Аммаҕа Сахаачча музейа аһыллыаҕа


Саха АССР, РСФСР, ССРС үтүөлээх тренерэ Дмитрий Петрович Коркин 90 сылыгар араас улахан тэрээһиннэр ыытылыннылар. Оннук биир кэрэхсэбиллээх тэрээһининэн Саха Республикатын култууратын үтүөлээх үлэһитэ, “Хотугу сулус” араадьыйанан-тэлэбиисэринэн биэрии агентствотын дириэктэрэ Т.А. Гоголева тэрийиитинэн “Строительнай” Атыы-эргиэн киинин Быыстапкалыыр саалатыгар “Коркинныы олоруохха! Коркинныы айыахха!” республикатааҕы быыстапка буолла. Быыстапка нэдиэлэни быһа үлэлээтэ, тыһыынчанан киһи сылдьан музейдар, биирдиилээн коллекционердар, аатырбыт спортсменнар сэдэх экспонаттарын кэрэхсии көрдө.

Бүгүҥҥүттэн саҕалаан “Дьулурҕан” сайтка быыстапка кыттыылаахтарын биирдии-биирдии билиһиннэриэхпит, кинилэр санааларын истиэхпит.

Анна Семеновна Новгородова, педагогическай үлэ бэтэрээнэ, номоххо киирбит тустуук Николай Захаров-Сахаачча бииргэ төрөөбүт балта.

Анна Семеновна, Коркиҥҥа аналлаах быыстапкаҕа бииргэ төрөөбүт убайын аатын үйэтитэҥҥин кэлэн кытыннын. Баһаалыста, дьэ бу быыстапкаҕа эн туох-ханнык экспозияциянан кыттыбыккын билиһиннэр эрэ.

– Татьяна Афанасьевна Гоголева ыҥырыытын ылынан уонна тустууга норуоттар икки ардыларынааҕы кылаастаах спорт маастара Афанасий Иванович Заболоцкай көмөтүнэн икки хонук иһигэр бу стендэ туруордубут. Онно Сахаачча оҕо сааһа, Чурапчытааҕы олоҕо көстөллөр. Мин саныахпар, тустууга маннык улахан быыстапка тэриллибитэ наһаа үчүгэй. Элбэх киһи кытынна уонна бары астына көрөн, күн бүгүҥҥэ диэри кэлэн бардылар. Бүгүн биллиилээх бөҕөс Алкивиад Иванов кэргэнэ Клавдия кэлэн көрөн астынан аҕай барда. Аһыллыытыгар кыайан кэлбэккэ буолан баран, хата быыс булан кэлэн көрдүм, диэтэ. Дьон сылдьыыта элбэх.

Бастакы күн быыстапканы үөрүүлээхти аһыы кэнниттэн биллиилээх суруналыыс Иван Петрович Ушницкай “Оо, Сахаачча, Сахаачча…” диэн кинигэни, тахсыбыта уон сыл буолбутун да үрдүнэн, бу кинигэҕэ киирбэтэҕи, Сахаачча туһунан соҕуруу сылдьан улахан тустууктартан тугу истибитин-билбитин кэпсээн дьону сэргэхситтэ, үөртэ уонна толкуйдатта. Салгыытын, иккис маннык кинигэни таһаарар матырыйаал баар диир. Онон баҕар эмиэ кинигэ күн сирин көрүөҕэ. Үп-харчы көһүннэҕинэ.

Дмитрий Петрович Коркин убайбын маннык такайан, үөрэтэн, уһуйан, үрдүк чыпчаалга таһаарбыта. Коркиннар дьиэ кэргэн киниэхэ ийэлээх-аҕа курдук иитэн, бэйэлэригэр олордон, Коля кылгас кэмҥэ улахан ситиһиилэммитэ.

 

– Быыстапка үлэтин туох дии саныыгын уонна инникитин хайдах көрөҕүн?

– Бу быыстапка мин санаабар – инникилээх. Өссө элбэх киһи кыайан кыттыбакка хаалла. Бастакы сырыыта буолан, элбэх киһи хабыллыбата. Ол да буоллар, бэйэлэрин матырыйаалларын бу быыстапкаҕа кэнники туруоруохтара диэн эрэнэбин.

Сахаачча экспозицията бу быыстапка биир кэрэхсэбиллээх экспозицията буолла диэххэ сөп. Ол курдук, Николай Семенович олоҕун көрдөрөр сэдэх хаартыскалар, хаһыакка тахсыбыт матырыйааллар, кини туһунан кинигэлэр уонна биир сэдэх экспозициянан мин санаабар, Сахаачча бюһа буолар. Ити туһунан тугу этиэҥ этэй?

– Ити бюһу оҕо эрдэҕинээҕи доҕоро Спиридон Иванович Борисов олох бэйэтэ баҕаран туран оҥоттордо. Скульпторбыт – Россия худуоһунньуктарын сойууһун чилиэнэ Семен Кириллович Прокопьев. Онон ити бюст дьон дьүүлүгэр аан маҥнай манна турда, сүрэхтэниини барда. Сабыс-саҥа үлэ. Биллэрин курдук, ахсынньыга Николай Семенович төрөөбүтэ 70 сыла туолар. Онон сибээстээн биһиги Аммаҕа Сахаачча музейын аһаары сылдьабыт. Бюһу онно таһаарыахтаахпыт. Бырааттарым бэйэлэрин күүстэринэн саҥа дьиэ туттулар, ис бараана бүттэҕинэ музей экспозициялара хомуллан, туруохтаах.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *