Ярыгин турнирыгар бэлэмнэнии хаамыытын билистибит

    

Тохсунньу 23-26 күннэригэр Красноярскайга куоракка ыытыллар Иван Ярыгин аатынан норуоттар икки ардыларынааҕы Гран-при турнирга бэлэмнэнэн Саха сирин көҥүл тустууга хамаандата “Триумф” Спорка бэлэмнэнии киинигэр үөрэтэр-эрчийэр түмсүүнү тэрийдэ. Эрчиллиини республика сүүмэрдэммит хамаандатын кылаабынай тренерин эбээһинэһин толорооччу Александр Оконешников салайан ыытар. Бүгүн, тохсунньу 14 күнүгэр үөрэтэр-эрчийэр түмсүү чэрчитинэн хонтуруоллуур хапсыһыылар ыытылыннылар.

Сыл саҥатыгар тустууктарбыт араас таһымнаах күрэхтэһиилэргэ ситиһиилээхтик кыттаннар, тустууну таптааччылар сүргэлэрэ көтөҕүллэ сылдьар. Онон тустууктарбыт, тренердэрбит даҕаны үлэлэрин түмүгэ көстөн эрэриттэн настарыанньалара үчүгэй.

Үөрэтэр-эрчиллэр түмсүүгэ билигин республикаҕа баар бастыҥ тустууктарбыт бары кэриэтэ мустан кытыннылар. Сарсыардааҥҥы дьарыгы тренер, аан дойду чемпиона Герман Контоев салайан ыытта. Кини, бастаан тустууктары барыларын түмэн баран, бүгүҥҥү эрчиллии сыалын-соругун билиһиннэрдэ уонна тустууктар онно эппиэтинэстээхтик сыһыаннаһалларыгар ыҥырда. Ол кэнниттэн чаас аҥаара курдук, сүүрэн-көтөн, эти-хааны эрчийэн баран, үс көбүөрүнэн хонтуруоллуур хапсыһыылар саҕаланнылар.

Хапсыһыылар син биир күрэхтэһиигэ курдук тэрилиннилэр. Ол аата, хапсыһыыны салайан ыытааччы, көбүөр судьуйата, боротокуол толоруллуута… Барыта таһымнаахтык буолла. Хапсыһыылары тренердэр Станислав Захаров, Вадим Семенов, Егор Пономарев, Осип Михайлов салайан ыыттылар. Оттон көбүөргэ Станислав Афанасьев, Вячеслав Кривошапкин, Николай Николаев курдук үөрүйэхтээх судьуйалар бөҕөстөр тустууларын сыаналаатылар. Маны барытын Александр Оконешников, Герман Контоев уонна бөҕөстөр тус тренердэрэ көрө-истэ сылдьан, сүбэ-ама, ыйыы-кэрдии биэрэ сырыттылар. Хапсыһыылары тустуу специалистара Петр Кривошапкин, Матвей Лыткин, медицинскэй персонал уонна Спорка бэлэмнэнии киинин дириэктэрин солбуйааччы Михаил Пахомов сыныйан көрдүлэр-иһиттилэр.

Оттон көбүөргэ Михаил Иванов, Эдуард Григорьев, Дмитрий Аксенов, Револий Самсонов, Айсен Потапов, Петр Павлов, Егор Дмитриев, Иван Оконешников, Тимур Николаев, Георгий Окороков, Василий Стрекаловскай курдук күүстээх бөҕөстөрү тэҥэ, эдэр тустууктар тиритэ-хорута, туох баалларынан туһуннулар. Былаан быһыытынан, кинилэр эбиэккэ диэри үстүү, оттон эбиэттэн киэһээ иккилии толору хапсыһыыны ыыттылар. Туораттан көрдөххө, бөҕөстөр сирэйдэрэ-харахтара, туттуулара-хаптыылара сэргэх, этэргэ дылы, тоҥ маһы тоҕута тардыах курдуктар. Онон бэлэмнэниилэрэ мин санаабар үчүгэй курдук. Оттон ким эрчиллиигэ хайдах үлэлээбитэ, күрэхтэһиигэ көстүө турдаҕа.

Эрчиллиигэ, Турцияттан саҥа көтөн кэлбит тренер Иван Дмитриев эрчийэр уолаттарынаан Арыйаан Тютринныын уонна Виктор Рассадинныын кыттыспытынан бардылар. Чугастааҕы сыал-сорук Иван Ярыгин аатынан турнирга ситиһиилээхтик кыттыы.

Манна даҕатан эттэххэ, урукку сылларга маннык тэрээһиннэр сабыылаах кэриэтэ, тастан кими даҕаны киллэрбэккэ ыытыллар эбит буоллахтарына, саҥа салалта кэлиэҕиттэн аһаҕас буолбута кэрэхсэбиллээх. Хапсыһыылары суруналыыстар, спорт бэтэрээннэрэ, тустууну таптааччылар кэлэн көрөр, сыаналыыр кыахтаннылар.

Петр ПАВЛОВ.

Ааптар хаартыскаҕа түһэриитэ.      

Добавить комментарий

Ваш e-mail не будет опубликован. Обязательные поля помечены *