“Сахабэчээт” тэрилтэ үлэһиттэрэ дартска күрэхтэстилэр

Улуу Кыайыы 75 сыллаах үбүлүөйүгэр анаммыт маассабай средство информациятын уонна култуура үлэһиттэрин идэлээх сойуустарын ХХ спартакиадата быйыл тоҕус көрүҥҥэ: буулдьанан ытыыга, волейболга, остуол тенниһигэр, остуол оонньууларыгар (хабылык, хаамыска), дуобакка, саахымакка, чэпчэки атлетикаҕа, дартска уонна боулиҥҥа ыытыллар.

Бырагыраама быһыытынан бастакынан, олунньу 1 күнүгэр дартска күрэхтэһии буолар. Бу күрэхтэһиигэ бэлэмнэнэн “Сахабэчээт” тэрилтэ үлэһиттэрэ сүүмэрдиир күрэхтэһии тэрийдилэр. Онуоха эр дьоҥҥо биэс, дьахталларга тоҕус киһи бэйэтин кыаҕын, дьоҕурун холонон көрдө. Тоҕо диэтэргит, кинилэр бу иннинэ хаһан даҕаны спорт бу көрүҥэр күрэхтэһэн көрбөтөх дьон. Ким кыраҕы харахтаах, бэргэн быраҕыылаах эбитин быһаарыстылар.

Манна даҕатан эттэххэ, “Сахабэчээт” тэрилтэтигэр чөл олоҕу тутуһууну, физическэй култууранан уонна спордунан дьарыктаныыны өрө туталлар диэххэ сөп. Санатан эттэххэ, соторутааҕыта аҕай, Россия Бэчээтин күнүн көрсө дуобакка уонна уксааҥҥа тэрилтэ иһинэн күрэхтэһии ыытыллыбытын туһунан сырдатан турабыт.

Дартспытыгар төнүннэххэ, балаһыанньа быһыытынан, кыттааччылар үстүүтэ үстүү дротигынан быраҕан, ким элбэх очукуону ылбыт – ол кыайыылааҕынан ааҕылынна. Ол курдук, эр дьоҥҥо “Сахабэчээт” тэрилтэ системнай администратора Дмитрий Элегяев бастаата. Иккис миэстэни улуус хаһыаттарын кытта үлэҕэ отдел кылаабынай специалиһа Алексей Матвеев ылла. Үһүс бириистээх миэстэҕэ “Сахабэчээт” юриһа Егор Пахомов тигистэ.

Оттон дьахталларга “Полярная звезда” сурунаал эппиэттиир сэкэритээрэ Ираида Попова бэргэнин көрдөрдө. “Далбар Хотун” сурунаал отделын редактора Анна Павлова иккис көрдөрүүлэннэ. “Арчы-Забота” хаһыат корреспондена, “Сахабэчээт” тэрилтэ идэлээх сойууһун бэрэссэдээтэлэ Екатерина Бястинова үһүс буолла.

Кыайыылаахтар Ираида Попова уонна Дмитрий Элегяев “Сахабэчээт” тэрилтэ идэлээх сойууһа туруорбут өйдөбүнньүк бирииһинэн уонна грамотанан наҕараадаланнылар. Кинилэр уонна эр дьоҥҥо иккис буолбут Алексей Матвеев тэрилтэ сүүмэрдэммит хамаандатыгар киирэн, бу субуотаҕа “Сахабэчээт” аатын көмүскүөхтэрэ. Кинилэргэ ситиһиини баҕарыахха!

Петр ПАВЛОВ.

 

“Сахабэчээт” тэрилтэ үлэһиттэрэ дартска күрэхтэстилэр: 1 комментарий

Добавить комментарий

Ваш e-mail не будет опубликован. Обязательные поля помечены *