Аҕалаах уол Гороховтар түөстэригэр түөртүү мэтээли кэттилэр

Үөһээ Дьааҥы Улахан Күөл бөһүөлэгэр буулдьа саанан ытыыга спорт энтузиаһа, Амматтан кэлэ сылдьар Н.Е. Захаров бирииһигэр төрдүс төгүлүн улуус чөмпүйэнээтэ буолла. Күрэхтэһиигэ барыта 38 бэргэн ытааччы, ол иһигэр Дьааҥы кырдьаҕас куоратыттан 11, улуус кииниттэн 1 спортсмен кытынна.

Сарсыарда 11:00 чаастан тохтоло суох киэһээ 19:00 чааска түмүктэммит сыралаах киирсиилэр түмүктэринэн, эр дьоҥҥо муҥутуур кыайыылааҕынан ытыыга бастакы спортивнай разрядтаах, элбэх өрөспүүбүлүкэтээҕи күрэхтэһиигэ бириистээх миэстэлэргэ тиксибит Айаал Захаров эрэллээхтик бастаата.

Дьахталларга, 11-с кылаас үөрэнээччитэ Мичилина Эверстова хас да өрөспүүбүлүкэтээҕи күрэхтэһии кыайыылааҕа Наталья Готовцева иннигэр түһэн соһутта. “Куропатка” диэн хамаанданан күрэхтэһиигэ 9 хамаанда кытынна. Түмүккэ Семен, Григорий уонна Мирослав Гороховтар састааптаах Табалаах орто оскуолатын хамаандата эрэллээхтик бастаата.

Бу күрэхтэһиигэ Горохов Семен Иванович уолунаан Мирославтыын түөртүү мэтээли түөстэригэр кэппиттэрэ, туспа ситиһии.

Төрдүс сылын Амматтан саа, бэстилиэт бөҕөнү бэйэтинэн сүгэн, көтөҕөн аҕалан улууска ытыы спорда сайдарын туһугар күрэхтэһии тэрийэ сылдьар Николай Егорович Захаров Табалаах нэһилиэгин администрациятыгар, орто оскуола коллективыгар, спонсордар Потапов Геннадий Васильевичка, Потапов Виктор Викторовичка, Чириков Виталий Ивановичка, Чириков Алексей уонна Михаил Афанасьевичтарга, Горохов Семен Ивановичка, Горохов Григорий Григорьевичка, күрэхтэһии судьуйаларыгар Дмитрий Эверстовка, Егор Потаповка уонна да атыттарга махтал тылларын тиэрдэр.

Платон ЭВЕРСТОВ.

Үөһээ Дьааҥы.

Добавить комментарий

Ваш e-mail не будет опубликован. Обязательные поля помечены *