Турцияттан, Яшар Догу турнирыттан икки боруонса мэтээл

Бөөлүүн түүн Турцияттан үчүгэй сонун кэллэ. Номох буолбут Яшар Догу кэриэһигэр үгэскэ кубулуйбут көҥүл тустууга норуоттар икки ардыларынааҕы турнирга биир дойдулаахтарбыт Петр Константинов уонна Виктор Рассадин бэйэлэрин ыйааһыннарыгар үһүс бириистээх миэстэҕэ тахсан, боруонса мэтээллэринэн наҕараадаланнылар.

Туох барыта кыраттан саҕаланар. Бөҕөстөрбүт олимпийскай сылы сэргэхтик саҕалаабыттара киһини үөрдүбэт буолуон табыллыбат. Бүгүн, иһиттэх, кэпсэттэх аайы бары наар Рассадиннаах үһүс буолбуттарын туһунан. Этэргэ дылы, силиһэ-мутуга суох мээнэ, күдээринэ өрүкүнэйии. Оттон кинилэр хайдах тустан үһүс буоллулар, турнир кыттааччылара, таһыма хайдаҕый? Ол туһунан ырытан, быһааран биэриэхпин баҕардым.

Бу турнирга саха тустууга кыһатын иитиллээччилэриттэн билиҥҥи кэмҥэ тумус туттар тустууктарбыт: Арыйаан Тютрин, Виктор Рассадин уонна эдэр талааннаах бөҕөс Петр Константинов өссө эрдэттэн Турцияҕа тиийэн эрчиллэн, бэлэмнэнэн кытыннылар.

Турнир таһымын туһунан эттэххэ, билигин аан дойду араас муннуктарыгар нэдиэлэ ахсын күрэхтэһиилэр ыытыллар буолан, Турциятааҕы турнир састаабын оннук наһаа күүстээх диэбэккин. Син эмиэ ираннарга курдук (Тахти кубогар), туроктар бэйэлэрин бастыҥ бөҕөстөрө кыттыбатылар. Азербайджан, Болгария, Грузия, Узбекистан, Казахстан балачча бойобуой састаабынан кытыннылар.

Петр Константинов ыйааһыныгар уон алта кыттааччы күрэс былдьаста. Сэрэбиэй быһыытынан биһиги уолбут үөһээ бөлөххө түбэстэ. Кыттааччылары сыныйан үөрэтэн көрдөххө, манна күүстээхтэр (Хашалов, Эдишерашвили, Дубов, Вангелов, Ибрагимов) аллараа бөлөххө киирдилэр. Онон Константиновка сэрэбиэйэ табыллыбыт диэн “күлүкпүтүгэр имнэммиппит”. Эрдэлээн эттэххэ, уолбут биһиги эрэлбитин түһэн биэрбэтэ.

Бастаан болгарин Наим Микяйы 9:2, онтон таджик Хикматулло Вахидовы 4:2 ахсааннарынан кыайталаан баран, финалга тахсар иһин киирсиигэ узбек Гуломжон Абдуллаевка кыл-мүччү 1:2 хотторон кэбистэ. Онон боруонса мэтээл иһин турок Али Карабоганы кытта туһунна уонна очукуонан ыраас кыайыыны (11:1) ситистэ.

Эдэр уол кыттыытын үчүгэйинэн сыаналыахха сөп. Ханныгын да иһин, мэтээлгэ тиксэн, илии тутуурдаах, өттүк харалаах кэллэҕэ. Өссө аһара баран эттэххэ, финалга тахсар кыахтааҕын бэйэтэ мүччү тутта дии саныыбын.

57 кг түмүк маннык буолла: 1. Георгий Вангелов (Болгария), 2. Гуломжон Абдуллаев (Узбекистан), 3. Петр Константинов (Россия, Саха сирэ), Афган Хашалов (Азербайджан).

Биир эрэнэр бөҕөспүт Арыйаан Тютрин бу сырыыга бэйэтин бойобуой ыйааһыныгар буолбакка, 61 киилэҕэ өрө тахсан туһунна. Кини опыттаах тустуук. Норуоттар икки ардыларынааҕы турнирга номнуо бу ыйааһыҥҥа бэйэтин тургутан көрбүт, өссө былырыын Болгарияҕа Дан Колов турнирыгар күүстээх бөҕөстөрү, ол иһигэр аан дойду чемпионатын призера американец Дзожеф Колону кыайталаан, пъедестал үһүс үктэлигэр тахса сылдьыбыт үөрүйэхтээх.

Бу даҕаны сырыыга миэстэлэһэр, өссө кыайар даҕаны кыахтааҕа. Састаабы ылан көрдөххө, тустууну ханныктык эмэтик удумаҕалатар киһи, наһаата суох дии саныыр буолуохтаах. Ол эрээри, Арыйаан иллэрээ сыл биһиги Ньургун Скрябиммытын хотон Европа чемпионатын боруонса призера буола сылдьыбыт олохтоохтор эрэллэрэ Реджеп Актаһы кытта сатаан тустубата, 3:8 ахсаанынан хотторон кэбистэ.

Туораттан көрдөххө, хайдах эрэ тууһуран, кыһыйан-абаран туран тустубата. Дьиҥэ, тус санаабар, хайдах баҕарар тэҥҥэ киирсэр киһитэ эбит. Итини мин дьиэбиттэн олорон, Стамбултан быһа биэриини илэ харахпынан кэтээн көрөн этэбин.

Салгыы күрэхтэһиигэ Акташ аны бэйэтин киһитэ Хамза Аладжаҕа хотторон кэбиһэн, биһиги бөҕөспүтүгэр туох даҕаны эрэли хаалларбата. Онон тустан бүттэхпит.

Бу балаһыанньаҕа, кинини биир ыйааһын өрө тахсан туһунна, утарсааччыларыгар ыйааһын, күүс-уох, эт-хаан өттүнэн тиийбэт диэн бэйэни уоскутунуохха сөп. Эчэйиитин оһорунан эрчиллиитин тохтото сылдьыбыта, урукку таһымыгар тиийэ илигэ көһүннэ.

Бу ыйааһыҥҥа финал бүгүн буолар. 61 кг быһаарыылаах хапсыһыыга көрсүһүөхтэрэ: Хамза Аладжа (Турция) – Интигам Вализаде (Азербайджан). Оттон биһиги бөҕөспүтүн хоппут Реджеп Акташ үһүс миэстэ иһин таджик Шарифовтыын тустуо.

Виктор Рассадин эмиэ Тютрин курдук, биир ыйааһыны өрө тахсан 70 кг туһунна. Сэрэбиэй быһыытынан  маҥнай, быйылгыттан Узбекистантан тустар Ильяс Бекбулатовы кытта тустан тулуспата. Мүнүүтэ иһигэр ыраастык хоттордо. Бекбулатов кими да илиилээх-атахтаах оҥорбото. Утарсааччыларын барыларын эрэллээхтик кыайталаан, үчүгэй таһымыгар сылдьарын көрдөрдө.

Салгыы күрэхтэһиигэ, “уоскутар” бөлөххө киирэн Рассадин 23-гэр диэри саастаахтарга Европа күрэхтэһиитин кыайыылааҕа украинец А.Борутаны 9:2 ахсаанынан хотто. Онтон турнир боруонса мэтээлин ылан, пьедестал үһүс үктэлигэр ким тахсарын быһаарсар тустууга казах Ильяс Жумайы тулуппата, 10:0 ахсаанынан кыайда.

70 кг: 1. Ильяс Бекбулатов (Узбекистан), 2. Хайдар Явуз (Турция), 3. Виктор Рассадин (Россия, Саха сирэ), Агахусейн Мустафаев (Азербайджан).

Рассадин кыттыытын, “Аланнарга” хотторуутун кэнниттэн мэтээлгэ тиксибитин, син ама диэххэ сөп. Итиэннэ эмиэ Тютрин курдук, абаансанан, сотору буолуохтаах Ярыгин аатынан турнирга бэйэтин бойобуой ыйааһыныгар илэ бодотун тардынан тустарын күүтэбит.

Петр ПАВЛОВ.      

Добавить комментарий

Ваш e-mail не будет опубликован. Обязательные поля помечены *