100 харахтаах дуобакка республика чемпионата: Кимнээх бастыахтарай?

Бэҕэһээ, ахсынньы 3 күнүгэр Дуобат-Саахымат республикатааҕы киинигэр ССРС спордун маастара Игорь Андреевич Никифоров кэриэһигэр 100 харахтаах дуобакка дьахталларга уонна эр дьоҥҥо Саха сирин чемпионата саҕаланна.

Чемпионат үрдүкү уонна бастакы лигаларга ыытыллар. Үрдүкү лигаҕа СР дуобакка федерациятын президиумун быһаарыытынан дьахталларга уонна эр дьоҥҥо 10-нуу бастыҥ дуобатчыт кыттар. Этэргэ дылы, билиҥҥи кэмҥэ Саха сирин араас улахан таһымнаах күрэхтэһиилэргэ аатырда сылдьар дуобатчыттарбыт. Кинилэр эргиир систиэмэтинэн барыта 9 туур оонньууллар. Оттон бастакы лигаҕа баҕалаахтар бары оонньууллар, оонньуу швейцарскай систиэмэнэн барар. Чемпионат ахсынньы 8 күнүгэр түмүктэнэр.

Чемпионат үөрүүлээх аһыллыытыгар кылаабынай судьуйа Гаврил Петрович Винокуровка Аан дойду дуобакка федерациятын быһаарыытынан ФМЖД судьуйата буоларын бигэргэтэр туоһу суруга туттарылынна. Бу үрдүк бэлиэни киниэхэ СР дуобакка федерациятын президенэ Владимир Ильич Птицын туттарда. Үөрүүлээх аһыллыыга СР физическэй култуураҕа уонна маассабай спорка управлениетын начаалынньыгын солбуйааччы Андрей Игнатьев кыттыыны ылла.

В.И. Птицын дьахталлар чемпионаттарын бастакы туурун хаамыытын инники дуоскаҕа оҥордо.

 

Бастакы туурга эр дьоҥҥо Николай Гермогенов – Антон Пермяковы хотто. Оттон Николай Гуляев – Алексей Большаков, Гаврил Колесов – Айсен Андреев, Анатолий Протодьяконов – Николай Никаноров, Андрей Федотов – Василий Кычкин оонньуулара тэҥнэһиинэн түмүктэннэ.

Дьахталларга Ангелина Попова – Ангелина Скрябинаны, Сандаара Апросимова – Аяника Колодезникованы кыайдылар. Ксения Нахова – Алена Большакова, Ньургуяна Азарова – Альбина Большакова уонна Матрена Ноговицына – Тунаара Федорова тэҥнэстилэр.

Спорт ханнык баҕарар көрүҥэр күрэхтэһии хатыһыылаах буолар. Ол сиэринэн манна эмиэ оонньуута суох хабыр киирсиилэр буолаллар. Холобур, буола турар чемпионакка ким бастыырын эрдэттэн этэр күчүмэҕэй. Гермогенов, Гуляев, Колесов, Федотов, Протодьяконов илин-кэлин түсүһүүлэрэ күүтүллэр. Биир тылынан, састаап сүрдээх тэҥ диэххэ сөп. Дьахталларга эмиэ биир оннук. Үрдүк рейтиннээхтэринэн Ноговицына, Попова, Апросимова, Федорова, Нахова… буолаллар.

Дьэ, эһиги санааҕытыгар кимнээх бастыахтарай?

Петр ПАВЛОВ. 

Добавить комментарий

Ваш e-mail не будет опубликован. Обязательные поля помечены *