Убайбыт Захар Чукров туһунан

Спорт эйгэтин тула Захар Чукров туһунан элбэх кэпсэннэ, онтон убайым Захар Николаевич тыа сириттэн силистээх-мутуктаах буолан, дьиэ ис-тас үлэтигэр эмиэ сатабыллаах киһи этэ.

Ааспыт үйэ 70-с сыллар бүтүүлэригэр, мин 9-10 саастаахпар убайбынаан аан бастаан бииргэ үлэлээн турабын. Оччолорго дьиэбит кирпииччэ оһохтоох буолан, мас хайытар эбээһинэс миэхэ уонна бырааттарбар Паналаах, Костяҕа сүктэриллэ сылдьар. Ол саҕана итиччэ саастаах уолаттар үксүлэрэ ити үлэни кыайа туталлара. Оруобуна убаһа өлөрүллэр, идэһэ кэмнэрэ. Тымныы дьэ түһэн эрэр. Биһиги туспутугар мас хайытыытын өрөгөйүн кэмэ.

Аҕам Василий Михайлович Мордовской кирпииччэ оһоххо кыһыҥҥы кэмҥэ өл маһы эбии эбэн оттору ордороро. Ол иһин күһүөрү саҥа эрбэммит маһы киллэрэр идэлээҕэ. Биир күн убайбыт Захар ханнык эрэ күрэхтэһии кэнниттэн сынньана кэллэ. Аҕам улахан кэпсэтинньигэ суох киһи дьэ, Захардыын оллоонноон олорон сэһэргэһэр үгэстээҕэ. Арааһата, Захар бэйэтин ураты санаатын арыйан кэпсиирэ буолуо, аҕам отой тустуу абылаҥар ылларыар дылы. Чэ, ити эмиэ спорт тиэмэтигэр киирэ сыыстыбыт. Халлаан сырдаан, күнүскү чээй бүтэн биһиги таҥнан маспытын хайыта таҕыстыбыт. Убайбыт таах олоруохтааҕар, эмиэ биһигини кытта салгыҥҥа тахсан сүүрэкэтэлээн – ойуокаталаан хамсанар. Бу санаатахха, дьарыгын режимин эбиһээт тутуһар эбит.

Дьэ, биһиги мас хайытабыт, үлэ бөҕөтө. Ол сырыттахпытына, Захар кэлэн, куоталаһыаххайыҥ эрэ диэн тыл көтөхтө. Күрэхтэһиибит диэн, мин бырааттарбын кытта маһы туруоран иһэбит, кини хайытан эккирэтэн иһэр. Биһиги биир улахан эргиир оҥордубут да кыайабыт. Дьэ түһүнүү буолла, биһиги олох аҕылыахпытыгар дылы мас көтөҕө-көтөҕө туруоран иһэбит, убайбыт Захар хаалбат. Ол да буоллар сатаан сиппэт, биһиги ол аайы үөрүү бөҕө. Биирдэ көрбүппүт, икки тыраахтыр прицебин маһа бүтэн тэлгэнэ сытар. Кэлин санаатахха, маннык үлэ көмөтүнэн убайбыт тыа сирин үлэтин кыайарга, дьаһанарга сөптөөхтүк да такайбыт. Бу сылдьан ийэлээх аҕаҕытыгар маннык көмө дьон буола улаатын диэн мэлдьи сүбэлиир.

Захар Николаевич биир сатабылын өссө ас астааһыныгар көрөн турабын. Биир саас протокаҕа илимнээн улахан сордоннору хаптардыбыт. Биһиги тастыҥ быраппынаан Скрыбыкин Колялыын бэккэ табыллан, биир бэйэбит 4-5 улахан сордоҥноох дьиэбитигэр кэллибит. Убайым сынньана кэлбит эбит, биһигити көрөөт үөрдэ. Бэт да сордоннор диэн хайгаата. Түргэн соҕустук ыраастаата да, тоҕо эрэ куттаҕын, иһин бырахпата. Хата сууйан баран лааҥкыга ыһаарылаан ылла. Биһиги амсайан баран, амтанын да билбэккэ хаалбыт курдук буоллубут. Аны туран, улахан балыгы туустуурга үөрэтэн турар. Кини отой атыннык туустуурун аан маҥнай аҕабар көрдөрбүтэ, онно бэрт сатабыллаахтык уонна олох үөрүйэхтик тутара-хабара сөхтөрбүтэ. Ол балык олус минньигэс амтаннааҕын ийэм Василиса Ивановна уонна аҕам Василий Михайлович тута бэлиэтээбиттэрэ.

Кэлин дьонум миэхэ убайым Захар ньыматынан эрэ туустатар буолбуттара. Ити курдук, Захар Николаевич асчыт бэрдэ этэ.

Михаил МОРДОВСКОЙ-Михута.

Горнай.

 

Убайбыт Захар Чукров туһунан: 1 комментарий

Добавить комментарий

Ваш e-mail не будет опубликован. Обязательные поля помечены *