Владислав Андреев Беларусь көҥүл тустууга тоҕус төгүллээх чемпиона!

Минскэйгэ, көҥүл тустууга Беларусь Республикатын чемпионата икки күн ыытыллан түмүктэннэ. Бу эппиэттээх күрэхтэһиини саха тустууну таптааччылара улахан болҕомтолорун ууран кыраҕытык кэтээн көрдүлэр. Тоҕо диэтэргит, Беларусь хамаандатын аатыттан биһиги биир дойдулаахтарбыт Владислав Андреев, Ньургун Скрябин, Андрей Бекренев хаһыс даҕаны сылларын кытталлар.

Бөҕөстөрбүт быйылгы чемпионакка хайдах кытыннылар? Чемпионат иннинээҕи сылыктааһыны уонна сэрэбиэй хайдах буолбутун бэҕэһээ сайтпытыгар (http://dzulurgan.ru) аахпыт буолуохтааххыт. Онон, бөҕөстөрбүт хайдах тустубуттарын сиһилии соҕус билиһиннэриэххэ. Маннык түгэҥҥэ тустууну сэҥээрээччилэр хаһан баҕарар ким кими, хас очукуонан, хайдах кыайбытын сиһилии ыйыта, билэ сатааччылар. Онон өрүү ол сиэринэн билиһиннэрэ, суруналыыс быһыытынан күрэхтэһии хаамыытын сырдата сатыыбын. Оттон ханнык баҕарар киһи ону билэн, ааҕан баран, бэйэтэ-бэйэтигэр түмүк, ырытыы оҥосторо омнуоламмат.

Беларусь спордун үтүөлээх маастара Владислав Андреев (57 кг) бэҕэһээ бастаан Шамелоны, онтон Урбановиһы улахан илистиитэ суох, тустар маастарыстыбата үрдүгүнэн баһыйа тутан, очукуонан ыраастык (10:0) кыайталаата. Оттон финалга тахсар иһин киирсиигэ Гасановы улаханнык тиритэн туран, 8:7 ахсаанынан хотто уонна финалга таҕыста.

Финаллар бүгүн буоллулар. Онон сынньана, этэргэ дылы, тыын ыла түһэн баран, утарсааччыларын эмиэ улаханнык баһыйа тутан финалга тахсыбыт Димчик Ринчиновтыын көрүстэ. Бу бөҕөстөр Беларусь Республикатыгар 57 киилэҕэ баһылыыр-көһүлүүр оруолу былдьаспыттара ыраатта. Онуоха бу да сырыыга Владислав Андреев өйдөөхтүк-төйдөөхтүк тустан, туох даҕаны мөккүөрэ суох 7:0 ахсаанынан кыайа тутта. Итинэн Владислав Беларусь тоҕус (!) төгүллээх чемпиона буолбутунан, кинини уонна тренерэ Будимир Григорьевич Яковлевы эҕэрдэлиэҕиҥ!

Скрябиннаах Бекренев (65) биир ыйааһыҥҥа, биир бөлөххө кытыннылар. Ньургун Скрябин бастаан Тереховы, онтон Кердолы 10:0 ахсаанынан хотон баран, эмиэ Андреев курдук, үһүс эргииргэ сүрдээх тыҥааһыннаах хапсыһыыны ыытта. Биир дойдулааҕа Бекреневы утары сорунан туран тустан, этэргэ дылы, сэттэ көлөһүнүн тоҕон туран, 3:2 ахсаанынан кыл мүччү кыайда. Итинэн финалга таҕыста.

Эрдэттэн сэрэйиллибитин курдук, финалга уруккуттан эриһэр киһитин – норуоттар икки ардыларынааҕы кылаастаах спорт маастара Георгий Колиевы кытта көрүстэ. Итиэннэ, хомойуох иһин, ыраастык хотторон кэбистэ. Манна сыһыары тутан эттэххэ, күһүн, Беларусь Республикатын аан дойду чемпионатыгар бу ыйааһыҥҥа ким  көмүскүү барарын быһаарсар эппиэттээх, хонтуруоллуур хапсыһыыга Ньургун – Колиевы атаҕыттан ылан охторон баран, салгыы “кириэс” диэн албаска эргитэн, киирсии болдьоҕун иннинэ 11:0 ахсаанынан кыайыыны ситиспитэ. Оттон бу сырыыга табыллан тустубата. Хотторуу биричиинэтин тренердэр ырытан, үөрэтэн баран итэҕэһи-быһаҕаһы туоратарга үлэлэһиэхтэрэ дии саныыбыт.

Оттон Андрей Бекренев саҥа ыйааһыҥҥа хайдах эрэ тыыллан-хабыллан, сэниэлээхтик кытынна диэххэ сөп. Кини бастаан Шахбановы 3:1, онтон Соловейы 6:5 кыайан баран, ити Скрябиҥҥа сабырыйтарда. Сарсыныгар чемпионат боруонса мэтээлин ким ыларын быһаарсыыга Тереховы 9:0 ахсаанынан баһыйа тутта.

Онон биир дойдулаахтарбыт олимпийскай сылга Беларусь Республикатын көҥүл тустууга чемпионатыттан биир кыһыл көмүс, биир үрүҥ көмүс уонна биир боруонса мэтээли ыллылар. Бөҕөстөрбүт салгыы атын күрэхтэһиилэргэ сүүмэрдэнэн кыттыахтара.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *