Хапсаҕай: “Азия оҕолоро” оонньууларга сүүмэрдээһин салҕанар

Тохсунньу 11-12 күннэригэр Бүлүү улууһун Тыымпытыгар – Бырааттыы Быкалыровтар ааттарынан спорт саалаҕа хапсаҕайга Бүлүү улууһуттан бастакы маастар, Саха сирин 4, Манчаары спартакиадатын 2 төгүллээх чемпиона, Үөһээ Бүлүү улууһун Үөдүгэй нэһилиэгин уонна Бүлүү улууһун бочуоттаах гражданина, Саха АССР спордун маастара Выбор Алексеевич Быкалыров кэриэһигэр республикатааҕы VIII турнир ыытыллан түмүктэннэ.

Түһүлгэ бу сырыыга “Азия оҕолоро” норуоттар икки ардыларынааҕы VII спортивнай оонньууларга бэлэмнэнэн, республика хапсаҕайга хамаандатын сүүмэрдиир үһүс түһүмэҕин быһыытынан тэрилиннэ. Манан сибээстээн “Модун” спорт национальнай көрүҥнэригэр киинин тренердэрэ, спорт маастардара Платон Саввинов уонна Вячеслав Данилов салалталарынан 15 бастыҥ хапсаҕайдьыт уол талыллан кэлэн, биир нэдиэлэ устата Үөһээ Бүлүүгэ үөрэтэр-эрчийэр түмсүүгэ кытынна. Ону тэҥэ Тыымпыга, эр дьоҥҥо икки ыйааһыҥҥа күрэхтэһии буолла.

Күрэхтэһиигэ Кэбээйи, Ньурба, Үөһээ Бүлүү, Бүлүү, Таатта, Өлүөхүмэ, Горнай, Амма, Чурапчы, Дьокуускай хапсаҕайдьыттара, барыта 89 киһи, ол иһигэр 11 спорт маастара кыттыыны ылла.

Сүрүн күрэхтэһии кэнниттэн үгэс быһыытынан муҥутуур кыайыылаахтары быһаарар түһүлгэ тэрилиннэ. Онуоха уолаттарга Кэбээйиттэн Айсен Поскачин, оттон эр дьоҥҥо Тыымпыттан Юрий Сергин бастаатылар.

Күрэхтэһии түмүк көрдөрүүтэ:

33 кг: 1. Сандал Алексеев (Үөһээ Бүлүү), 2. Ратмир Прокопьев (Тыымпы), 3. Сулустаан Алексеев (Мастаах).

45 кг: 1. Олимпий Васильев (Мукучу), 2. Афанасий Иванов (Ороһу), 3. Алгыс Лебедкин (Үөһээ Бүлүү).

50 кг: 1. Тимур Андреев (Горнай), 2. Эльдар Иванов (Модун), 3. Дархан Бондарь (Мукучу).

55 кг: 1. Айсен Поскачин, 2. Сергей Николаев (иккиэн – Мукучу), 3. Игнат Юшков (Модун).

62 кг: 1. Владислав Васильев (Мукучу), 2. Алексей Вензель (Модун), 3. Ян Алексеев (Үөһээ Бүлүү).

70 кг: 1. Сурен Оганесян (Өлүөхүмэ), 2. Семен Ксенофонтов (Үөһээ Бүлүү), 3. Айвар Осипов (Тааһаҕар).

+70 кг: 1. Михаил Нестеров (Амма), 2. Дьулуур Николаев (Модун), 3. Владислав Софронов (Мастаах).

65 кг: 1. Вилюян Иванов, 2. Семен Тимофеев (иккиэн – Үөһээ Бүлүү), 3. Андрей Сивцев (Бүлүү).

75 кг: 1. Иван Семенов (Кэбээйи), 2. Юрий Сергин (Тыымпы), 3. Айхал Крылатов (Үөһээ Бүлүү).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *