“Дьулурҕан”: “Кубогын кууспутунан утуктуу олороро…”

/// “Дьулурҕан” саһарбыт страницатыттан    

Быйыл, 2020 сылга Саха сирин бэчээтигэр спорду сахалыы тылынан сырдатан кэлбит “Дьулурҕан” хаһыат бэчээттэнэн тахсыбыта 20 сыла туолар. Манан сибээстээн, хаһыат саһарбыт страницаларыттан үйэлээх, ааҕыллымтыа, олорон кэлбит историябытын кэрэһэлиир диэбит бастыҥ суруйуулары, очеркалары http://dzulurgan.ru сайтка сөргүтэн, ааҕааччыларга өссө төгүл санатыахпытын, билиһиннэриэхпитин баҕардыбыт. 

Ол курдук, “Дьулурҕан” 2002 сыл ахсынньы 31 күнүнээҕи нүөмэригэр “Ааспыт кэмнэр кэрчиктэрэ” диэн рубрикаҕа суруналыыс Степан Юмшанов, спортсменнар олохторугар көрсүбүт көрдөөх түгэннэрин туһунан суруйуута бэчээттэммитэ. Олортон бүгүн биир көрдөөх кэпсээни эһиэхэ билиһиннэрэбит. Манна сыһыары тутан эттэххэ,  Саха Республикатын Суруйааччыларын, Россия Суруналыыстарын сойуустарын чилиэнэ Степан Иннокентьевич Юмшанов быйыл төрөөбүтэ 75 сыла туолар.   

Матырыйаалга, биһиги биир бэриниилээх көмөлөһөөччүбүт, худуоһунньук Александр Коммунарович Попов “Дьулурҕаҥҥа” бэчээттэнэ сылдьыбыт уруһуйа туһанылынна.

Судьуйаласпыт

Ис сүрэхтэриттэн спорка бэриниилээх, олохторугар спорду эрэ өрө тутар уонна ол туһугар дууһаларынан ыалдьан, бэйэлэрин нэһилиэктэрин, оройуоннарын иннигэр сороҕор аһары даҕаны түһэн ылар дьоннор бааллара. Биир оннук киһинэн Уус Алдан спордун өр сылларга салайбыт, тэрийбит Андрей Протопопов этэ.

Биирдэ Саха сирин норуоттарын спартакиадатын чэрчитинэн саха национальнай ыстаныыларыгар күрэхтэһии саҕаланыан иннинэ Андрей Протопопов кэлэн судьуйалаһарга тылланар. Спорка улахан аптарытыаттаах, билэр-көрөр киһини секретарынан анаан кэбиһэллэр. Икки күн устата ыытыллыбыт күрэхтэһиигэ СГУ, Дьокуускай, хас даҕаны оройуоннар хамаандалара эрбии биитин курдук эрийсэллэр, илин-кэлин түсүһэллэр. Андрей тиритии-хорутуу, суруйуу бөҕө буола сылдьар.

Бүтэһиктээх түмүгү таһаарыыга кини кими даҕаны чугаһаппат, грамоталары бэйэтэ суруйан кылаабынай судьуйаҕа туттарар. Пьедесталга аан бастаан хамаанданан бастаабыттары ыҥырбыттарыгар, үс ыстаныы көрүҥнэрин түмүгүнэн Уус Алдан бастакы, иккис СГУ буолан тахсаллар.

СГУ хамаандатын представителлэрэ: “Хайдах хайдаҕый?”, – диэн бутулла сырыттахтарына, биирдиилээн бастаабыттарга бириис, грамота туттарыы саҕаланан, туора туран хаалаллар.

Хас даҕаны хамаанда представителлэрэ хамаанданан түмүгү хаттаан, дьэ кэлэн ааҕа сатыыллар. Кинилэр ааҕыыларынан, Уус Алдан хамаандата олох даҕаны миэстэҕэ киирэр кыаҕа суох эбит. Мучумаан буолар, судейскай коллегияҕа сүүрэн тиийэн айдааны тардаллар. Кылаабынай судьуйа секретарын Андрей Протопоповы көрдүүр.

Ким эрэ: “Ол киһигит кубогын кууһан баран олбуор быыһынан тахсан эрэрэ”, – диэбитигэр, кыыһырбыт судьуйа Афанасий Аргунову өрүс вокзалыгар тиийэн киһитин тутан кэлэригэр суһал сорудаҕы биэрэр.

Олус түргэнник айаннаабыт массыына вокзал иннигэр умса хорулла түһүүтэ, Суоттулуур трамвай хайы-үйэ Өлүөнэ өрүс үөмэхтэс долгуннарын быыстарынан кыталыктыы кынтайан кылбайа турбута.

Андрей Протопопов икки күннээх эрийсии кэнниттэн сылайан сымнаҕас олбоххо кубогын кууспутунан утуктуу олороро…

“Дьулурҕан”.

“Дьулурҕан”: “Кубогын кууспутунан утуктуу олороро…”: 1 комментарий

Добавить комментарий

Ваш e-mail не будет опубликован. Обязательные поля помечены *