Кумааҕыга эрэ хаалбакка – олоххо киирдэр ханнык

Роман Михайлович Дмитриев 2008 сыллаахха Ил Түмэн депутатынан талыллыбыта. Дьиэ кэргэн, оҕо аймах, эдэр ыччат уонна физическэй култуура, спорт комитетын чилиэнэ этэ. Онтон Россия Федеральнай мунньаҕар Саха Республикатын бастайааннай бэрэстэбиитэлинэн буолбута. Билэргит курдук, онно үлэлии сылдьан 2010 сыллаахха сырдык тыына быстыбыта…

Онон бүгүн, саха норуотуттан бастакы олимпийскай чемпион, ССРС спордун үтүөлээх маастара, Советскай Союз уонна Российскай Федерация үтүөлээх тренерэ Роман Михайлович Дмитриев төрөөбүтэ 75 сылын бэлиэтээһиҥҥэ Саха Республикатын Государственнай Мунньаҕар (Ил Түмэн), кини бииргэ үлэлээбит дьонун көҕүлээһиннэринэн «төгүрүк остуол» тэрилиннэ.

Тэрээһини, Ил Түмэн депутата, СР Государственнай Мунньаҕын ыччат дьыалатыгар, физическэй култуураҕа уонна спорка бастайааннай комитетын председателэ, олимпийскай призёр, спорт үтүөлээх маастара Георгий Балакшин иилээн-саҕалаан ыытта. Манна даҕатан эттэххэ, Георгий Русланович бүгүн, кулун тутар 6 күнүгэр төрөөбүт күнэ.

«Төгүрүк остуолга» син эмиэ бэҕэһээ библиотекаҕа кинигэ сүрэхтэниитигэр курдук, дьон-сэргэ күргүөмүнэн көхтөөхтүк мустубута, киһи санаатын көтөҕөр. Бу да түгэн көрдөрөр, саха норуота хайдахтаах курдук Роман Дмитриеви ытыктыырын, кини талааныгар сүгүрүйэрин, кэриэстиирин.

Роман Михайлович Дмитриев аатын үйэтитии туһунан дакылааттары СР Правительствотын председателин солбуйааччы Сергей Местников, СР физическэй култуураҕа уонна спорка министрэ Леонид Спиридонов, РФ спортивнай тустууга федерациятын толорооччу дириэктэрэ Роман Гайдуков, Олимпийскай эрэл училищетын дириэктэрэ Семен Чердонов, Олимпиада-76 призера, спорт үтүөлээх маастара Александр Иванов, Эдьигээн оройуонун баһылыга Василий Сорокин, Р.М. Дмитриев кэргэнэ Антонина Дмитриева оҥордулар.

ССРС сүүмэрдэммит хамаандатыгар бииргэ сылдьыбыт чугас доҕоро Александр Николаевич Иванов бэйэтин этиитигэр Роман Михайлович Дмитриев – спортсмен, тренер, салайааччы, депутат быһыытынан үлэтин сыаналаан туран, кинини Государственнай деятель курдук билинэргэ ыҥырда.

Биир дойдулааҕа Василий Николаевич Сорокин ахтыы оҥороругар, Роман Дмитриев оҕо эрдэҕиттэн дэгиттэр кыахтааҕын, спорт хас да көрүҥүнэн ситиһиилээхтик дьарыктаммытын аҕынна. Холобур, оскуолаҕа үөрэнэ сылдьан, төһө да кыра уҥуохтааҕын иһин, баскетболга кыахтаахтык оонньуурун, өссө бастыҥ оонньооччу буолан анал бирииһинэн наҕараадаламмытын, оннооҕор доҕотторо кинини үчүгэйдик баскетболлуурун иһин «Алачачян» диэн биллиилээх баскетболист Арменак Алачачян аатынан ааттыылларын кэпсээтэ. Ону тэҥэ, мас тардыһыы көрүҥэ аан дойдуга тахсыытыгар анаан, спорт бу көрүҥүн «Мас-рестлинг» диэн чуо Роман Михайлович ааттаабытын санатта.

Ил Түмэн урукку депутата Георгий Михайлович Артемьев, Р.М. Дмитриев саҕалаабыт Тенгрианство туһунан санаата депутаттар өйөбүллэрин ылбакка, салҕаммакка уостан хаалбытын санатта. Итиэннэ бу тиэмэни сөргүтэргэ, олимпийскай чемпион санаатын салгыырга ыҥырда.

Роман Михайлович доҕоро Родион Иннокентьевич Федоров бэйэтин этиитигэр, аатырбыт спортсмен аатын үйэтитии көмөнү күүһүрдэргэ эттэ. Итиэннэ бу дьыала аҥардас Эдьигээн, Чурапчы эрэ улуустарынан буолбакка, республика бүттүүнэ, бары улуустара күүстэрин холбуулларыгар ыҥырда.

Ити курдук, улуу спортсмен аатын үйэтитиигэ үлэни күүһүрдэн, Роман Дмитриев туһунан аһаҕас уруоктары, лекциялары сыл аайы тиһигин быспакка республика бары оскуолаларыгар ыытарга; Тенгрианство тиэмэтин сөргүтэргэ Ил Түмэн депутаттара анал бөлөх тэрийэргэ; Р.М. Дмитриев аатынан анал фонданы олохтуурга; Москваҕа анал спортивнай базаны тэрийэргэ; оҕолор, ыччаттар ортолоругар чулуу дьоммут туһунан билиһиннэрэр, өйдөтөр үлэни күүһүрдэргэ о.д.а. этиилэр оҥоһуллан, депутаттар бэлиэлэригэр киирдилэр. Бу кэскиллээх, ыллыктаах этиилэр кумааҕыга эрэ хаалбакка – олоххо киирдэллэр ханнык.

Аны сарсын, кулун тутар 7 күнүгэр – Роман Михайлович Дмитриев төрөөбүт күнүгэр Комсомольскай болуоссакка Р.М. Дмитриев пааматынньыгын иннигэр үөрүүлээх миитин, күнүс 14:00 чаастан Бэчээт дьиэтигэр пресс-конференция уонна киэһэ 17:00 чаастан Опера уонна балет театрыгар Сүгүрүйүү киэһэтэ итиэннэ “Сулус буолан умайдын” диэн спектакль буолуохтара.

Дьэ онтон, кулун тутар 8-10 күннэригэр “Өрөгөй” Спорка бэлэмнэнии киинигэр Роман Дмитриев кэриэһигэр эдэрдэргэ көҥүл тустууга норуоттар икки ардыларынааҕы 10-с турнир ыытыллыа.

Дьокуускай куорат олохтоохторун уонна ыалдьыттары бу тэрээһиннэргэ уонна күрэхтэһиигэ көхтөөхтүк кыттаргытыгар ыҥырабыт.

Петр ПАВЛОВ.  

Ааптар хаартыскаҕа түһэриилэрэ.