Андреев, Бекренев, Скрябин – Беларусь чемпионатыгар

Бүгүҥҥүттэн Минскэйгэ, Беларусь Республикатын көҥүл тустууга чемпионата саҕаланар. Бу республика чиэһин саха бөҕөстөрө көмүскээбиттэрэ ыраатта. Историяны ылан көрдөххө, өссө сэбиэскэй эрдэхтэн Прокопий Шестаков, Василий Данилов, онтон бырааттыы Герман, Александр Контоевтар, Владислав Андреев, Ньургун Скрябин, Андрей Бекренев – Беларусь хамаандатын аатыттан улахан таһымнаах күрэхтэһиилэргэ ситиһиилээхтик кыттыбыттара.

Ол үгэс билигин даҕаны салҕанан бара турара кэрэхсэбиллээх. Беларусь 2020 сыллааҕы чемпионатыгар үс бөҕөспүт кыттар. Бэҕэһээ бырагыраама быһыытынан чемпионат кыттыылаахтарын ыйааһыннаныылара уонна сэрэбиэйдэрэ буолла. Ону кылгастык билиһиннэрдэххэ маннык:

57 киилэҕэ – уон биир кыттааччы баар. Кинилэртэн саамай аҕа саастаахтара уонна опыттаахтара биһиги, 32 саастаах Владислав Андреевпыт, Европа чемпионатын түөрт төгүллээх призера, аан дойду чемпионатын боруонса призера, Беларусь Республикатын аҕыс төгүллээх чемпиона буолар.

Кини сүрүн утарсааччыта, норуоттар икки ардыларынааҕы кылаастаах спорт маастара бурят Димчик Ринчинов үөһээ бөлөххө киирбит. Онон сэрэйдэххэ, Андреевтаах Ринчинов финалга көрсүөхтэрин сөп. Оннук даҕаны буолара буолуо.

Владислав Андреев бүгүн бастакы эргииргэ маастар Дмитрий Шамелоны кытта киирсиэҕэ.

65 кг ыйааһыҥҥа – уон икки кыттааччы баар. Бу иннинэ наар 61 киилэҕэ кыттыбыт биир дойдулаахпыт Андрей Бекренев бу сырыыга бэйэтин күүһүн бу ыйааһыҥҥа холонорго холоммут. Сэрэбиэй быһыытынан кини биир дойдулааҕа Ньургун Скрябины кытта аллараа бөлөххө бииргэ түбэспит.

Бастакы эргииргэ Андрей Бекренев маастар Денис Соловейдыын, оттон Ньургун Скрябин – спорт маастара Вадим Тереховтыын тусталлар.

Биһиги бөҕөстөрбүт сүрүн утарсааччылара – норуоттар икки ардыларынааҕы кылаастаах спорт маастара Георгий Колиев үөһээ бөлөххө кыттар. Онон сылыктааһын быһыытынан, Ньургун Скрябин уонна Георгий Колиев финалга көрсүөхтэрин сөп.

Онлайн-трансляция: https://wrestling.by/index.php…

Чемпионат бырагыраамата (Саха сирин бириэмэтинэн)

Тохсунньу 12 күнэ, баскыһыанньа

16:30-20:00 – бары ыйааһыннарга барыллааһын хапсыһыылар.

21:00-23:00 – финалга тахсар иһин киирсиилэр.

Тохсунньу 13 күнэ, бэнидиэнньик

16:30-20:00 – “уоскутар” бөлөх уонна финал тустулара.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *