэ киирсэн боруонса мэтээлинэн наҕараадаланар. Манна бастакы миэстэни Сергей Степанов ылбыта, иккис миэстэҕэ Петр Юмшанов тахсыбыта.

Андрей Христофоров – Саха Республикатын көҥүл тустууга икки төгүллээх чемпиона. Ол курдук, 1991-1992 сылларга52 киилэҕэ тэҥнээҕин булбатаҕа. Итиннэ кини финалга норуоттар икки ардыларынааҕы кылаастаах спорт маастардара Егор Алексеевы (Нам) уонна Петр Юмшановы (Нам) кыайталаабыта.

Маны тэҥэ, 1990 сыллаахха Бороҕоҥҥо буолбут Н.Н. Тарскай аатынан республика чемпионатыгар 52 киилэҕэ бэйэтин биир дойдулаахтара Степан Сивцев уонна Реворий Андросов кэннилэриттэн үһүс бириистээх миэстэни ылбыта.

Бу, саха биир талааннаах тустууга Андрей Христофоров сүрүн ситиһиилэрэ. Мантан даҕаны атын, улуустааҕы, республикатааҕы, Бүтүн Россиятааҕы турнирдарга үрдүк көрдөрүүлэри ситиспитэ уонна бэйэтин аатын Саха сирин тустууга историятыгар киллэрбитэ.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *