Сулус буолан умайдын

Бүгүн, кулун тутар 4 күнүгэр Покровскайга, А.Д. Сивцев – Айсиэн Дойду сценографиятынан Т.В. Егорова туруоруутунан, көҥүл тустууга бастакы олимпийскай чөмпүйүөммүт, Саха норуотун аар-саарга аатырдыбыт Роман Михайлович Дмитриев төрөөбүтэ 75 сааһын көрсө, «Сулус буолан умайдын» испэктээги, Эдьигээн эбэҥки национальнай оройуонун «Эйгэ» этнокультурнай Киинин үлэһиттэрэ көрдөрдүлэр.

Манна сүрүн оруолу Роман Дмитриеви – улуус баһылыга  Василий Сорокин толордо.

Испэктээк иннинэ ыалдьыттарбыт атыы-эргиэн дьаарбаҥкатын тэрийдилэр. Онно болбукта эриэхэтиттэн барыанньа, уомул балык искэҕэ, ыыһаммыт уомул, күндүөбэй балыктан кэнсиэрбэ, дьуукала о.д.а ас арааһа тардылынна. Итини сэргэ талааннаах тарбахтаах уус дьон оҥоһуктарын быыстапката турда.

Хаҥалас улууһун баһылыга Олег Иринеев уонна Эдьигээн эбэҥки национальнай оройуонун баһылыга Василий Сорокин инникитин бииргэ үлэлииргэ Сөбүлэһии түһэристилэр. Эдьигээн талааннаах дьоно, Ытык Хаҥалас сиригэр ыалдыттаан бардылар.

Уйбаан УЙГУУРАП.

Хаҥалас.