Император кубога: Такахаши кыайыа дуу, Хигучи дуу?

Бүгүҥҥүттэн Токио Комадзава гимназиятыгар спортивнай тустууга Император кубогар Япония чемпионата саҕаланар. Бу түһүлгэ, Азия чемпионатыгар хамаанданы сүүмэрдиир сыаллаах, ол аата, бастаабыттар – континент күрэхтэһиитигэр кыттыахтара.

Ол эрээри, өскөтүн көҥүл тустууга Такуто Отогуро (65 кг) уонна Мао Окуи (74 кг) бастыыр түгэннээх буоллахтарына, кинилэр тута олимпиец аатын ылыахтара. Тоҕо диэтэххэ, чуолаан ити ыйааһыннарга японецтар билиҥҥитэ олимпийскай путевкалаахтар. Ону ити үөһээ ааттаммыт бөҕөстөр ылары ситиспиттэрэ.

Быйылгы Император кубога хаһааҥҥытааҕар даҕаны тыҥааһыннаах буолара күүтүллэр. Тоҕо диэтэххэ, олимпийскай ыйааһыннарга сытыы киирсиилэр буолуохтара. Чэ, холобур, ааспыт Олимпиада үрүҥ көмүс призера Рей Хигучи бу күҥҥэ диэри 65 киилэҕэ киирсэ сылдьан баран, бу күрэхтэһиигэ олимпиец аатын ылаары, 57 кг ыйааһыҥҥа кыттарын биллэрдэ.

Онон бастакы ыйааһыҥҥа аан дойду 2017 сыллааҕы чемпиона Юки Такахаши уонна Рей Хигучи икки ардыларыгар хабыр хапсыһыыны күүтэбит. Хайалара кыайыай? Такахаши дуу, Хигучи дуу? Иккиэн даҕаны улахан таһымнаах тустууктар. Бу бөҕөстөр 2014 сыллаахха Япония иһинээҕи күрэхтэһиигэ иккитэ көрсөн тураллар, онно иккиэннэригэр Такахаши кыайыыны ситиспитэ (10:8, 6:5 ахсааннарынан). Бу сырыыга дьэ, хайалара буолар? (Бэйэҕит санааҕытын Комментарийга суруйаргытыгар).

Ылан көрдөххө, 57 киилэҕэ кинилэри тэҥэ өссө Юки Ямагучи, Тоширо Хасегава, Юдай Фуджита, Рикуто Араи курдук күүстээх тустууктар бааллар. Баҕар кинилэр күөрэйэн тахсыахтарын сөп. Бу ыйааһыҥҥа барыта 26 бөҕөс күөн көрсүөҕэ.

Атын даҕаны ыйааһыннарга тыҥааһыннаах тустуулар буолуохтара. Ол курдук, 65 киилэҕэ Токута Отогуроны тэҥэ – Шинго Аримото, Масакацу Камои, Кей Йонезава, Ринуя Накамура диэн биллэр бөҕөстөр бааллар.

Бу иннинэ наар 65 киилэҕэ тустубут, Д.П. Коркин-2016 турнирыгар бастыы сылдьыбыт Дайчи Такатани бу сырыыга бэйэтин күүһүн 74 кг ыйааһыҥҥа холоһуоҕа. Манна күүстээхтэринэн Кейсуке Отогуро, Кен Хосака, Юнами Фуджинами, Юшо Мива, Джинатор Мотояма биллэллэр.

Күрэхтэһии бырагыраамата

Ахсынньы 19 күнэ, чэппиэр

Көҥүл тустууга эр дьоҥҥо – 61, 70, 97, 125 кг ыйааһыннарга барыллааһын киирсиилэр.

Ахсынньы 20 күнэ, бээтинсэ

Көҥүл тустууга эр дьоҥҥо – 79, 86, 92 кг ыйааһыннарга барыллааһын киирсиилэр. 61, 70, 97, 125 кг финаллар. Кыайыылаахтары наҕараадалааһын.

Ахсынньы 21 күнэ, субуота

Көҥүл тустууга эр дьоҥҥо – 57, 65, 74 кг ыйааһыннарга барыллааһын киирсиилэр. 79, 86, 92 кг финаллар. Кыайыылаахтары наҕараадалааһын.

Ахсынньы 22 күнэ, баскыһыанньа

Көҥүл тустууга эр дьоҥҥо – 57, 65, 74 кг финаллар. Кыайыылаахтары наҕараадалааһын.

Петр ПАВЛОВ.

Император кубога: Такахаши кыайыа дуу, Хигучи дуу?: 5 комментариев

  1. Петр Павлов Автор записи

    Ki Takada (Chiba / Nitai Taikashi High School) ○ [T-fall, 1: 02 = 10-0] ● Eiji Hina (Makizu Wrestling Club)

  2. Петр Павлов Автор записи

    61kg▼ Final: Ryuto Sakaki (Yamanashi Gakuin University) Hotaru Shimizu (Takudai).

  3. Петр Павлов Автор записи

    70 kg▼ Final: Ki Takada (Chiba, Nikita University Kashiwa High School) Haraguchi Shin (Kokushikan University).
    97 kg▼ Final: Gakuya Akakuma (SDF) Tsuyoshi Yamaguchi (Bushiroad).
    125kg▼ Final: Shinken Arakida (athletic camp LION) Tetsuya Tanaka (SDF).

  4. ньукулай

    хигучи 57лиир буолла5ына 65кэ отогуро сопернига суох буолбут дии

    1. Петр Павлов Автор записи

      Оннук курдук. Ол да буоллар, атын да уолаттар бааллар.

Добавить комментарий

Ваш e-mail не будет опубликован. Обязательные поля помечены *